நெய்மர் கோல்ல்ல்... மெக்சிகோவுக்கு எதிராக 2-0 என வெற்றி... காலிறுதியில் பிரேசில்!

காலிறுதிக்கு முன்னேறின

நாக் அவுட் சுற்று ஆட்டங்கள் நடந்து வருகின்றன. அர்ஜென்டினாவை 4-3 என வென்று பிரான்ஸ் காலிறுதிக்கு முன்னேறியது. போர்ச்சுகலை 2-1 என வென்று உருகுவே முன்னேறியது. நேற்று நடந்த ஆட்டத்தில் பெனால்டி ஷூட்டில் 4-3 என ஸ்பெயினை வென்று ரஷ்யா காலிறுதி நுழைந்தது. மற்றொரு ஆட்டத்தில் குரேஷியா 3-2 என பெனால்டி ஷூட்டில் டென்மார்க்கை வென்று காலிறுதிக்கு முன்னேறியது.

பிரேசிலின் சாதனை

இதுவரை நடந்துள்ள அனைத்து உலகக் கோப்பைகளிலும் பங்கேற்றுள்ள ஒரே அணி பிரேசில். மேலும் 5 முறை கோப்பையை வென்று அதிக முறை வென்ற அணியாக உள்ளது. 2வது இடம், 3வது இடம், நான்காவது இடத்தை தலா 2 முறை பெற்றுள்ளது. உலகக் கோப்பையில் மிகவும் வலுவான அணியாக பிரேசில் திகழ்கிறது. மெக்சிகோ இதுவரை 15 உலகக் கோப்பைகளில் விளையாடியுள்ளது. கடைசியாக 1986ல் காலிறுதி நுழைந்தது. 1994 முதல் தொடர்ந்து 6 முறை நாக் அவுட் சுற்றில் வெளியேறியுள்ளது. 32 ஆண்டுகளுக்குப் பிறகு காலிறுதி நுழையும் முயற்சியில் உள்ளது.

நெய்மருக்கு வாய்ப்பு

இந்த உலகக் கோப்பையில் மிகவும் எதிர்பார்க்கப்பட்ட நட்சத்திர வீரர்களான அர்ஜென்டினாவின் லியோனல் மெஸ்ஸி, எகிப்தியின் சலா ஆகியோர் ஏமாற்றினர். அந்த அணிகள் வெளியேறின. கிறிஸ்டியானோ ரொனால்டோ 4 கோல்கள் அடித்தார். ஆனாலும், போர்ச்சுகல் நாக் அவுட்டில் வெளியேறியது. கடந்த உலகக் கோப்பையில் 4 கோல்கள் அடித்த பிரேசிலின் நெய்மர் இந்த உலகக் கோப்பையில் லீக் சுற்றில் ஒரு கோல் மட்டுமே அடித்திருந்தார். அவர் அதிக கோல்களை அடிப்பார் என்ற எதிர்பார்ப்பு ரசிகர்களிடையே இருந்தது.

காலிறுதியில் பிரேசில்

இன்று நடந்த ஆட்டத்தில் துவக்கம் முதலே இரு அணிகளும் மிகவும் வலுவாக மோதின. சமபலத்துடன் மோதினாலும், பிரேசிலுக்கு கோலடிக்கும் வாய்ப்புகள் அதிகம் கிடைத்தன. முதல் பாதியில் இரு அணிகளும் கோல் ஏதும் அடிக்கவில்லை. 51வது நிமிடத்தில் நெய்மர் அபாரமாக கோலடித்தார். ஆட்டத்தின் 88வது நிமிடத்தில் ராபர்டோ பிர்மினோ கோலடிக்க 2-0 என வென்று 16வது முறையாக காலிறுதிக்கு முன்னேறியுள்ளது பிரேசில்.