FIFA: ராவணன் மவன் டா! உலகையே திரும்பி பார்க்க வைத்த ரொனால்டோ.. மெஸ்ஸி தொடர்பான கேள்விக்கு ரியாக்சன்?

டெக்சாஸ்: உஸ்பெகிஸ்தான் அணிக்கு எதிரான ஆட்டத்தில் போர்ச்சுகல் அணி 5-0 என்ற கோல் கணக்கில் அபார வெற்றி பெற்றது. இந்த ஆட்டத்திற்குப் பின், போர்ச்சுகல் அணியின் நட்சத்திர வீரர் கிறிஸ்டியானோ ரொனால்டோ, லியோனல் மெஸ்ஸி குறித்து செய்தியாளர் ஒருவர் கேட்ட கேள்விக்கு பதிலளிக்காமல் அவரைப் புறக்கணித்தார்.

முன்னதாக, காங்கோ அணிக்கு எதிரான முதல் ஆட்டத்தில் ரொனால்டோ எதிர்பார்த்த அளவுக்கு விளையாடாததால் தமக்கான கடுமையான விமர்சனங்களை எதிர்கொண்டார். இவருக்கு நிகரான வீரராக கருதப்படும் மெஸ்ஸி, அர்ஜென்டினா விளையாடிய முதல் இரண்டு உலகக் கோப்பை போட்டிகளிலும் கோல் அடித்தது ரொனால்டோ மீதான விமர்சனங்களை மேலும் அதிகரித்தது. இருப்பினும், அறிமுக அணியான உஸ்பெகிஸ்தானுக்கு எதிராக இரண்டு கோல்களை அடித்து ரொனால்டோ தனது விமர்சகர்களின் வாயை அடைத்ததோடு புதிய வரலாற்றையும் படைத்தார்.

போட்டிக்கு பிந்தைய செய்தியாளர் சந்திப்புப் பகுதியில் ஸ்பானிஷ் மொழி பேசும் பத்திரிகையாளர் ஒருவர் ரொனால்டோவிடம் மெஸ்ஸி பற்றி கேள்வி எழுப்பினார். அந்த கேள்விக்கு பதிலளிக்க விரும்பாத ரொனால்டோ, முகத்தைத் திருப்பிக் கொண்டு மற்றொரு பத்திரிகையாளரை நோக்கி சைகை காட்டி, வேறொரு கேள்வியைக் கேட்குமாறு கூறினார்.

15 வயதில் உலகையே திரும்பிப் பார்க்க வைத்த வைபவ் சூர்யவன்ஷி:ஜாம்பவான் கிளைவ் லாயிட் அறிவுரை!

இதற்கு முந்தைய நாள் நடந்த ஆஸ்திரியாவுக்கு எதிரான ஆட்டத்தில் மெஸ்ஸி இரண்டு கோல்களை அடித்திருந்தார். இதன் மூலம் உலகக் கோப்பை வரலாற்றில் அதிக கோல்களை அடித்த வீரர் என்ற சாதனையைப் படைத்த அவர், நடப்பு தொடரில் 5 கோல்களுடன் 'கோல்டன் பூட்' பந்தயத்தில் முன்னிலையில் உள்ளார். இவர்களது கால்பந்து வாழ்க்கையின் இறுதிக்கட்டத்தில் இருந்தாலும், இந்த இருபெரும் நட்சத்திரங்களும் தொடர்ந்து ரசிகர்களால் கொண்டாடப்பட்டு வருகிறார்கள்.

உஸ்பெகிஸ்தான் மற்றும் ஆஸ்திரியாவுக்கு எதிரான ஆட்டங்களில் ரொனால்டோ மற்றும் மெஸ்ஸி ஆகியோர் பெற்ற கோல்களின் மூலம், இருவரும் மற்றுமொரு சாதனையைப் பகிர்ந்து கொண்டுள்ளனர். அதாவது, ஒரு வீரரின் முதல் மற்றும் சமீபத்திய உலகக் கோப்பை கோல்களுக்கு இடையிலான மிக நீண்ட கால இடைவெளியை (சரியாக 20 ஆண்டுகள் மற்றும் 11 நாட்கள்) இவர்கள் எட்டியுள்ளனர். இவ்விரு வீரர்களும் தங்களது முதல் உலகக் கோப்பை கோலை கடந்த 2006 ஆம் ஆண்டு உலகக் கோப்பையில் பதிவு செய்தனர் என்பது குறிப்பிடத்தக்கது.

ஒருவேளை போர்ச்சுகல் அணி தனது பிரிவில் முதலிடம் பிடித்தால், கால் இறுதிப் போட்டியில் மெஸ்ஸியின் அர்ஜென்டினா அணியை எதிர்கொள்ள வாய்ப்புள்ளது. அதே சமயம், போர்ச்சுகல் இரண்டாம் இடத்தைப் பிடித்தால், இந்த இரு அணிகளும் இறுதிப் போட்டியில் நேரடியாக மோதும் வாய்ப்பு உருவாகும்.

ரொனால்டோவின் செயல்பாடு எவ்வாறு இருந்தது?

காங்கோ அணிக்கு எதிரான ஏமாற்றமளிக்கும் தொடக்க ஆட்டத்திற்குப் பிறகு, உஸ்பெகிஸ்தானுக்கு எதிராக ரொனால்டோ ஒரு சிறப்பான ஆட்டத்தை வெளிப்படுத்தினார். ஆட்டத்தின் 6-வது நிமிடத்திலேயே ஜோவோ கான்செலோவின் லோ கிராஸ் (low cross) பந்தை கோலாக மாற்றி ரொனால்டோ கணக்கைத் தொடங்கினார். அதன் பின்னர், புருனோ பெர்னாண்டஸ் கொடுத்த த்ரூ-பாஸைப் பெற்று, உஸ்பெகிஸ்தான் கோல்கீப்பர் அப்துவோஹித் நேமடோவை வீழ்த்தி முதல் பாதியிலேயே தனது இரண்டாவது கோலையும் பதிவு செய்தார்.

இந்த ஆட்டத்தின் 90 நிமிடங்களில், கிறிஸ்டியானோ ரொனால்டோ 34 முறை பந்தைத் தொட்டு விளையாடினார். இதில் எதிரணியின் பாக்ஸ் பகுதிக்குள் 10 முறை பந்தைக் கையாண்டதுடன், இலக்கை நோக்கி 7 முறை பந்தை அடித்து, அதில் 5 முறை இலக்கைத் துல்லியமாக எட்டினார். அவரது இந்த சிறப்பான பங்களிப்பிற்காக அவர் ஆட்டநாயகனாகத் (Man of the Match) தேர்வு செய்யப்பட்டார்.

FIFA உலககோப்பை: 41 வயதில் கிறிஸ்டியானோ ரொனால்டோ உலக சாதனை.. மெஸ்ஸி ரெக்கார்ட் முறியடிப்பு

2026 உலகக் கோப்பை தொடரில் இதுவரை ஒரு போட்டியில் இலக்கை நோக்கி அதிகமுறை (5 முறை) பந்தை அடித்த வீரர்களின் பட்டியலில் என்னர் வலென்சியா (vs குராசோ) மற்றும் ஜொனாதன் டேவிட் (vs கத்தார்) ஆகியோருடன் ரொனால்டோவும் இணைந்துள்ளார். இந்த இரண்டு கோல்களின் மூலம், உலகக் கோப்பையில் போர்ச்சுகல் அணிக்காக அதிக கோல்களை அடித்த யூசிபியோவின் (Eusebio) சாதனையை ரொனால்டோ முறியடித்தார். இதன் மூலம் உலகக் கோப்பை அரங்கில் இவரது கோல்களின் எண்ணிக்கை 10 ஆக உயர்ந்ததுடன், அவரது தொழில்முறை வாழ்க்கையின் மொத்த கோல்களின் எண்ணிக்கை 975 ஆக அதிகரித்துள்ளது.