Click it and Unblock the Notifications
60,000 பேருக்கு இலவச பீட்சா.. டொமினோஸ் வினோத ஆஃபர்.. அமெரிக்க வீரர் ரெட் கார்டு வாங்கியதற்கு பரிசு
நியூயார்க்: நம்மூரில் தெருவில் கிரிக்கெட் விளையாடும்போது யாராவது தவறு செய்தால், "அவுட் குடுக்க மாட்டியா?" என்று சண்டை போடுவோம். ஆனால், உலகக் கோப்பை கால்பந்து போட்டியில் அமெரிக்க வீரர் ஒருவர் தவறு செய்து அவுட்டாகி வெளியேறியதற்கு (ரெட் கார்டு), டொமினோஸ் நிறுவனம் சுமார் 10 லட்சம் அமெரிக்க டாலர் (சுமார் 8 கோடி ரூபாய்) மதிப்புள்ள பீட்சாக்களை இலவசமாக வழங்க உள்ளது.
நடப்பு உலகக் கோப்பை தொடரின் ரவுண்ட் ஆஃப் 32 போட்டியில், போஸ்னியா அணிக்கு எதிராக அமெரிக்க வீரர் ஃபோலாரின் பாலோகன் ரெட் கார்டு பெற்று வெளியேற்றப்பட்டார். ரெட் கார்டு என்பது கால்பந்து போட்டியில் ஒரு வீரரின் தவறான செய்கைக்கு கொடுக்கப்படும் தண்டனை ஆகும். பொதுவாக இப்படி கார்டு வாங்கினால் ரசிகர்கள் அந்த வீரரை வறுத்தெடுப்பார்கள். ஆனால், அமெரிக்காவில் நிலைமையே வேறு! உலகக் கோப்பை தொடங்குவதற்கு முன்பே டொமினோஸ் நிறுவனம், "அமெரிக்க வீரர் யாராவது ரெட் கார்டு வாங்கினால், 10 லட்சம் டாலர் மதிப்புள்ள 60,000-க்கும் அதிகமான மீடியம் பீட்சாக்களை இலவசமாக வழங்குவோம்" என்று 'எமர்ஜென்சி பீட்சா' என்ற பெயரில் அறிவித்திருந்தது. அது தற்போது நிஜமாகியுள்ளது.
அதிர்ஷ்டவசமாக அமெரிக்க அணி இந்தப்போட்டியில், மாலிக் டில்மேனின் 82-வது நிமிட கோல் உதவியுடன் 2-0 என்ற கணக்கில் வெற்றி பெற்று ரவுண்ட் ஆஃப் 16 சுற்றுக்கு தகுதி பெற்றுள்ளது. 24 ஆண்டுகளுக்குப் பிறகு நாக்கவுட் சுற்றில் அமெரிக்கா பெற்ற முதல் வரலாற்று வெற்றியாக இது அமைந்தது.
இந்தத் தொடரில் தனது 3-வது கோலை அடித்த பாலோகன், ரெட் கார்டு வாங்கி வெளியேறியதன் மூலம் ஒரே நேரத்தில் வில்லனாகவும், இலவச பீட்சா வாங்கித் தந்த ஹீரோவாகவும் மாறியுள்ளார். "தப்பு செஞ்சா தக்காளி சோறு" என, ரெட் கார்டு வாங்கிய வீரருக்கு அமெரிக்க ரசிகர்கள் இப்போது நன்றி கூறி வருகின்றனர். "இனிமேல் ஒவ்வொரு மேட்ச்லயும் ஒரு ரெட் கார்டு வாங்குங்கப்பா, அப்போதான் எங்களுக்கு தினமும் இலவச பீட்சா கிடைக்கும்" என்று அமெரிக்க ரசிகர்கள் சமூக வலைதளங்களில் ஜாலியாக பதிவிட்டு வருகின்றனர்.
இந்த இலவச 'எமர்ஜென்சி பீட்சா' சலுகையைப் பெற விரும்பும் அமெரிக்க ரசிகர்கள் ஜூன் 10-ஆம் தேதிக்கு முன்பாகவே டொமினோஸ் ரிவார்ட்ஸ் திட்டத்தில் பதிவு செய்திருக்க வேண்டும். தேர்வு செய்யப்படும் அதிர்ஷ்டசாலிகள் 2026-ஆம் ஆண்டுக்குள் தங்களது இலவச பீட்சாவை டொமினோஸ் இணையதளத்தில் பெற்றுக்கொள்ளலாம்.
Story first published: Thursday, July 2, 2026, 12:34 [IST]
Other articles published on Jul 2, 2026
Continue with Google