FIFA உலகக் கோப்பையில் கொலம்பியா அபார தொடக்கம்.. அறிமுக அணி உஸ்பெகிஸ்தானை 3-1 என வீழ்த்தி முதலிடம்!

மெக்சிகோ சிட்டி: 2026 உலகக் கோப்பை கால்பந்து தொடரின் குரூப் கே பிரிவு லீக் ஆட்டத்தில், அறிமுக அணியான உஸ்பெகிஸ்தானை 3-1 என்ற கோல் கணக்கில் வீழ்த்தி கொலம்பியா அணி தனது உலகக் கோப்பை கணக்கை கம்பீரமாகத் தொடங்கியுள்ளது.

மெக்சிகோவின் புகழ்பெற்ற அஸ்டெகா மைதானத்தில் நேற்று (புதன்கிழமை) நடைபெற்ற இப்போட்டியில் கொலம்பியா மற்றும் உஸ்பெகிஸ்தான் அணிகள் மோதின. கடந்த 2022 உலகக் கோப்பைக்குத் தகுதி பெறத் தவறிய கொலம்பியா அணி, இம்முறை தொடக்கத்திலேயே அதிரடி காட்ட திட்டமிட்டது. ஆட்டத்தின் 41வது நிமிடத்தில் கொலம்பியாவின் நட்சத்திர விங்கர் லூயிஸ் டயஸ் கொடுத்த அருமையான பாஸைப் பெற்றுக்கொண்ட டேனியல் முனோஸ் லாவகமாக ஒரு கோல் அடித்து அணியை 1-0 என முன்னிலை பெறச் செய்தார்.

ஆனால், ஆட்டத்தின் 60வது நிமிடத்தில் உஸ்பெகிஸ்தான் அணி தங்களது வரலாற்றுச் சிறப்புமிக்க முதல் உலகக் கோப்பை கோலை அடித்தது. ஷோமுரோடோவ் அடித்த பந்தை கொலம்பியா கோல்கீப்பர் தடுத்த போது, ரீபவுண்ட் ஆன பந்தை அப்பாஸ்பெக் ஃபைசுல்லேவ் தலையால் முட்டி கோலாக்கி ஆட்டத்தை 1-1 என சமன் செய்தார். இது உலகக் கோப்பை வரலாற்றில் உஸ்பெகிஸ்தான் நாடு பதிவு செய்த முதல் கோலாகும்.

ஆனால், உஸ்பெகிஸ்தானின் மகிழ்ச்சி 5 நிமிடங்கள் மட்டுமே நீடித்தது. ஆட்டத்தின் 65வது நிமிடத்தில் லிவர்பூல் விங்கரான லூயிஸ் டயஸ், பந்தை லாவகமாக வளைத்து கோல் போஸ்ட்டிற்குள் தள்ளி கொலம்பியாவை மீண்டும் 2-1 என முன்னிலை பெறச் செய்தார். உலகக் கோப்பை வரலாற்றில் லூயிஸ் டயஸ் அடிக்கும் முதல் கோல் இதுவாகும்.

பனாமாவுக்கு கடைசி நிமிடத்தில் அதிர்ச்சி கோல்.. கானா அணி 1-0 என உலகக் கோப்பையில் த்ரில்லர் வெற்றி!

ஆட்டத்தின் கூடுதல் நேரத்தில் மாற்று வீரராகக் களமிறங்கிய ஜமிண்டன் காம்பாஸ் தலையால் முட்டி ஒரு கோல் அடிக்க, கொலம்பியா 3-1 என்ற கணக்கில் அபார வெற்றி பெற்றது. இந்த வெற்றியின் மூலம் குரூப் கே பிரிவில் 3 புள்ளிகளுடன் கொலம்பியா முதலிடத்தைப் பிடித்துள்ளது. நேற்று நடந்த மற்றொரு லீக் ஆட்டத்தில் போர்ச்சுகல் மற்றும் காங்கோ அணிகள் 1-1 என்ற கணக்கில் டிரா செய்தது குறிப்பிடத்தக்கது.