FIFA: ஏமாற்றத்துடன் வெளியேறிய துனிசியா.. நெதர்லாந்து ரவுண்ட் ஆப் 32 சுற்றுக்கு முன்னேறி அசத்தல்

கான்சாஸ் சிட்டி: பிபா உலகக் கோப்பை 2026 தொடரின் குரூப் எஃப் பிரிவில் நடைபெற்ற கடைசி லீக் போட்டியில், துனிசியா அணியை 3-0 என்ற கோல் கணக்கில் வீழ்த்திய நெதர்லாந்து அணி, பிரிவில் முதலிடம் பிடித்து அடுத்த சுற்றுக்கு தகுதி பெற்றுள்ளது.

கான்சாஸ் சிட்டியில் உள்ள ஏரோஹெட் மைதானத்தில் பலத்த மழை மற்றும் இடியுடன் கூடிய வானிலைக்கு மத்தியில் இப்போட்டி நடைபெற்றது. ஆட்டத்தின் தொடக்கம் முதலே நெதர்லாந்து அணி தனது ஆதிக்கத்தை செலுத்தியது. போட்டியின் 10வது நிமிடத்திலேயே நெதர்லாந்தின் டென்செல் டம்பிரிஸ் வீசிய பந்தை தடுக்க முயன்ற துனிசியாவின் எலியாஸ் சகிரி, துரதிர்ஷ்டவசமாக சொந்த கோல் அடித்தார். இதனால் நெதர்லாந்து 1-0 என முன்னிலை பெற்றது. இதனைத் தொடர்ந்து பிரையன் ப்ராப்பி மற்றொரு கோல் அடிக்க, முதல் பாதியில் நெதர்லாந்து 2-0 என முன்னிலை வகித்தது.

இரண்டாவது பாதியிலும் நெதர்லாந்து அணி தனது சிறப்பான ஆட்டத்தைத் தொடர்ந்தது. ஆட்டத்தின் இறுதி கட்டத்தில் கிடைத்த கார்னர் கிக் வாய்ப்பைப் பயன்படுத்தி ஜான் பால் வான் ஹெக்கே தலையால் முட்டி 3வது கோலை அடித்தார். இதன் மூலம் நெதர்லாந்து அணி 3-0 என்ற கணக்கில் அபார வெற்றி பெற்றது. பார்சிலோனா மிட்பீல்டர் பிரென்கி டி ஜாங் இப்போட்டியில் மிகச் சிறப்பாக செயல்பட்டு நெதர்லாந்து அணியின் ஆதிக்கத்தை நிலைநாட்டினார்.

FIFA: ஜப்பான் - ஸ்வீடன் போட்டி டிராவில் முடிந்தாலும் நாக் அவுட் சுற்றுக்கு இரு அணிகளும் தகுதி

இந்த வெற்றியின் மூலம் குரூப் எஃப் பிரிவில் ஜப்பானை முந்தி நெதர்லாந்து அணி முதலிடம் பிடித்துள்ளது. இதன் மூலம் ரவுண்ட் ஆப் 32 சுற்றில் பலம் வாய்ந்த பிரேசில் அணியை எதிர்கொள்வதைத் தவிர்த்துள்ள நெதர்லாந்து, மெக்சிகோவின் மொன்டேரியில் நடைபெற உள்ள போட்டியில் மொராக்கோ அணியை எதிர்கொள்ள உள்ளது. மற்றொருபுறம், பிரான்ஸ் பயிற்சியாளர் ஹெர்வ் ரெனார்டின் பயிற்சியின் கீழ் விளையாடிய துனிசியா அணி, தனது லீக் போட்டிகளில் தோல்வியடைந்து -10 என்ற கோல் வித்தியாசத்துடன் உலகக் கோப்பை தொடரிலிருந்து ஏமாற்றத்துடன் வெளியேறியது.