கிறிஸ்டியானோ ரொனால்டோவின் மோசமான ஆட்டம்.. அறிமுக அணியான காங்கோவிடம் தடுமாறிய போர்ச்சுகல்

லிஸ்பன்: 2026 உலகக் கோப்பை கால்பந்து போட்டியின் குரூப் கே பிரிவு லீக் ஆட்டத்தில், அறிமுக அணியான காங்கோ குடியரசு பலம் வாய்ந்த போர்ச்சுகல் அணிக்கு எதிராக சிறப்பாக ஆடி 1-1 என்ற கணக்கில் அதிர்ச்சி டிரா கொடுத்துள்ளது. இந்த ஆட்டத்தில் 41 வயதான கிறிஸ்டியானோ ரொனால்டோ ஒரு கோல் அடிக்க முடியாமல் திணறியது அவரது ரசிகர்களுக்கு ஏமாற்றத்தை அளித்துள்ளது.

நேற்று (புதன்கிழமை) நடைபெற்ற இப்போட்டியில் போர்ச்சுகல் அணிக்கு ஜோனோ நெவ்ஸ் ஆட்டம் தொடங்கிய 6வது நிமிடத்திலேயே தலையால் முட்டி ஒரு கோல் அடித்து 1-0 என முன்னிலை தந்தார். அண்மையில் காலமான டியாகோ ஜோட்டாவின் நினைவாக கறுப்பு பட்டை அணிந்து விளையாடிய நெவ்ஸ், இந்த கோலை அவருக்கு அர்ப்பணித்தார். இருப்பினும், முதல் பாதியின் கூடுதல் நேரத்தில் (45+5வது நிமிடம்) காங்கோ அணியின் யோவான் விசா தலையால் முட்டி ஒரு கோல் அடித்து ஆட்டத்தை 1-1 என சமன் செய்தார். உலகக் கோப்பை வரலாற்றில் காங்கோ அணி பெற்ற முதல் கோல் மற்றும் முதல் புள்ளி இதுவாகும் .

ஆட்டத்தின் இரண்டாவது பாதியில் போர்ச்சுகல் அணி தொடர்ந்து போராடியும் காங்கோ அணியின் பலமான தற்காப்பு அரணை உடைக்க முடியவில்லை. ஜான் கேன்சிலோ அடித்த கோல் ஆஃப் சைடு காரணமாக நடுவர்களால் மறுக்கப்பட்டது.

நட்சத்திர வீரர் கிறிஸ்டியானோ ரொனால்டோ இப்போட்டியிலும் கோல் அடிக்கத் தவறினார். இதன் மூலம் உலகக் கோப்பை மற்றும் யூரோ கோப்பை போன்ற முக்கிய சர்வதேச தொடர்களில் கடந்த 10 போட்டிகளாக அவர் கோல் ஏதும் அடிக்கவில்லை என்ற மோசமான சாதனை தொடர்கிறது. இந்த 10 ஆட்டங்களில் அவர் 33 முறை கோல் அடிக்க முயற்சித்தும் (11 ஆன்-டார்கெட்) ஒரு கோல் கூட அடிக்கவில்லை.

லியோனல் மெஸ்ஸி பிரம்மாண்ட சாதனை.. ஹாட்ரிக் கோல் ரெக்கார்டு.. அல்ஜீரியாவை வீழ்த்திய அர்ஜென்டினா

போர்ச்சுகல் அணிக்காக 229 போட்டிகளில் விளையாடி 143 சர்வதேச கோல்களை அடித்துள்ள ரொனால்டோ, உலகக் கோப்பையில் இதுவரை 8 கோல்களை மட்டுமே அடித்துள்ளார். நேற்று அல்ஜீரியாவுக்கு எதிராக ஹாட்ரிக் கோல் அடித்து உலகக் கோப்பையில் 16 கோல்களுடன் மெஸ்ஸி முதலிடத்தைப் பிடித்துள்ள நிலையில், ரொனால்டோவின் இந்த பின்னடைவு அவரது ரசிகர்களை கவலையடையச் செய்துள்ளது.