FIFA WC: கத்தார் படுதோல்வி அடைந்து வெளியேற்றம்.. போஸ்னியா 3-1 என வீழ்த்தி அபார வெற்றி

சியாட்டல்: பிபா உலகக் கோப்பை 2026 தொடரின் குரூப் பி பிரிவில் நடைபெற்ற விறுவிறுப்பான லீக் போட்டியில், கத்தார் அணியை 3-1 என்ற கோல் கணக்கில் வீழ்த்தி போஸ்னியா மற்றும் ஹெர்சகோவினா அணி அபார வெற்றி பெற்றுள்ளது. இந்தத் தோல்வியின் மூலம் ஆசிய சாம்பியனான கத்தார் அணி உலகக் கோப்பையிலிருந்து அதிகாரப்பூர்வமாக வெளியேறியது.

சியாட்டலில் நடைபெற்ற இப்போட்டியில் போஸ்னியா அணியின் மூத்த வீரரான எடின் டிஸெகோ தனது 150வது சர்வதேச போட்டியில் களம் இறங்கினார். ஆட்டத்தின் தொடக்கம் முதலே போஸ்னியா அணி ஆதிக்கம் செலுத்தியது. போட்டியின் 29வது நிமிடத்தில் போஸ்னியாவின் 18 வயது இளம் நட்சத்திர வீரரான கரீம் அலாஜ்பெகோவிச், எதிரணி வீரர்களை ஏமாற்றி பாக்ஸிற்கு வெளியிலிருந்து ஒரு அபாரமான கோல் அடித்து தனது அணிக்கு 1-0 என முன்னிலை பெற்றுத் தந்தார்.

இதனைத் தொடர்ந்து 34வது நிமிடத்தில் எடின் டிஸெகோ அடித்த பந்தை தடுக்க முயன்ற கத்தார் வீரர் சுல்தான் அல்-பிரேக் தவறுதலாக ஓன் கோல் (Own Goal) அடித்தார். இதனால் போஸ்னியா அணி 2-0 என வலுவான முன்னிலை பெற்றது. பின்னர் ஆட்டத்தின் 42வது நிமிடத்தில் கத்தார் கேப்டன் ஹசன் அல்-ஹைடோஸ் ஒரு கோல் அடித்து ஆட்டத்தை 2-1 என மாற்றினார். இதனால் ஆட்டத்தில் விறுவிறுப்பு அதிகரித்தது.

தோல்வியடைந்தாலும் முதல்முறையாக நாக் அவுட் சுற்றுக்கு சென்று கனடா சாதனை.. சுவிட்சர்லாந்து முதலிடம்

இரண்டாவது பாதியில் இரு அணிகளும் தொடர்ந்து போராடின. இறுதியாக ஆட்டத்தின் 83வது நிமிடத்தில் போஸ்னியா வீரர் எர்மின் மஹ்மிக் மற்றொரு கோல் அடித்து, தனது அணியின் வெற்றியை 3-1 என உறுதி செய்தார். இந்த தோல்வியின் மூலம் உலகக் கோப்பையில் தனது முதல் வெற்றியைப் பெறும் கத்தாரின் கனவு தகர்ந்தது. 3 போட்டிகளில் 4 புள்ளிகளுடன் குரூப் பி பிரிவில் 3வது இடத்தைப் பிடித்துள்ள போஸ்னியா அணி, சிறந்த 3வது இடம் பிடிக்கும் அணிகளின் பட்டியலில் முதலிடத்தில் உள்ளது. இதனால் அடுத்த சுற்றுக்கு தகுதி பெறும் அவர்களின் கனவு இன்னும் உயிரோடு உள்ளது.

“வைபவ் சூர்யவன்ஷி இந்திய வீரர்கள் அறைக்குள் நுழைய தடை”.. இங்கிலாந்தில் ஐசிசி விதித்த கட்டுப்பாடு