FIFA WC: ஜாம்பவான் பீலேயின் சாதனையை முறியடித்த ஹாரி கேன்.. காங்கோவை வீழ்த்தி இங்கிலாந்து வெற்றி!

நியூயார்க்: ஃபிஃபா உலகக் கோப்பை 2026 கால்பந்து தொடரின் விறுவிறுப்பான ஆட்டத்தில், காங்கோ குடியரசு அணியை 2-1 என்ற கோல் கணக்கில் வீழ்த்தி இங்கிலாந்து அணி வெற்றி பெற்றது. இந்தப் போட்டியில் இரட்டை கோல் அடித்து அசத்திய இங்கிலாந்து கேப்டன் ஹாரி கேன், பிரேசில் ஜாம்பவான் பீலேயின் உலகக் கோப்பை சாதனையை முறியடித்து புதிய வரலாற்று மைல்கல்லை எட்டியுள்ளார்.

போட்டியின் 7-வது நிமிடத்திலேயே காங்கோ அணியின் பிரையன் சிபெங்கா கோல் அடித்து இங்கிலாந்துக்கு அதிர்ச்சியளித்தார். இதனால் ஆட்டத்தின் பெரும்பகுதி இங்கிலாந்து அணி 0-1 என பின்தங்கியே இருந்தது. ஆனால், ஆட்டத்தின் 75-வது நிமிடத்தில் இங்கிலாந்து கேப்டன் ஹாரி கேன் முதல் கோல் அடித்து ஆட்டத்தை 1-1 என சமநிலைக்குக் கொண்டு வந்தார்.

தொடர்ந்து ஆட்டத்தின் 86-வது நிமிடத்தில், பெனால்டி பாக்ஸுக்கு வெளியிலிருந்து ஹாரி கேன் அடித்த மின்னல் வேக ராக்கெட் கோல் இங்கிலாந்தின் வெற்றியை 2-1 என உறுதி செய்தது. இந்த த்ரில் வெற்றியின் மூலம் இங்கிலாந்து அணி ரவுண்ட் ஆஃப் 16 சுற்றில் மெக்சிகோவுடன் மோத தகுதி பெற்றுள்ளது.

இந்தப் போட்டியில் அடித்த 2 கோல்களின் மூலம் உலகக் கோப்பை வரலாற்றில் ஹாரி கேன் தனது ஒட்டுமொத்த கோல்களின் எண்ணிக்கையை 13 ஆக உயர்த்தியுள்ளார். இதன் மூலம் பிரேசில் ஜாம்பவான் பீலேயின் 12 உலகக் கோப்பை கோல்கள் என்ற வரலாற்றுச் சாதனையை கேன் முறியடித்துள்ளார். மேலும், இங்கிலாந்து அணி சார்பாக உலகக் கோப்பை போட்டிகளில் 15 போட்டிகளைத் தொடக்க வீரராக விளையாடிய முதல் அவுட்ஃபீல்டு வீரர் என்ற பெருமையையும் அவர் பெற்றுள்ளார். இந்த உலகக் கோப்பை தொடரில் 5 கோல்கள் அடித்துள்ள கேன், தங்கக் காலணி விருதுக்கான பந்தயத்தில் மெஸ்ஸியை விட 1 கோல் மட்டுமே பின்தங்கியுள்ளார். கேன் தற்போது இங்கிலாந்துக்காக 117 போட்டிகளில் விளையாடி 84 கோல்களைக் குவித்துள்ளார்.

40 ஆண்டுகளில் முதல் முறையாக நாக் அவுட் வெற்றி பெற்ற மெக்சிகோ.. ஈக்வடாரை வீழ்த்தியது

வெற்றிக்குப் பின் பேசிய காங்கோ பயிற்சியாளர் செபாஸ்டின் டெசாப்ரே, "இங்கிலாந்தை நாங்கள் கிட்டத்தட்ட வீழ்த்தும் நிலைக்குச் சென்றோம். ஆனால், உலகின் மிகச்சிறந்த ஸ்டிரைக்கரான ஹாரி கேன் அவர்களைக் காப்பாற்றிவிட்டார்" என்று மனதாரப் பாராட்டினார். இங்கிலாந்து ரசிகர்கள் மற்றும் வீரர்கள் மைதானத்தில் வெற்றிக் கொண்டாட்டத்தில் ஈடுபட்டனர். அடுத்ததாக ரவுண்ட் ஆஃப் 16 சுற்றில் பலம் வாய்ந்த மெக்சிகோ அணியை இங்கிலாந்து எதிர்கொள்ளவுள்ளது.