உலகக் கோப்பை கால்பந்து.. ஹாலாண்ட் அதிரடி கோல்.. ஐவரி கோஸ்ட்டை வீழ்த்தி நார்வே த்ரில் வெற்றி!

டல்லாஸ்: பிபா உலகக் கோப்பை 2026 கால்பந்து தொடரின் விறுவிறுப்பான ஆட்டத்தில், ஐவரி கோஸ்ட் அணியை 2-1 என்ற கோல் கணக்கில் வீழ்த்தி நார்வே அணி வெற்றி பெற்றுள்ளது. இதன் மூலம் ரவுண்ட் ஆஃப் 16 சுற்றில் 5 முறை சாம்பியனான பிரேசில் அணியுடன் மோத நார்வே தகுதி பெற்றுள்ளது.

டல்லாஸ் நகரில் நடைபெற்ற இப்போட்டியின் ஆரம்பம் முதலே இரு அணிகளும் ஆக்ரோஷமான ஆட்டத்தை வெளிப்படுத்தின. ஆட்டத்தின் முதல் பாதியில் ஐவரி கோஸ்ட் அணி தொடர்ந்து தாக்குதல் நடத்தி நார்வே அணிக்கு அழுத்தம் கொடுத்தது. இருப்பினும், முதல் பாதி முடிவடைய 6 நிமிடங்கள் இருந்தபோது நார்வே அணியின் அன்டோனியோ நுசா, பந்தை அற்புதமாக வளைத்து கோல் கம்பத்தின் மேல் மூலைக்கு அனுப்பி நார்வே அணிக்கு 1-0 என்ற கணக்கில் முன்னிலை தேடித்தந்தார்.

இரண்டாவது பாதியில் ஐவரி கோஸ்ட் அணியின் மாற்று ஆட்டக்காரராக களம் புகுந்த அமத் தியாலோ ஆட்டத்தின் போக்கையே மாற்றினார். முதலில் நார்வே அணி அடிக்கவிருந்த உறுதியான கோலை கோல் கோட்டிற்கு அருகே தடுத்து நிறுத்தி காப்பாற்றினார். பின்னர், நிக்கோலஸ் பெபேயுடன் இணைந்து அபாரமான ஆட்டத்தை வெளிப்படுத்திய அவர், நார்வே தடுப்பாட்ட வீரர்களை ஏமாற்றி ஒரு சோலோ கோல் (Solo Goal) அடித்து போட்டியை 1-1 என சமநிலைக்கு கொண்டு வந்தார்.

போட்டி சமநிலையை நோக்கிச் சென்ற நிலையில், ஆட்டம் முடிய 4 நிமிடங்கள் மட்டுமே இருந்தபோது நார்வேயின் நட்சத்திர வீரர் எர்லிங் ஹாலாண்ட் தனது அசத்தலான திறமையைக் காட்டினார். ஆஸ்கர் பாப் கொடுத்த பாஸை பெற்று பேட்ரிக் பெர்க் கோல் கம்பத்தை நோக்கி அனுப்பிய பந்தை, எர்லிங் ஹாலாண்ட் மிக நேர்த்தியாக கோலாக மாற்றி நார்வே அணியின் வெற்றியை 2-1 என உறுதி செய்தார். கூடுதல் நேரத்தில் ஐவரி கோஸ்ட் அணி கோல் அடிக்கப் போராடிய போதிலும் நார்வேயின் தடுப்பாட்டம் அதனை முறியடித்தது.

உலகக் கோப்பை கால்பந்து.. எம்பாப்பே அதிரடி ஆட்டம்.. ஸ்வீடனை வீழ்த்தி பிரான்ஸ் அணி அபார வெற்றி

இந்தப் போட்டியில் தோல்வியைத் தழுவிய போதிலும் ஐவரி கோஸ்ட் அணியின் அமத் தியாலோவின் அபாரமான ஆட்டம் அனைவரையும் கவர்ந்தது. மறுபுறம் வெற்றி பெற்ற நார்வே அணி, அடுத்த சுற்றில் பலம் வாய்ந்த பிரேசில் அணியை எதிர்கொள்ளத் தயாராகி வருகிறது.