கதறவிட்ட ஸ்வீடன்.. 5-1 என்ற கோல் கணக்கில் துனிசியா படுதோல்வி.. அயாரு இரட்டை கோல் அடித்து அசத்தல்

மொன்டெர்ரி: 2026 உலகக் கோப்பை கால்பந்து தொடரில் துனிசியா அணிக்கு எதிரான குரூப் எப் பிரிவு லீக் ஆட்டத்தில், 5-1 என்ற கோல் கணக்கில் அபார வெற்றி பெற்ற ஸ்வீடன் அணி புள்ளிப்பட்டியலில் முதலிடத்திற்கு முன்னேறியுள்ளது.

மெக்சிகோவின் மொன்டெர்ரி மைதானத்தில் இன்று (திங்கட்கிழமை) நடைபெற்ற விறுவிறுப்பான ஆட்டத்தில் ஸ்வீடன் அணி ஆரம்பம் முதலே அசுர ஆதிக்கம் செலுத்தியது. ஆட்டம் தொடங்கிய 7வது நிமிடத்திலேயே ஸ்வீடனின் யாசின் அயாரு ஒரு அதிரடி கோல் அடித்து அணியை முன்னிலை பெறச் செய்தார். தனது துனிசிய பாரம்பரிய பின்னணி காரணமாக அவர் இந்த கோலைக் கொண்டாடவில்லை. தொடர்ந்து 32வது நிமிடத்தில் அலெக்சாண்டர் இஷாக் ஒரு கோல் அடிக்க, ஸ்வீடன் 2-0 என முன்னிலை பெற்றது.

இதையடுத்து சுதாரித்துக் கொண்ட துனிசியா அணி முதல் பாதியின் இறுதியில் பதிலடி கொடுத்தது. ஹனிபால் மெஜ்பிரி கொடுத்த அருமையான கிராஸை பயன்படுத்தி கரீம் ரெகிக் 42வது நிமிடத்தில் ஒரு கோல் அடிக்க, முதல் பாதி முடிவில் ஸ்வீடன் 2-1 என முன்னிலையில் இருந்தது.

இரண்டாவது பாதியில் ஸ்வீடன் அணி அசுர வேகம் காட்டியது. துனிசிய கேப்டன் ஸ்கிரி செய்த தவறால் பந்தைப் பெற்றுக்கொண்ட இஷாக், அதை விக்டர் கியோகெரஸிடம் பாஸ் செய்ய, அவர் அதனை எளிதாக கோலாக மாற்றினார். இதனால் ஸ்வீடன் 3-1 என முன்னிலை பெற்றது.

ஆட்டத்தின் 84வது நிமிடத்தில் மாற்று வீரராகக் களமிறங்கிய மேட்டியாஸ் ஸ்வான்பெர்க், மைதானத்திற்குள் நுழைந்த 18 விநாடிகளிலேயே கோல் அடித்து அசத்தினார். இது உலகக் கோப்பை வரலாற்றில் மாற்று வீரர் ஒருவர் அடித்த 2வது அதிவேக கோலாகும். 2002ல் உருகுவேயின் ரிச்சர்ட் மொராலஸ் 16 விநாடிகளில் அடித்ததே முதலிடத்தில் உள்ளது.

FIFA: ஜப்பான் கோச் கையில் இருக்கும் அந்த மர்ம டைரி என்ன? சமூக வலைதளங்களில் பரவும் 'டெத் நோட்' மீம்ஸ்

அடுத்து இந்த ஆட்டத்தின் கூடுதல் நேரத்தில் யாசின் அயாரு தனது 2வது கோலை அடித்து ஸ்வீடனின் 5-1 என்ற மாபெரும் வெற்றியை உறுதி செய்தார். இந்தப் போட்டியில் இஷாக் 1 கோல் மற்றும் 2 அசிஸ்ட்களும், கியோகெரஸ் 1 கோல் மற்றும் 1 அசிஸ்ட்டும் செய்து ஸ்வீடனின் வெற்றிக்கு முக்கிய காரணமாக திகழ்ந்தனர். துனிசியா அணிக்கு இந்த படுதோல்வி உலகக் கோப்பை பயணத்தில் பெரும் பின்னடைவை ஏற்படுத்தியுள்ளது.