FIFA WC: துருக்கியிடம் தோல்வி.. ஆனாலும் உலகக்கோப்பையின் அடுத்த சுற்றுக்கு முன்னேறிய அமெரிக்கா

By Aravinthan

Published: Friday, June 26, 2026, 10:53 [IST]

இங்கிள்வுட்: பிபா உலகக் கோப்பை 2026 தொடரின் குரூப் டி பிரிவில் நடைபெற்ற கடைசி லீக் போட்டியில், அமெரிக்கா அணியை 3-2 என்ற கோல் கணக்கில் வீழ்த்தி துருக்கி அணி திரில் வெற்றி பெற்றது. கடைசி நேரத்தில் துருக்கி அடித்த கோல் திருப்புமுனையாக அமைந்தது.

அமெரிக்காவின் இங்கிள்வுட் நகரில் உள்ள புகழ்பெற்ற சோஃபி மைதானத்தில் நடைபெற்ற இப்போட்டிக்கு முன்னதாகவே அமெரிக்க அணி குரூப் பிரிவில் முதலிடம் பிடித்து அடுத்த சுற்றுக்கு தகுதி பெற்றுவிட்டது. துருக்கி அணி ஏற்கனவே தொடரிலிருந்து வெளியேறியிருந்தது. இதனால் அமெரிக்க பயிற்சியாளர் மொரிசியோ போச்செட்டினோ, அணியின் முக்கிய வீரர்களுக்கு ஓய்வளித்துவிட்டு மாற்று வீரர்களைக் கொண்டு களம் இறங்கினார்.

FIFA WC Turkey Stuns USA 3-2 with Last-Gasp Goal But USA Marches On to Knockout Stage

ஆட்டம் தொடங்கிய 3வது நிமிடத்திலேயே அமெரிக்க தற்காப்பு வீரர் ஆஸ்டன் டிரஸ்டி ஒரு கோல் அடித்து தனது அணிக்கு 1-0 என முன்னிலை தந்தார். ஆனால், ஆட்டத்தின் முதல் பாதியிலேயே துருக்கி வீரர்கள் அர்தா குலர் மற்றும் பாரிஸ் அல்பர் யில்மாஸ் ஆகியோர் தலா ஒரு கோல் அடித்து தங்கள் அணியை 2-1 என முன்னிலை பெறச் செய்தனர்.

தொடர்ந்து இரண்டாவது பாதியின் 49வது நிமிடத்தில் அமெரிக்காவின் செபாஸ்டியன் பெர்ஹால்டர் ஒரு கோல் அடித்து ஆட்டத்தை 2-2 என சமன் செய்தார். ஆட்டத்தின் கூடுதல் நேரத்தில், கடைசி நிமிடத்தில் துருக்கியின் மிட்பீல்டர் கான் அய்ஹான் ஒரு அபாரமான கோல் அடித்து 3-2 என்ற கணக்கில் துருக்கியின் வெற்றியை உறுதி செய்தார். நடப்பு உலகக் கோப்பையில் துருக்கி பெற்ற ஒரே வெற்றி இதுவாகும்.

மஞ்சள் அட்டை எச்சரிக்கையில் இருந்த முக்கிய அமெரிக்க வீரர்களுக்கு அடுத்த சுற்றில் தடை ஏற்படுவதைத் தவிர்க்கப் பயிற்சியாளர் போச்செட்டினோ ஓய்வளித்தார். கெண்டைக்கால் காயம் காரணமாக முந்தைய போட்டியைத் தவறவிட்ட நட்சத்திர வீரர் கிறிஸ்டியன் புலிசிக், 58வது நிமிடத்தில் மாற்று வீரராகக் களம் இறங்கியபோது ரசிகர்கள் எழுந்து நின்று பலத்த கைதட்டல்களுடன் வரவேற்றனர்.

FIFA: மூன்றாவது முறையாக உலகக்கோப்பை நாக் அவுட் சுற்றுக்குள் ஆஸ்திரேலியா.. பராகுவேவுடன் டிரா

இந்த தோல்விக்குப் பின்னரும் குரூப் டி பிரிவில் முதலிடம் பிடித்த அமெரிக்க அணி, அடுத்த புதன்கிழமை சாண்டா கிளாராவில் நடைபெறும் ரவுண்ட் ஆப் 32 போட்டியில் போஸ்னியா மற்றும் ஹெர்சகோவினா அணியை எதிர்கொள்ள உள்ளது.