FIFA: பெல்ஜியம் 5 கோல் அடித்து அசத்தல்.. பரிதாபமாக அடி வாங்கிய நியூசிலாந்து

நியூயார்க்: ஃபிஃபா உலகக்கோப்பை 2026 கால்பந்து தொடரின் லீக் போட்டியில், பெல்ஜியம் அணி 5-1 என்ற கோல் கணக்கில் நியூசிலாந்தை வீழ்த்தி அபார வெற்றி பெற்றது. வான்கூவரில் நடைபெற்ற இப்போட்டியில் பெற்ற வெற்றியின் மூலம் பெல்ஜியம் அணி குரூப் ஜி பிரிவில் முதலிடம் பிடித்து ரவுண்ட் ஆஃப் 32 சுற்றுக்குத் தகுதி பெற்றுள்ளது.

இந்தப் போட்டி தொடங்கியதில் இருந்தே பெல்ஜியம் அணி ஆதிக்கம் செலுத்தியது. ஆட்டத்தின் தொடக்கத்தில் பெல்ஜியத்திற்கு வழங்கப்பட்ட பெனால்டி வாய்ப்பு, விஏஆர் பரிசீலனைக்குப் பிறகு ரத்து செய்யப்பட்டது. எனினும், ஆட்டத்தின் 28-வது நிமிடத்தில் கெவின் டி புருய்னே வீசிய கார்னர் பந்தை நியூசிலாந்து தடுப்பாட்ட வீரர்கள் சரியாகத் தடுத்து வெளியேற்றாததால், கிடைத்த வாய்ப்பைப் பயன்படுத்தி லியாண்ட்ரோ டிராஸார்ட் முதல் கோலை அடித்தார்.

இதனைத் தொடர்ந்து ஆட்டத்தின் இரண்டாவது பாதி தொடங்கிய 50-வது நிமிடத்தில், டி புருய்னே கொடுத்த பாஸை பெற்று டிராஸார்ட் தனது இரண்டாவது கோலை பதிவு செய்தார். இதனால் பெல்ஜியம் 2-0 என முன்னிலை பெற்றது. ஆட்டத்தின் 66-வது நிமிடத்தில் கெவின் டி புருய்னே மைதானத்தின் எல்லைப் பகுதியில் இருந்து துல்லியமாக உதைத்து பெல்ஜியத்தின் 3-வது கோலை அடித்தார்.

நியூசிலாந்து அணிக்கு ஆறுதல் அளிக்கும் விதமாக எலிஜா ஜஸ்ட் ஆட்டத்தின் இறுதி கட்டத்தில் ஒரு கோல் அடித்தார். ஆனால், பெல்ஜியம் அணி மாற்று வீரராகக் களமிறங்கிய ரொமேலு லுகாகு மற்றும் அலெக்சிஸ் செலமேக்கர்ஸ் ஆகியோரின் அடுத்தடுத்த கோல்களால் 5-1 என்ற கணக்கில் தனது வெற்றியை உறுதி செய்தது.

FIFA WC: விஏஆர் முடிவால் ஈரானுக்கு ஏமாற்றம்.. காயத்துடன் வெளியேறினார் எகிப்து கேப்டன் சாலா

இந்த வெற்றியின் மூலம் பெல்ஜியம் அணி கோல் வித்தியாசத்தின் அடிப்படையில் எகிப்து அணியை முந்தி குரூப் ஜி பிரிவில் முதலிடத்தைப் பிடித்தது. பெல்ஜியம் மற்றும் எகிப்து ஆகிய இரு அணிகளும் அடுத்த சுற்றுக்குத் தகுதி பெற்றுள்ளன. அதே நேரத்தில், மூன்றாவது இடத்தைப் பிடித்த ஈரான் அணி அடுத்த சுற்றுக்குத் தகுதி பெறுமா என்பது மற்ற போட்டிகளின் முடிவுகளின் அடிப்படையில் தெரியவரும்.