FIFA: இங்கிலாந்து கேப்டன் ஹாரி கேன் உலகக்கோப்பையில் வரலாற்று சாதனை.. பனாமாவை வீழ்த்தி முதல் இடம்!

நியூஜெர்சி: ஃபிஃபா உலகக்கோப்பை 2026 கால்பந்து தொடரின் குரூப் எல் பிரிவின் கடைசி லீக் போட்டியில், இங்கிலாந்து அணி 2-0 என்ற கோல் கணக்கில் பனாமாவை வீழ்த்தி அபார வெற்றி பெற்றது. நியூஜெர்சியில் நடைபெற்ற இப்போட்டியில் பெற்ற வெற்றியின் மூலம், தாமஸ் துச்சலின் இங்கிலாந்து அணி குரூப் எல் பிரிவில் முதலிடம் பிடித்து ரவுண்ட் ஆஃப் 32 சுற்றுக்குத் தகுதி பெற்றுள்ளது.

ஈரமான மைதானத்தில் நடைபெற்ற இப்போட்டியின் முதல் பாதியில் இரு அணிகளும் கோல் அடிக்காமல் சமநிலை வகித்தன. எனினும், ஆட்டத்தின் இரண்டாவது பாதியில் இங்கிலாந்து அணி அதிரடியை வெளிப்படுத்தியது. போட்டியின் 62-வது நிமிடத்தில், புகாயோ சாகா வீசிய கார்னர் பந்தை பெற்று, ரியல் மாட்ரிட் நட்சத்திர வீரர் ஜூட் பெல்லிங்ஹாம் இங்கிலாந்து அணியின் முதல் கோலை அடித்தார்.

இதனைத் தொடர்ந்து, பெல்லிங்ஹாம் கொடுத்த கிராஸ் பாஸைப் பயன்படுத்தி கேப்டன் ஹாரி கேன் தலையால் முட்டி இங்கிலாந்தின் இரண்டாவது கோலை அடித்தார். இந்த கோலின் மூலம், உலகக்கோப்பையில் இங்கிலாந்து அணிக்காக அதிக கோல்கள் அடித்த வீரர் என்ற புதிய வரலாற்றுச் சாதனையை ஹாரி கேன் படைத்துள்ளார். அவர் உலகக்கோப்பை வரலாற்றில் தனது 11-வது கோலை பதிவு செய்து, காரி லினேகரின் (10 கோல்கள்) சாதனையை முறியடித்தார்.

உலகத் தரவரிசையில் 34-வது இடத்தில் இருக்கும் பனாமா அணி, இப்போட்டியில் போராடிய போதிலும் கோல் ஏதும் அடிக்க முடியவில்லை. லீக் சுற்றின் 3 போட்டிகளிலும் தோல்வியடைந்த பனாமா அணி, ஒரு கோல் கூட அடிக்காமல் உலகக்கோப்பை தொடரில் இருந்து வெளியேறியுள்ளது.

IND vs IRE: தமிழக வீரர் இடத்தில் வைபவ் சூர்யவன்ஷி.. இந்திய பிளேயிங் லெவனில் மாற்றத்துக்கு வாய்ப்பு

இங்கிலாந்து அணி 3 போட்டிகளில் 7 புள்ளிகளுடன் குரூப் எல் பிரிவில் முதலிடத்தைப் பிடித்துள்ளது. இதன் மூலம் அடுத்த சுற்றில் பலம் வாய்ந்த ஸ்பெயின் அணியை எதிர்கொள்வதைத் தவிர்த்துள்ள இங்கிலாந்து, ஜூலை 1 அன்று அட்லாண்டாவில் நடைபெறும் ரவுண்ட் ஆஃப் 32 போட்டியில், மூன்றாவது இடத்தைப் பிடிக்கும் ஒரு அணியை எதிர்கொள்ளவுள்ளது.