FIFA உலககோப்பை கால்பந்து 2026: இறுதி போட்டி நேரம்? எந்த சேனல், ஒடிடியில் நேரலையில் காணலாம்

நியூயார்க்: 2026 ஃபிஃபா உலகக் கோப்பையை கைப்பற்ற ஸ்பெயின் மற்றும் அர்ஜென்டினா அணிகள் இறுதிப் போட்டியில் மோதவுள்ளன. அதே நேரத்தில், மூன்றாவது இடத்திற்கான போட்டியில் இங்கிலாந்தும் பிரான்சும் விளையாட உள்ளன. இப்போட்டிகளின் தேதி, மைதானம் மற்றும் நேரடி ஒளிபரப்பு விவரங்களை தற்போது காணலாம்.

கனடா, மெக்சிகோ மற்றும் அமெரிக்கா ஆகிய நாடுகளில் பல வாரங்களாக விறுவிறுப்பாக நடைபெற்று வந்த 2026 ஃபிஃபா உலகக் கோப்பை தொடர் தற்போது இறுதிக்கட்டத்தை எட்டியுள்ளது. உலகக் கோப்பையின் இறுதி வார இறுதி ஆட்டங்கள், கால்பந்தின் மிக உயரிய கோப்பையை யார் வெல்லப் போகிறார்கள் மற்றும் வெற்றியாளர் மேடையில் யார் இடம்பிடிக்கப் போகிறார்கள் என்பதைத் தீர்மானிக்கவுள்ளன.

2026 ஃபிஃபா உலகக் கோப்பை இறுதிப் போட்டியில் ஸ்பெயின் மற்றும் அர்ஜென்டினா அணிகள் பலப்பரீட்சை நடத்தவுள்ளன. அரைஇறுதிப் போட்டியில் பிரான்ஸ் அணியை 2-0 என்ற கோல் கணக்கில் வீழ்த்தி ஸ்பெயின் இறுதிப் போட்டிக்கு முன்னேறியது. பந்தைத் தங்கள் வசம் வைத்திருப்பது, அதிவேக பாஸ்கள் மற்றும் பலமான ஆட்டத்திறன் ஆகியவை ஸ்பெயின் அணியின் பலமாக அமைந்துள்ளது.

மற்றொரு அரைஇறுதிப் போட்டியில் இங்கிலாந்து அணியை 2-1 என்ற கோல் கணக்கில் வீழ்த்தி அர்ஜென்டினா இறுதிப் போட்டிக்குள் நுழைந்தது. நடப்பு சாம்பியனான அர்ஜென்டினா ஆட்டத்தின் கடைசிக் கட்டத்தில் சிறப்பான போராட்டத்தை வெளிப்படுத்தி மீண்டெழுந்து, மீண்டும் உலகக் கோப்பையை வெல்லும் வாய்ப்பைப் பெற்றுள்ளது.

அர்ஜென்டினா இதற்கு முன்பு 1978, 1986 மற்றும் 2022 ஆகிய ஆண்டுகளில் உலகக் கோப்பையை வென்றுள்ளது. இப்போது தனது நான்காவது உலகக் கோப்பை மகுடத்தை நோக்கி அந்த அணி பயணிக்கிறது. இப்போட்டியில் வெற்றி பெற்றால், 1958 மற்றும் 1962-ல் பிரேசில் அணிக்கு பிறகு உலகக் கோப்பை பட்டத்தைத் தக்கவைத்துக் கொண்ட முதல் அணி என்ற பெருமையை அர்ஜென்டினா பெறும்.

ஸ்பெயின் அணியைப் பொறுத்தவரை, இது தங்களது இரண்டாவது உலகக் கோப்பை பட்டத்தை வெல்வதற்கான வாய்ப்பாகும். கடந்த 2010-ம் ஆண்டு நெதர்லாந்து அணியை வீழ்த்தி அவர்கள் தங்களது முதல் உலகக் கோப்பையை வென்றனர். தற்போதைய வெற்றி ஸ்பெயின் கால்பந்து வரலாற்றில் மற்றொரு முக்கிய மைல்கல்லாக அமையும்.

ஸ்பெயின் மற்றும் அர்ஜென்டினா அணிகளுக்கு இடையேயான இறுதிப் போட்டி இந்திய ரசிகர்களின் நேரப்படி ஜூலை 20, 2026 அன்று திங்கட்கிழமை அதிகாலை 12:30 மணிக்கு (உள்ளூர் நேரப்படி ஜூலை 19, 2026 அன்று மாலை 3:00 மணிக்கு) தொடங்குகிறது.

80ஆயிரம் ரசிகர்களுக்கு மேல் அமர்ந்து பார்க்க கூடிய மெட்லைஃப் ஸ்டேடியம்,, நியூ ஜெர்சி, அமெரிக்கா மைதானத்தில் பைனல் நடக்கிறது. இதற்கு முன்பாக, இங்கிலாந்து மற்றும் பிரான்ஸ் அணிகளுக்கு இடையிலான மூன்றாவது இடத்திற்கான போட்டி நடைபெறும். இந்திய நேரப்படி , இப்போட்டி ஜூலை 19, 2026 அன்று நள்ளிரவு 12:30 மணிக்கு தொடங்கும்.

ஃபிஃபா உலககோப்பை பைனலில் முதல் முறை.. அர்ஜென்டினா, ஸ்பெயின் கடந்து வந்த பாதை

இந்தியாவில் உள்ள கால்பந்து ரசிகர்கள், இந்த உலகக் கோப்பை தொடரின் டிஜிட்டல் ஒளிபரப்பு உரிமையைப் பெற்றுள்ள ZEE5 ஓடிடி தளத்தில் 2026 ஃபிஃபா உலகக் கோப்பை இறுதிப் போட்டியை நேரலையில் பார்க்கலாம்.மேலும், இப்போட்டித் தொடர் Unite8 ஸ்போர்ட்ஸ் தொலைக்காட்சிகளிலும் ஒளிபரப்பப்படும். இலவசமாகப் பார்க்க விரும்பும் ரசிகர்கள், டிடி ஃப்ரீ டிஷ் மூலம் டிடி ஸ்போர்ட்ஸ் சேனலில் இறுதிப் போட்டி உள்ளிட்ட சில தேர்ந்தெடுக்கப்பட்ட முக்கிய போட்டிகளை நேரலையாகக் காணலாம்.