உலகக் கோப்பை கால்பந்து.. எம்பாப்பே அதிரடி ஆட்டம்.. ஸ்வீடனை வீழ்த்தி பிரான்ஸ் அணி அபார வெற்றி

நியூ ஜெர்சி: பிபா உலகக் கோப்பை 2026 கால்பந்து தொடரின் ரவுண்ட் ஆஃப் 32 சுற்றில், ஸ்வீடன் அணியை 3-0 என்ற கோல் கணக்கில் வீழ்த்தி பிரான்ஸ் அணி ரவுண்ட் ஆஃப் 16 சுற்றுக்குத் தகுதி பெற்றுள்ளது. பிரான்ஸ் அணியின் கேப்டன் கிலியன் எம்பாப்பே இரட்டை கோல்கள் அடித்து அசத்தினார்.

நியூயார்க் நியூ ஜெர்சியில் நடைபெற்ற இந்தப் போட்டியின் முதல் பாதியில் இரு அணிகளும் கோல் அடிக்கக் கடுமையாகப் போராடின. முதல் பாதி முடிவதற்குச் சற்று முன்பாக, ஓஸ்மான் டெம்பேலே மற்றும் மைக்கேல் ஒலிசே ஆகியோரின் கூட்டு முயற்சியால் தனக்கு கிடைத்த பந்தை, எம்பாப்பே முதல் கோலாக மாற்றினார். அதன் மூலம் பிரான்ஸ் அணிக்கு முன்னிலை பெற்றுத் தந்தார்.

இதையடுத்து இரண்டாவது பாதி தொடங்கியவுடன் பிரான்ஸ் அணி தனது ஆட்டத்தை மேலும் தீவிரப்படுத்தியது. மைக்கேல் ஒலிசே அளித்த அருமையான பாஸைப் பயன்படுத்தி பிராட்லி பார்கோலா பிரான்ஸ் அணியின் 2-வது கோலை அடித்தார். ஆட்டத்தின் பிற்பாதியில் மைக்கேல் ஒலிசே மீண்டும் ஒரு முறை கொடுத்த பாஸைப் பயன்படுத்தி எம்பாப்பே தனது 2-வது கோலை அடித்து பிரான்ஸின் வெற்றியை 3-0 என உறுதி செய்தார்.

இப்போட்டியில் அடித்த 2 கோல்களின் மூலம் உலகக் கோப்பை வரலாற்றில் எம்பாப்பே தனது கோல்களின் எண்ணிக்கையை 18 ஆக உயர்த்தியுள்ளார். இதன் மூலம் லியோனல் மெஸ்ஸியின் 19 கோல்கள் என்ற சாதனையை நெருங்கியுள்ளார். மேலும், உலகக் கோப்பை நாக்கவுட் சுற்றுகளில் அதிக கோல்கள் (9 கோல்கள்) அடித்த வீரர் என்ற தனது சாதனையை எம்பாப்பே மேலும் நீட்டித்துள்ளார்.

இந்தத் தொடரில் 6 கோல்களுடன் தங்கக் காலணி விருதுக்கான பந்தயத்திலும் அவர் முதலிடத்தில் உள்ளார். கடந்த 2022 உலகக் கோப்பை இறுதிப் போட்டி தோல்விக்கு பதிலடியாக, இந்த முறை பிரான்ஸை சாம்பியன் ஆக்க வேண்டும் என்பதில் எம்பாப்பே தீவிரமாக உள்ளார்.

FIFA WC 2026: தோல்வியை தழுவினாலும், மாபெரும் பெருமையுடன் செல்லும் நெதர்லாந்து அணி

தனது தாயாரின் இறுதிச் சடங்கில் பங்கேற்றுவிட்டு அண்மையில் முகாமிற்குத் திரும்பிய பிரான்ஸ் பயிற்சியாளர் டிடியர் டெசாம்ப்ஸை கட்டிப்பிடித்து எம்பாப்பே கோல் அடித்த மகிழ்ச்சியைக் கொண்டாடினார். இந்தத் தொடரில் பிரான்ஸ் அணி விளையாடிய 4 போட்டிகளிலும் வெற்றி பெற்று, 13 கோல்களை அடித்து, 2 கோல்களை மட்டுமே விட்டுக் கொடுத்துள்ளது. அடுத்ததாக வரும் ஜூலை 4 அன்று பிலடெல்பியாவில் நடைபெறவுள்ள ரவுண்ட் ஆஃப் 16 சுற்றில் பராகுவே அணியை பிரான்ஸ் எதிர்கொள்கிறது.