மெஸ்ஸியின் உலக சாதனையை முறியடித்த எம்பாப்பே.. உலகக்கோப்பையில் 22 கோல்கள் அடித்து புதிய சரித்திரம்

மியாமி: உலகக் கோப்பை கால்பந்து வரலாற்றில் அர்ஜென்டினாவின் லியோனல் மெஸ்ஸியின் சாதனையை முறியடித்து, ஒட்டுமொத்தமாக அதிக கோல்கள் அடித்த வீரர் என்ற புதிய உலக சாதனையை பிரான்ஸ் அணியின் நட்சத்திர வீரர் கிலியன் எம்பாப்பே படைத்துள்ளார்.

அமெரிக்காவின் மியாமி நகரில் சனிக்கிழமை நடைபெற்ற இங்கிலாந்துக்கு எதிரான 3வது இடத்திற்கான போட்டியில் பிரான்ஸ் அணி 4-6 என்ற கணக்கில் தோல்வியடைந்தது. இப்போட்டியில் 2 கோல்கள் அடித்ததன் மூலம், உலகக் கோப்பையில் எம்பாப்பேயின் ஒட்டுமொத்த கோல்களின் எண்ணிக்கை 22 ஆக உயர்ந்தது. இதன் மூலம் 21 உலகக் கோப்பை கோல்கள் அடித்திருந்த லியோனல் மெஸ்ஸியின் சாதனையை எம்பாப்பே முறியடித்தார்.

2026 உலகக் கோப்பையில் எம்பாப்பே 10 கோல்களை அடித்து தங்கக் காலணி பந்தயத்தில் முதல் இடத்தில் இருக்கிறார். 8 கோல்களுடன் இருக்கும் மெஸ்ஸியை விட 2 கோல்கள் அதிகமாக அடித்து முன்னிலையில் உள்ளார் எம்பாப்பே. ஸ்பெயின் - அர்ஜென்டினா இறுதிப் போட்டியில் மெஸ்ஸி கூடுதல் கோல் அடிக்காவிட்டால், எம்பாப்பே முதலிடத்தைத் தக்கவைத்துக் கொள்ள முடியும். அது நடந்தால், எம்பாப்பே உலகக் கோப்பை வரலாற்றில் இரண்டு முறை தங்கக் காலணி விருதை வென்ற முதல் வீரர் என்ற பெருமையைப் பெறுவார்.

தனது சாதனை குறித்துப் பேசிய எம்பாப்பே, "உலகக் கோப்பை வரலாற்றில் அதிக கோல்கள் அடித்த வீரராக மாறுவதை விட, ஞாயிற்றுக்கிழமை நடைபெறும் இறுதிப்போட்டியில் விளையாடுவதையே நான் அதிகம் விரும்பியிருப்பேன்" என்று வேதனையுடன் கூறினார். இங்கிலாந்து அணிக்கு எதிரான மூன்றாவது இடத்துக்கான போட்டியிலும் பிரான்ஸ் அணி தோல்வி அடைந்தது மேலும் பின்னடைவாக அமைந்தது.

10 கோல்கள்.. மிரள வைத்த இங்கிலாந்து - பிரான்ஸ் உலகக்கோப்பை போட்டி.. இப்படி நடந்ததே இல்லை

இப்போட்டியுடன் பிரான்ஸ் அணியின் தலைமை பயிற்சியாளர் திதியர் தெஷாம்ஸின் 14 ஆண்டுகால சகாப்தம் முடிவுக்கு வந்தது. அவருக்குப் பதிலாக முன்னாள் பிரான்ஸ் வீரரும், ஜாம்பவானுமான ஜினெடின் ஜிடேன் புதிய பயிற்சியாளராக நியமிக்கப்பட அதிக வாய்ப்புள்ளது.