FIFA உலககோப்பை 2026: பிரேசில் அணியின் இன்றைய ஆட்டத்தில் நெய்மர் விளையாடுவாரா? பயிற்சியாளர் அறிவிப்பு

நியூஜெர்சி: மொராக்கோவிற்கு எதிராக நடைபெறவுள்ள பிரேசிலின் பிஃபா உலகக் கோப்பை தொடக்க ஆட்டத்திலிருந்து நெய்மர் விளையாட மாட்டார் என்று அந்த அணியின் மேலாளர் கார்லோ அன்செலோட்டி தெரிவித்துள்ளார். நியூஜெர்சியில் உள்ள மெட்லைஃப் ஸ்டேடியத்தில் ஐந்து முறை உலக சாம்பியனான பிரேசில் அணி, ஆப்பிரிக்க சாம்பியனான மொராக்கோவை எதிர்கொள்கிறது.

நெய்மர் இன்னும் முழுமையான பயிற்சியை மேற்கொள்ளாததால், மொராக்கோவிற்கு எதிரான போட்டியில் அவர் விளையாட வாய்ப்பில்லை என்று கார்லோ அன்செலோட்டி அறிவித்துள்ளார்.பார்சிலோனா மற்றும் பிஎஸ்ஜி அணிகளின் முன்னாள் நட்சத்திர வீரரான நெய்மர், 2026 பிஃபா உலகக் கோப்பைக்கு முன்னதாக கால் பகுதியில் ஏற்பட்ட காயம் காரணமாக அவதிப்பட்டு வருகிறார்.

அவர் அடுத்த வாரம் முதல் அணியுடன் இணைந்து பயிற்சியைத் தொடங்குவார் என எதிர்பார்க்கப்படுகிறது. இதனால், ஜூன் 20 அன்று ஹைட்டிக்கு எதிரான பிரேசிலின் இரண்டாவது போட்டியில் இந்த 34 வயது வீரர் பங்கேற்பது சந்தேகமே. அதன் பின்னர், ஜூன் 24 அன்று நடைபெறும் தங்களது கடைசி குரூப் சுற்று போட்டியில் கார்லோ அன்செலோட்டியின் பிரேசில் அணி ஸ்காட்லாந்தை எதிர்கொள்கிறது.

IND vs AFG: ரோகித் சர்மா 2 மாபெரும் சாதனை.. காலிஸ் ரெக்கார்ட் முறியடிப்பு

நெய்மரை அணிக்கு தேர்வு செய்ததற்கு அவரது அனுபவமும், இளம் வீரர்களை வழிநடத்தும் அவரது திறமையும்தான் முக்கிய காரணம் என்று கார்லோ அன்செலோட்டி கூறியுள்ளார். ரியல் மாட்ரிட் மற்றும் செல்சியா அணிகளின் முன்னாள் மேலாளரான அன்செலோட்டி அளித்த நேர்காணலில் , "நெய்மர் விரைவில் குணமடைவதற்காக மிகவும் கடினமாக உழைத்து வருகிறார். அவர் குணமடைந்து அடுத்த, வாரம் அணியுடன் இணைவார் என்று எதிர்பார்க்கப்படுகிறது."

"நாங்கள் நெய்மரை அணிக்கு அழைக்கும் போது, விவாதத்திற்கு அப்பாற்பட்ட அவரது தொழில்நுட்பத் திறனுக்காக மட்டும் அழைக்கவில்லை. மாறாக அவரது அனுபவத்திற்காகவும், இந்த அணியில் உள்ள இளம் வீரர்களுக்கு அவர் முன்மாதிரியாக இருக்க முடியும் என்பதற்காகவும்தான் அழைக்கிறோம்" என்று தெரிவித்தார்.

கடந்த 2023 அக்டோபரில் உருகுவேவுக்கு எதிரான போட்டியில் பிரேசில் 2-0 என்ற கணக்கில் தோல்வியடைந்தபோதுதான் நெய்மர் கடைசியாக பிரேசில் ஜெர்சியில் விளையாடினார். தற்போது தனது சிறுவயது கிளப்பான சாண்டோஸ் அணிக்காக விளையாடி வரும் இந்த நட்சத்திர வீரர், கடந்த சில சீசன்களாக தொடர்ந்து காயம் காரணமாக அவதிப்பட்டு வருகிறார். முன்னாள் பார்சிலோனா முன்கள வீரரான இவர், 128 சர்வதேச போட்டிகளில் விளையாடி பிரேசில் வரலாற்றில் அதிக போட்டிகளில் பங்கேற்ற இரண்டாவது வீரராக உள்ளார். மேலும், 79 சர்வதேச கோல்களுடன் பிரேசில் நாட்டின் வரலாற்றில் மிகச்சிறந்த முன்னணி கோல் அடித்த வீரராகவும் அவர் திகழ்கிறார்.

2026 பிஃபா உலகக் கோப்பையில் பிரேசில் அணியில் நெய்மர் மிக முக்கிய பங்கு வகிப்பார் என்று முன்னாள் பிரேசில் நட்சத்திர வீரர் காகா ஆதரவு தெரிவித்துள்ளார். நெய்மர் கடைசியாக 2023-ல் தேசிய அணிக்காக விளையாடிய நிலையில், அன்செலோட்டி அவரை 26 பேர் கொண்ட அணியில் சேர்த்தது சிலருக்கு ஆச்சரியத்தை ஏற்படுத்தியது.

2002-ல் பிரேசிலுடன் உலகக் கோப்பையை வென்ற காகா, தனது முன்னாள் சக வீரரை அணியில் சேர்க்க எடுத்த அன்செலோட்டியின் முடிவை வரவேற்றுள்ளார். ஏசி மிலன் மற்றும் ரியல் மாட்ரிட் கிளப்களின் முன்னாள் மிட்ஃபீல்டரான காகா, நெய்மரின் அனுபவமும், இளம் வீரர்களுக்கு அவர் செய்யக்கூடிய உதவிகளும் அணிக்கு விலைமதிப்பற்ற நன்மைகளைத் தரும் என்று உறுதியாகக் கூறியுள்ளார்.

இதுகுறித்து பேசிய காகா "எனக்கு நெய்மரை மிகவும் பிடிக்கும். நாங்கள் இருவரும் தேசிய அணியில் ஒன்றாக விளையாடியுள்ளோம், நாங்கள் நல்ல நண்பர்கள். அவர் முழு உடற்தகுதியுடன் தயாராக இருக்கும்பட்சத்தில், பிரேசில் அணிக்கு அவர் மிகவும் முக்கியமானவராக இருப்பார் என்று நான் நினைக்கிறேன். அவர் எப்போதும் அணிக்கு ஆதரவாக இருப்பார், இளம் வீரர்களுக்கு உதவ முயற்சிப்பார் மற்றும் சிறந்த சக வீரராக செயல்படுவார்."

IND vs AFG: ஆப்கான் பந்துவீச்சை சிதறடித்த கில்-ராகுல் கூட்டணி: இந்தியா அபார வெற்றி!

"அவர் இப்போது தனது பொறுப்பை புரிந்து கொண்டுள்ளார். இது முன்பு இருந்ததை விட முற்றிலும் வேறுபட்டது, இப்போது அவர் மிகவும் முதிர்ச்சியடைந்துள்ளார். சில நேரங்களில், மைதானத்தில் அவர்கள் மகிழ்ச்சியாக விளையாடுவதைப் பார்ப்பதே நமக்கு மகிழ்ச்சி அளிக்கிறது." நெய்மரின் ஆரம்பகால சர்வதேச வாழ்க்கையில், காகா மற்றும் நெய்மர் இருவரும் பிரேசில் அணிக்காக எட்டு முறை ஒன்றாக களம் கண்டுள்ளனர். அவர்கள் இருவரும் இணைந்து பிரேசில் அணிக்காக இரண்டு கோல்களை உருவாக்க உதவியுள்ளனர் மற்றும் தங்களுக்குள் மிகச் சிறந்த நட்புறவைக் கொண்டுள்ளனர்.