யூரோ கோப்பை கால்பந்து : விறுவிறுப்பான போட்டியில் ஸ்வீடனை வீழ்த்தி அசத்தியது உக்ரைன்

கிவ்: 14-வது யூரோ கோப்பை கால்பந்து தொடரின் லீக் ஆட்டத்தில் ஸ்வீடனை 2-1 என்ற கோல் கணக்கில் உக்ரைன் வீழ்த்தியுள்ளது.

யூரோ கோப்பை கால்பந்து போட்டிகளை போலந்தும், உக்ரைனும் இணைந்து நடத்துகின்ற. இந்தப் போட்டியில் பங்கேற்றுள்ள 16 அணிகள் 4 பிரிவாக பிரிக்கப்பட்டுள்ளன.

உக்ரைன் நாட்டின் கிவ் கால்பந்து மைதானத்தில் நடைபெற்ற லீக் போட்டியில் உக்ரைனும் ஸ்வீடனும் மோதின. ஆட்டத்தின் முதல் பாதியில் இரண்டு அணி வீரர்களும் கோல் அடிக்க படாதபாடு பட்டனர். ஆனால் அவர்களின் முயற்சி தோல்வியிலேயே முடிந்தது.

ஆட்டத்தின் 2-வது பாதியில் உக்ரைன் அணி வீரர் ஷெவ்சென்கோ அதிரடியாக 2 கோல்களை போட்டு அசத்தினார். ஸ்வீடன் அணியோ ஒரே ஒரு கோல்தான் அடித்தது. கடைசிவரை போராடிய ஸ்வீடனின் முயற்சி பலனளிக்கவில்லை.

இதனால் உக்ரைன் அணி 2-1 என்ற கோல்கணக்கில் வென்றது. நடப்பு யூரோ கால்பந்து தொடரில் டி பிரிவில் உக்ரைன் அணி முதலிடத்தைப் பெற்றுள்ளது.

கடந்த வாரம் புட் பாய்சனால் பாதிக்கப்பட்ட உக்ரைன் வீரர்கள் சொதப்பிவிடுவார்களோ என்றும் கூறப்பட்டு வந்தது. ஆனால் அதை பொய்யாக்கிவிட்டனர்.