2026 FIFA உலகக் கோப்பை: ஆஸ்திரேலியாவை வீழ்த்தி அடுத்த சுற்றுக்கு அதிரடியாக முன்னேறிய அமெரிக்கா!

வாஷிங்டன்: 2026 ஃபிஃபா உலகக் கோப்பை குரூப் டி பிரிவில் வெள்ளிக்கிழமை நடைபெற்ற ஆட்டத்தில் ஆஸ்திரேலியாவுக்கு எதிரான போட்டியில் அமெரிக்கா 2-0 என்ற கோல் கணக்கில் அபார வெற்றி பெற்று அடுத்த சுற்றுக்கு முன்னேறியுள்ளது. தொடக்கத்திலேயே கிடைத்த ஒரு 'ஓன் கோல்’ மற்றும் அலெக்ஸ் ஃப்ரீமேனின் சிறப்பான ஹெட்டர் கோல் ஆகியவை இணைந்து, அமெரிக்காவிற்கு இந்த வெற்றியைத் தேடித்தந்தன.

பராகுவேவுக்கு எதிரான போட்டியில் 4-1 என வென்றதைப் போலவே, அமெரிக்கா இப்போட்டியிலும் எதிரணியை ஓன் கோல் போட கட்டாயப்படுத்தியது. இம்முறை ஆஸ்திரேலிய பின்கள வீரர் கேமரூன் பர்கெஸ் துரதிர்ஷ்டவசமாக ஓன் கோல் அடித்தார்.

முதல் பாதி ஆட்டம் முடிவடைவதற்கு சற்று முன்பாக, ஃப்ரீமேன் பந்தை தலையால் முட்டி கோல் அடித்தார். இந்த கோல் முதலில் ஆஃப்சைடு (offside) என அறிவிக்கப்பட்டாலும், பின்னர் மறுஆய்வுக்குப் (review) பிறகு கோல் என உறுதி செய்யப்பட்டது. இதனால் மகிழ்ச்சியடைந்த அமெரிக்க அணியின் மாற்று வீரர்கள் மைதானத்திற்குள் நுழைந்து தங்களது கொண்டாட்டத்தை வெளிப்படுத்தினர்.

துருக்கிக்கு எதிரான போட்டியில் ஆஸ்திரேலியா 2-0 என வென்றபோது கோல் அடித்த நெஸ்டோரி இரான்குண்டா மற்றும் கானர் மெட்காஃப் ஆகிய இருவரையும் ஆஸ்திரேலிய பயிற்சியாளர் டோனி போபோவிக் இப்போட்டியின் தொடக்க ஆட்டக்காரர்களாக களம் இறக்கவில்லை. பின்னர் ஆட்டத்தின் போக்கை மாற்ற அவர்களை இரண்டாம் பாதியில் மாற்று வீரர்களாக களம் இறக்கினார். ஆனால், இரண்டாம் பாதியில் ஆட்டம் மிகவும் முரட்டுத்தனமாகவும், தரம் குறைந்ததாகவும் மாறியதால், அவர்களால் ஆட்டத்திற்குள் மீண்டும் வர இயலவில்லை.

இந்த வெற்றியின் மூலம் அமெரிக்கா 6 புள்ளிகளுடன் அடுத்த 32 அணிகள் சுற்றுக்கு முன்னேறியுள்ளது. லாஸ் ஏஞ்சல்ஸ் நகரில் வரும் வியாழக்கிழமை துருக்கிக்கு எதிரான தங்களது கடைசி லீக் ஆட்டத்தில் அமெரிக்கா விளையாடவுள்ளது. துருக்கி அணி பராகுவேவை வீழ்த்தத் தவறினால், அமெரிக்கா குரூப் டி பிரிவில் முதலிடத்தைப் பிடிக்கும். ஆஸ்திரேலியா 3 புள்ளிகளுடன் இரண்டாவது இடத்தில் நீடிக்கிறது. அடுத்த போட்டியில் சான் பிரான்சிஸ்கோவில் அவர்கள் பராகுவேவை எதிர்கொள்கின்றனர்.

அரங்கம் முழுக்க ரசிகர்கள் நிறைந்திருந்த சூழலில் அமெரிக்கா சற்று பதற்றத்துடன் ஆட்டத்தைத் தொடங்கியது. ஆனால் விரைவில் தங்களது சிறப்பான ஆட்டத்தை வெளிப்படுத்தினர். குறிப்பாக வெஸ்டன் மெக்கின்னி மிகச் சிறந்த ஆட்டத்தை வெளிப்படுத்தினார். ஆட்டத்தின் 11-வது நிமிடத்திலேயே அமெரிக்கா முன்னிலை பெற்றது. காயமடைந்த கிறிஸ்டியன் புலிசிக்கிற்குப் பதிலாக களம் இறங்கிய ரிக்கார்டோ பெப்பியை நோக்கி ஃபோலரின் பலோகன் இடது புறத்தில் இருந்து பந்தை பாஸ் செய்ய முயன்றார்.

அதைத் தடுக்க முயன்ற ஆஸ்திரேலிய வீரர் பர்கெஸ் பந்தை தற்செயலாக தனது சொந்த கோல் போஸ்ட்டிற்குள் அனுப்பினார்.அமெரிக்காவின் ஆதிக்கத்தால் ஆஸ்திரேலிய அணி பந்தை தங்களது பாதியிலிருந்து வெளியே கொண்டு வர பெரிதும் திணறியது. முதல் பாதியின் இடைவெளிக்கு (hydration break) சற்று முன்பு மேத்யூ லெக்கியின் ஆபத்தான கிராஸ் பாஸை ஃப்ரீமேன் தடுத்ததே ஆஸ்திரேலியாவின் சிறந்த தருணமாக அமைந்தது.

ஆட்டத்தின் 43-வது நிமிடத்தில் அமெரிக்கா தங்களது இரண்டாவது கோலை பதிவு செய்தது. செர்ஜினோ டெஸ்ட்டை நோக்கி அடிக்கப்பட்ட ஒரு ஃபிரீ கிக் பந்தை அவர் கோல் நோக்கி அடிக்க முயன்றார். அது தடுக்கப்பட்டு காற்றில் மிதந்தது. அப்போது ஆஸ்திரேலிய கோல்கீப்பர் பேட்ரிக் பீச் கீழே விழுந்து கிடக்க, ஃப்ரீமேன் மிக எளிதாக பந்தை தலையால் முட்டி கோலாக மாற்றினார்.

இரண்டாவது பாதியில் பெரிய அளவிலான விறுவிறுப்பான சம்பவங்கள் ஏதும் நிகழவில்லை. அமெரிக்கா தனது முன்னிலையை தக்கவைத்துக் கொள்வதிலும், ஆற்றலை சேமிப்பதிலும் கவனம் செலுத்தியது. இருப்பினும், ஆட்டம் முடிவடைய 5 நிமிடங்கள் இருந்தபோது ஆஸ்திரேலியாவின் ஹாரி சௌட்டர் கோல் அடிப்பதற்கான ஒரு பொன்னான வாய்ப்பை தவறவிட்டார்.