கால்பந்து உலகக் கோப்பையில் இந்தியா விளையாடுமா.... 2026க்கு தயாராகுமா!

2026ல் விளையாட வாய்ப்பு

தற்போதைய நிலையில் 2026 உலகக் கோப்பையில் விளையாடும் வாய்ப்பு இந்தியாவுக்கு கிடைக்கலாம். ஆனால், அதற்கு மிகக் கடினமாக போராட வேண்டும். உலகத் தரவரிசையில் 173வது இடத்தில் இருந்த இந்தியா 97வது இடத்துக்கு முன்னேறியுள்ளது. இது நமது கால்பந்து அணி வேகமாக வளர்ந்து வருவதைக் காட்டியுள்ளது.

9 ஆசிய அணிகள்

இந்த உலகக் கோப்பையில் 32 அணிகள் பங்கேற்றன. 2022ல் கத்தாரில் நடக்கும் போட்டியிலும் 32 அணிகளே பங்கேற்கும். அதே நேரத்தில் 2026ல் அமெரிக்காவில் நடக்கும் உலகக் கோப்பையில் 48 அணிகள் பங்கேற்க உள்ளன. தற்போது ஆசியா கூட்டமைப்பில் இருந்து 5 அல்லது 6 அணிகளுக்கு உலகக் கோப்பை வாய்ப்பு கிடைக்கிறது. 2026ல் அது 8 அல்லது 9ஆக உயரும்.

இந்தியாவுக்கு முதல் வெற்றி

ஃபிபாவின் ஆசிய கால்பந்து கூட்டமைப்பு நடத்தும் ஆசியப் போட்டிகளில் விளையாடி வெல்லும் அணிகளுக்கு உலகக் கோப்பை போட்டிக்கு நுழைவதற்கான வாய்ப்பு கிடைக்கும். 2019 ஜனவரியில் நடக்கும் ஆசியக் கோப்பை போட்டியில் விளையாடுவதற்கு இந்தியா தற்போது தகுதி பெற்றுள்ளது.

தீவிர பயிற்சி தேவை

கிரிக்கெட்டுக்கு அளிக்கப்படும் முக்கியத்துவத்தில் ஒரு சிறு பகுதியை கால்பந்துக்கு காட்டினால், அது வீரர்களுக்கு மிகப் பெரிய ஊக்கமாக அமையும். இளைஞர்களுக்கும் அதில் ஆர்வம் ஏற்படும். 2026 உலகக் கோப்பையில் விளையாடும் இலக்கோடு, அதிக நாடுகளுடன், அதிலும் வலுவான நாடுகளுடன் நட்பு போட்டிகளில் விளையாடி பயிற்சி பெற வேண்டும். இதையெல்லாம் விட, ரசிகர்களின் ஆதரவு மிக முக்கியம். செய்வோமா!