புரோ கபடி லீக்.. கடைசி 10 நிமிடம்.. கெத்து காட்டிய அங்கித்.. டெல்லி அணியை கதறவிட்ட மாற்று வீரர்

ஜெய்ப்பூர்: 2025 புரோ கபடி லீக் தொடரில் ஜெய்ப்பூரில் நடைபெற்ற போட்டியில், தபாங் டெல்லி அணியின் வெற்றிப் பயணத்திற்கு, பாட்னா பைரேட்ஸ் முற்றுப்புள்ளி வைத்துள்ளது. போட்டியின் கடைசி பத்து நிமிடங்களில் அரங்கேறிய ஒரு நம்பமுடியாத சம்பவம், கபடி ரசிகர்களை இருக்கையின் நுனிக்கே கொண்டு வந்தது. இந்தப் போட்டியில் ஒரு மாற்று வீரராகக் களமிறங்கி, 12 ரெய்டு புள்ளிகளைக் குவித்து, ஆட்டத்தின் போக்கையே மாற்றியமைத்தார் அங்கித் ராணா.

இந்தப் போட்டியின் தொடக்கம், தபாங் டெல்லிக்கு சாதகமாகவே அமைந்தது. நீரஜ் நர்வால் மற்றும் அஜிங்க்யா பவார் ஆகியோரின் சிறப்பான ரெய்டுகளால், டெல்லி அணி ஆரம்பத்திலேயே முன்னிலை பெற்றது. குறிப்பாக, நீரஜ் நர்வால்-இன் தந்திரமான ரெய்டுகளும், 'டூ-ஆர்-டை' ரெய்டுகளில் அஜிங்க்யா பவார் பெற்ற புள்ளிகளும், பாட்னா அணிக்கு பெரும் தலைவலியாக அமைந்தன.

ஃபஸல் அத்ராச்சலி மற்றும் சௌரப் நந்தல் ஆகியோரின் பலமான தடுப்பாட்டமும் சேர, பாட்னா ரெய்டர்களால் எளிதில் புள்ளிகளைப் பெற முடியவில்லை. முதல் பத்து நிமிட முடிவில், டெல்லி அணி நான்கு புள்ளிகள் முன்னிலையுடன் ஆட்டத்தை முழுமையாகத் தனது கட்டுப்பாட்டில் வைத்திருந்தது. முதல் பாதியின் இறுதிக் கட்டத்தில், பாட்னா அணியை 'ஆல்-அவுட்' செய்து, 19-10 என்ற வலுவான முன்னிலையுடன் டெல்லி அணி இரண்டாவது பாதிக்குச் சென்றது. அதனால் இந்தப் போட்டி டெல்லி அணிக்கு சாதகமாக முடியும் என்று அனைவரும் கணித்தனர்.

ஆனால், மூன்று முறை சாம்பியனான பாட்னா பைரேட்ஸ், இரண்டாவது பாதியில் ஒரு புதிய உத்வேகத்துடன் களமிறங்கியது. குறிப்பாக, மூன்றாவது கால் பகுதியில் அவர்களின் போராட்ட குணம் வெளிப்பட்டது. ரெய்டில் அயன் புள்ளிகளைக் கொண்டுவர, மாற்று வீரராகக் களமிறங்கிய அங்கித் ராணா, டெல்லியின் அனுபவமிக்க தடுப்பாட்ட வீரர்களுக்கு எதிராக அடுத்தடுத்து புள்ளிகளைக் குவித்து, ஆட்டத்தில் ஒரு புதிய திருப்புமுனையை ஏற்படுத்தினார்.

போட்டியின் கடைசி பத்து நிமிடங்களில், பாட்னா பைரேட்ஸ் அணியின் ஆதிக்கமே அதிகம் இருந்தது. குறிப்பாக, 'இரண்டு அங்கித்கள்' - ரெய்டில் அங்கித் ராணா, தடுப்பாட்டத்தில் கேப்டன் அங்கித் ஜக்லான் - டெல்லி அணியை முற்றிலுமாக நிலைகுலையச் செய்தனர். அங்கித் ராணா, ஒரு புயலைப் போல டெல்லி எல்லைக்குள் புகுந்து, அடுத்தடுத்து புள்ளிகளைக் குவித்ததோடு, போட்டியின் தலையெழுத்தையே மாற்றியமைத்த ஒரு 'ஆல்-அவுட்'டையும் நிகழ்த்தினார்.

கடைசி பத்து நிமிடங்களில் மட்டும் பாட்னா அணி 16 புள்ளிகளைக் குவிக்க, டெல்லி அணியால் வெறும் 5 புள்ளிகளை மட்டுமே எடுக்க முடிந்தது. இறுதியில், 33-30 என்ற புள்ளிக்கணக்கில் பாட்னா பைரேட்ஸ் அணி, ஒரு திரில்லான வெற்றியைப் பதிவு செய்து, தபாங் டெல்லியின் வெற்றிப் பயணத்திற்கு முற்றுப்புள்ளி வைத்தது.