பாஞ்ச்குலா : புனேரி பல்தான் அணியை புரட்டி எடுத்த டெல்லி அணி 20 புள்ளிகள் வித்தியாசத்தில் அசத்தல் வெற்றி பெற்றது.
2019 புரோ கபடி லீக் தொடரின் லீக் சுற்றுப் போட்டிகள் பாஞ்ச்குலாவில் நடைபெற்று வருகிறது.
நேற்று நடந்த லீக் போட்டியில் புனேரி பல்தான் - டபாங் டெல்லி அணிகள் மோதின. டெல்லி அணியின் நவீன் குமார் தொடர்ந்து 17வது போட்டியாக பத்துக்கும் மேற்பட்ட முறை சூப்பர் 10 ரெய்டு புள்ளிகள் எடுத்து சாதனை புரிந்தார்.
புனேரி பல்தான் அணி இந்தப் போட்டியில் தோல்வி அடைந்து புரோ கபடி லீக் தொடரின் பிளே - ஆஃப் சுற்றுக்கு முன்னேறும் வாய்ப்பை நழுவ விட்டது.
இந்தப் போட்டியில் இரு அணிகளின் தடுப்பாட்டம் சுமாராகவே அமைந்தது. ஆனால், ரெய்டில் இரண்டு அணிகளும் புள்ளிகளை வாரிக் குவித்தன. ஆனால், டெல்லி அணி நான்கு முறை புனேவை ஆல் - அவுட் செய்தது. புனே அணி ஒருமுறை கூட டெல்லியை ஆல் - அவுட் செய்யவில்லை.
முதல் பாதியில் டெல்லி அணி 30 - 16 என்ற அளவில் முன்னிலையில் இருந்தது. இரண்டாம் பாதியில் புனேரி பல்தான் தன் போராட்டத்தை வெளிப்படுத்தியது. எனினும், நவீன் குமார் மின்னல் வேகத்தில் புள்ளிகளை வாரிக் குவிக்கவே டெல்லி அணி வெற்றி பெற்றது.
ஆட்ட நேர முடிவில் டபாங் டெல்லி அணி 60 - 40 என்ற புள்ளிக் கணக்கில் அபார வெற்றி பெற்றது. புள்ளிப் பட்டியலில் டெல்லி அணி முதல் இடத்தில் உள்ளது.