யாருப்பா நீ? ஒரே ரெய்டில் 6 பேர் காலி.. மிரள வைத்த அஜித்.. பெங்களூரு புல்ஸை வீழ்த்திய யு மும்பா

விசாகப்பட்டினம்: 2025 புரோ கபடி லீக் (PKL) தொடரில் விசாகப்பட்டினத்தில் உள்ள விஸ்வநாத் விளையாட்டு அரங்கில் வெள்ளிக்கிழமை நடைபெற்ற ஆட்டத்தில், யு மும்பா அணி பெங்களூரு புல்ஸ் அணியை 48-28 என்ற புள்ளிக் கணக்கில் வீழ்த்தி அபார வெற்றி பெற்றது.

இந்த ஆட்டத்தில் யு மும்பா அணியின் வெற்றிக்கு, அஜித் சவுகானின் அற்புதமான 'சூப்பர் 10' மற்றும் ஒரே ரெய்டில் ஆறு புள்ளிகளை அள்ளிய வரலாற்றுச் சிறப்புமிக்க ஆட்டமே முக்கிய காரணமாக அமைந்தது.

இந்த ஆட்டத்தின் தொடக்கம் முதலே யு மும்பா அணி தனது ஆதிக்கத்தை நிலைநாட்டியது. முதல் சில நிமிடங்களிலேயே ஒரு வெற்றிகரமான ரெய்டு மற்றும் ஒரு டேக்கிள் மூலம் 2-0 என முன்னிலை பெற்றது. பெங்களூரு புல்ஸ் அணி ஆஷிஷ் மாலிக் மூலம் தங்களது கணக்கைத் தொடங்கி, ஸ்கோரை 3-3 என சமன் செய்தது.

ஆனாலும், அனிலின் சிறப்பான ரெய்டுக்குப் பிறகு யு மும்பா மீண்டும் முன்னிலை பெற்று, அதன்பின் ஆட்டத்தை முழுவதுமாக தங்கள் கட்டுப்பாட்டிற்குள் கொண்டு வந்தது. சீசன் 2-ன் சாம்பியனான யு மும்பா, ஒரு முழுமையான அணி முயற்சியால், முதல் டைம்-அவுட்டின்போது 13-5 என்ற வலுவான முன்னிலையைப் பெற்றது.

சீசனின் சிறந்த ரெய்டு: அஜித் சவுகானின் அசுர ஆட்டம்

ஆட்டத்தின் திருப்புமுனையாக, யு மும்பா வீரர் அஜித் சவுகானின் அசாத்தியமான சூப்பர் ரெய்டு அமைந்தது. ஒரே ரெய்டில் பெங்களூரு புல்ஸ் அணியின் யோகேஷ், ஆஷிஷ் மாலிக், தீரஜ், சத்யப்பா மட்டி, ஆகாஷ் ஷிண்டே மற்றும் தீபக் சங்கர் ஆகிய ஆறு வீரர்களை ஆட்டமிழக்கச் செய்து, ஆறு புள்ளிகளைத் தட்டிச் சென்றார்.

கபடி உலகில் மிகவும் அரிதான இந்த நிகழ்வு, இந்த சீசனின் சிறந்த ரெய்டாக கருதப்படுகிறது. இந்த அபாரமான ரெய்டைத் தொடர்ந்து, தனது சூப்பர் 10-ஐயும் நிறைவு செய்த அஜித், சாதனை நாயகன் பர்தீப் நர்வாலின் பழைய ஆட்டத்தை ரசிகர்களுக்கு நினைவூட்டினார்.

அஜித்தின் இந்த அசுர ஆட்டத்தால், பெங்களூரு புல்ஸ் அணி மீது அழுத்தம் அதிகரித்தது. விரைவில் அந்த அணியை இரண்டாவது முறையாக ஆல் அவுட் ஆக்கிய யு மும்பா, முதல் பாதி முடிவில் 29-12 என்ற மிகப்பெரிய முன்னிலையுடன் ஆட்டத்தை முழுமையாகக் கட்டுப்படுத்தியது.

இரண்டாம் பாதியிலும் தொடர்ந்த ஆதிக்கம்

இரண்டாம் பாதியிலும் யு மும்பாவின் ஆதிக்கமே தொடர்ந்தது. அஜித் சவுகானுக்குக் காயம் ஏற்பட்டபோதிலும், சதீஷ் கண்ணன் மற்றும் அனில் ஆகியோர் ரெய்டிங் பொறுப்பை ஏற்றுக்கொண்டு, தொடர்ந்து புள்ளிகளைக் குவித்தனர். அதே நேரத்தில், கேப்டன் சுனில் குமார் தலைமையிலான யு மும்பாவின் தடுப்பாட்டப் படை, பெங்களூரு புல்ஸ் அணியின் ரெய்டர்களுக்கு எந்த வாய்ப்பையும் வழங்கவில்லை.

யு மும்பாவின் தற்காப்பு வீரர்கள் பல சூப்பர் டேக்கிள்களை நிகழ்த்தி, புல்ஸ் அணிக்கு நெருக்கடி கொடுத்தனர். குறிப்பாக, இளம் வீரர் ரிங்கு, தனது அற்புதமான தடுப்பாட்டத்தால் 'ஹை ஃபைவ்' (5 டேக்கிள் புள்ளிகள்) பதிவு செய்து அசத்தினார். பெங்களூரு புல்ஸ் தரப்பில் ஆஷிஷ் மாலிக் மற்றும் அலிரேசா மிர்சாயியன் ஆகியோர் ஓரளவு தாக்குப்பிடிக்க முயன்றாலும், யு மும்பாவின் வலுவான ஆட்டத்திற்கு ஈடுகொடுக்க முடியவில்லை.

இறுதியில், யு மும்பா அணி 48-28 என்ற புள்ளிக்கணக்கில், 20 புள்ளிகள் வித்தியாசத்தில் பெங்களூரு புல்ஸை வீழ்த்தி, இந்த சீசனில் தங்களது பலத்தை மீண்டும் ஒருமுறை நிரூபித்தது. இந்த வெற்றியின் மூலம், புதன்கிழமை அடைந்த தோல்வியிலிருந்து மீண்டு வந்துள்ளது யு மும்பா. மறுபுறம், பெங்களூரு புல்ஸ் அணிக்கு இது தொடர்ச்சியான மூன்றாவது தோல்வியாகும்.