துப்பாக்கி சுடுதலில் இந்தியாவுக்கு வெள்ளி.. ஐஸ்வரி, நீரஜ், ருத்ராங்க்ஷ் அசத்தல் வெற்றி

நகோயா: ஜப்பானில் நடைபெற்று வரும் 2026 ஆசிய விளையாட்டுப் போட்டியில், துப்பாக்கி சுடுதல் களத்தில் இருந்து இந்தியாவுக்கு மேலும் ஒரு பதக்கம் கிடைத்துள்ளது. ஆண்களுக்கான 50 மீட்டர் ரைபிள் 3 பொசிஷன்ஸ் குழுப் பிரிவில் இந்திய அணி வெள்ளிப் பதக்கம் வென்று சாதனை படைத்துள்ளது. முன்னதாக சுருச்சி சிங் மற்றும் கமல்ஜீத் ஜோடி கலப்பு 10 மீட்டர் ரைபிள் பிரிவில் தங்கம் வென்று இருந்தனர். அதைத் தொடர்ந்து இந்த வெள்ளிப் பதக்கம் கிடைத்துள்ளது.

ஐஸ்வரி பிரதாப் சிங் தோமர், நீரஜ் குமார் மற்றும் ருத்ராங்க்ஷ் பாட்டீல் ஆகியோர் அடங்கிய இந்திய அணி மொத்தம் 1762 புள்ளிகள் குவித்து 2-வது இடத்தைப் பிடித்தது. சீன அணி 1766 புள்ளிகளுடன் தங்கப் பதக்கத்தைக் கைப்பற்றியது. சீன வீரர் ஜாங் சாங்ஹாங் 593 புள்ளிகள் குவித்து புதிய ஆசிய விளையாட்டு சாதனை படைத்தார்.

தகுதிச்சுற்றில் இந்திய வீரர்கள் நீண்ட நேரம் முதலிடத்தில் நீடித்து அசுர ஆதிக்கம் செலுத்தினர். எனினும் 'ஸ்டாண்டிங்' நிலையில் ருத்ராங்க்ஷ் பாட்டீலின் புள்ளிகள் சற்றே குறைந்ததால் இந்தியா தங்கத்தை நூலிழையில் தவறவிட்டு வெள்ளிப் பதக்கத்தை வசப்படுத்தியது.

குழுப் பிரிவில் வெள்ளி வென்றதோடு மட்டுமின்றி, தனிநபர் பிரிவிலும் இரு இந்திய வீரர்கள் இறுதிப்போட்டிக்கு தகுதி பெற்று அசத்தியுள்ளனர். ஐஸ்வரி பிரதாப் சிங் தோமர் 589 புள்ளிகளுடன் 3-வது இடத்தையும், நீரஜ் குமார் 588 புள்ளிகளுடன் 4-வது இடத்தையும் பிடித்து கம்பீரமாக இறுதிப்போட்டிக்கு முன்னேறினர். மற்றொரு இந்திய வீரரான ருத்ராங்க்ஷ் பாட்டீல் 585 புள்ளிகளுடன் 9-வது இடத்தைப் பிடித்தார்.

ஆண்களுக்கான 50 மீட்டர் ரைபிள் 3 பொசிஷன்ஸ் தனிநபர் பிரிவு இறுதிப்போட்டிக்கு ஐஸ்வரி பிரதாப் மற்றும் நீரஜ் குமார் என இரு இந்திய வீரர்கள் தகுதி பெற்றுள்ளனர்.