கொரியாவிடம் போராடி நழுவிய தங்கம்.. வில்வித்தையில் வெள்ளிப் பதக்கம் வென்ற இந்திய ஆடவர் ரீகர்வ் அணி

நகோயா: 2026 ஆசிய விளையாட்டுப் போட்டி வில்வித்தையில் ஆடவர் ரீகர்வ் அணிகள் பிரிவு இறுதிப்போட்டியில், இந்திய அணி வெள்ளிப் பதக்கம் வென்று சாதனை படைத்துள்ளது. ஒலிம்பிக் சாம்பியன்களைக் கொண்ட பலம் வாய்ந்த தென் கொரியாவிடம் 1-5 என்ற செட் கணக்கில் போராடி தோல்வியடைந்ததால் இந்தியாவிற்கு வெள்ளிப் பதக்கம் கிடைத்தது.

நகோயாவில் நடைபெற்ற தங்கப் பதக்கத்திற்கான இறுதி ஆட்டத்தில் இந்தியாவின் நீரஜ் சவுகான், யஷ்தீப் போகே மற்றும் தீரஜ் பொம்மதேவரா கூட்டணி, தென் கொரியாவின் நட்சத்திர வீரர்களான கிம் வூஜின், கிம் ஜே தியோக், லீ வூ சியோக் கூட்டணியை எதிர்கொண்டது.

தொடக்க செட்டிலிருந்தே இரு அணிகளும் சம பலத்துடன் மோதின. முதல் சுற்றில் இந்திய வீரர்கள் துல்லியமாக அம்புகளை எய்து 56 புள்ளிகளை குவித்தனர். கொரிய அணியும் 56 புள்ளிகள் எடுத்ததால் முதல் செட் 56-56 என சமநிலையானது (1-1).

2வது செட்டில் கொரிய வீரர்கள் அடுத்தடுத்து 10 புள்ளிகளை குவித்து 57 புள்ளிகளை எடுத்தனர். இந்திய வீரர்கள் 8 மற்றும் 9 புள்ளிகளையே எடுக்க முடிந்ததால் 50-57 என செட்டை இழந்தனர். இதனால் தென் கொரியா 3-1 என முன்னிலை பெற்றது.

3வது செட்டில் நழுவிய தங்கம்

தோல்வியைத் தவிர்க்க 3வது செட்டை வென்றே தீர வேண்டும் என்ற கட்டாயத்தில் இந்திய வீரர்கள் களமிறங்கினர். தொடக்கத்தில் நீரஜ் 10 புள்ளிகளையும், யஷ்தீப் மற்றும் தீரஜ் தலா 9 புள்ளிகளையும் எடுத்தனர். ஆனால் அழுத்தமான சூழலில் வீசப்பட்ட 4வது அம்பில் நீரஜ் 7 புள்ளிகள் மட்டுமே எடுத்தார்.

இதை தங்களுக்கு சாதகமாக பயன்படுத்திய தென் கொரிய வீரர்கள் 56 புள்ளிகளை குவித்து 3வது செட்டை 56-54 என்ற கணக்கில் தட்டிச் சென்றனர். இறுதியில் தென் கொரிய அணி 5-1 என்ற செட் கணக்கில் வெற்றி பெற்று தனது தங்கப் பதக்கத்தை தக்கவைத்துக் கொண்டது. இந்திய ஆடவர் அணி பெருமைமிக்க வெள்ளிப் பதக்கத்தை தனதாக்கியது.

குத்துச்சண்டையில் தங்கம் வென்ற இந்தியாவின் லவ்லினா போர்கோஹெய்ன்.. மேரி கோம் சாதனை சமன்

தீரஜ் பொம்மதேவராவுக்கு இரட்டை வெள்ளி

இந்திய வீரர் தீரஜ் பொம்மதேவராவுக்கு இது ஒரே நாளில் கிடைக்கும் 2வது வெள்ளிப் பதக்கமாகும். காலையில் நடைபெற்ற ரீகர்வ் கலப்பு இரட்டையர் பிரிவிலும் அவர் கும்கும்முடன் இணைந்து வெள்ளிப் பதக்கம் வென்றிருந்தார்.

முன்னதாக காலையில் இந்திய மகளிர் ரீகர்வ் அணி தென் கொரியாவை வீழ்த்தி வரலாற்று தங்கம் வென்றிருந்த நிலையில், ஆடவர் அணியும் வெள்ளிப் பதக்கம் வென்று நடப்பு ஆசிய விளையாட்டுப் போட்டியில் இந்திய வில்வித்தையின் புகழை உலக அரங்கில் உயர்த்தியுள்ளது.