காமன்வெல்த் போட்டி 2026: குத்துச்சண்டை பிரிவில் இந்தியாவுக்கு மேலும் 3 பதக்கம் உறுதி

கிளாஸ்கோ: காமன்வெல்த் விளையாட்டுப் போட்டிகளின் குத்துச்சண்டை பிரிவில், இந்தியாவின் பிரியா கங்காஸ் , பிரீதி பவார் மற்றும் ஜாதுமணி சிங் ஆகியோர் அரையிறுதிக்கு முன்னேறி குறைந்தது மூன்று வெண்கலப் பதக்கங்களை உறுதி செய்துள்ளனர். இப்போட்டியில், 60 கிலோ எடைப் பிரிவில் பிரியா கங்காஸ் அபாரமான ஆட்டத்தை வெளிப்படுத்தி உள்ளூர் வீராங்கனையான நியாப் மிட்செல்லை வீழ்த்தினார்.

அதே நேரத்தில், பர்வீன் ஹூடா மற்றும் கபில் போகாரியா ஆகியோர் தங்களது காலிறுதிப் போட்டிகளில் தோல்வியடைந்து தொடரிலிருந்து வெளியேறினர்.ஆசிய விளையாட்டுப் போட்டியில் தங்கம் வென்றவரான பிரியா, காலிறுதி ஆட்டத்தின் தொடக்கத்தில் சற்று தடுமாறினாலும், பின்னர் அதிரடியாக விளையாடி ஸ்காட்லாந்தின் நியாப் மிட்செல்லை 4-1 என்ற கணக்கில் வீழ்த்தினார்.

ஹரியானாவைச் சேர்ந்த 20 வயதான பிரியா, தனது எதிராளியை எதிர்கொண்டதோடு மட்டுமல்லாமல், ஸ்காட்லாந்து வீராங்கனைக்கு ஆதரவாக இருந்த உள்ளூர் ரசிகர்களின் பெரும் ஆரவாரத்தையும் கடந்து போராட வேண்டியிருந்தது. முதல் சுற்றில் ஐந்து நடுவர்களில் நான்கு பேர் மிட்செல்லுக்கு சாதகமாக புள்ளிகள் வழங்கியதால் பிரியா பின்தங்கினார்.

ஆனால், இரண்டாவது சுற்றில் தீவிரமாகத் தாக்கி விளையாடி ஸ்காட்லாந்து வீராங்கனையைத் திணறடித்தார். இச்சுற்றில் இரு வீராங்கனைகளுக்கும் புள்ளிகள் குறைக்கப்பட்டன. தலையை அடிக்கடி கீழே குனிந்ததற்காக பிரியாவிற்கு எச்சரிக்கை விடுக்கப்பட்டது, அதே நேரத்தில் மிட்செல் எதிராளியை அளவுக்கு அதிகமாக அரவணைத்துப் பிடித்தமைக்காக (clinching) ஒரு புள்ளியை இழந்தார்.

இறுதிச் சுற்றிலும் பிரியா தனது அதிரடி ஆட்டத்தைத் தொடர்ந்தார். துல்லியமான குத்துகளைச் செலுத்தி ஆட்டத்தை தன்வசப்படுத்தினார். இறுதியில், நடுவர்கள் 28-27, 28-27, 27-28, 28-27 மற்றும் 29-26 என்ற புள்ளிகள் கணக்கில் பிரியாவிற்கு சாதகமாக தீர்ப்பளித்தனர்.

ஆசிய விளையாட்டில் வெண்கலம் வென்ற பிரீதி பவார் 54 கிலோ எடை பிரிவில் வட அயர்லாந்தின் நிகோல் கிளைடை 5-0 என்ற கணக்கில் வீழ்த்தி ஒருதலைப்பட்சமான வெற்றியைப் பதிவு செய்தார். காமன்வெல்த் போட்டிக்கு முன்னதாக பெல்ஃபாஸ்டில் நடைபெற்ற பயிற்சி முகாமில் கிளைடுடன் பிரீதி பயிற்சி பெற்றிருந்தார். இருப்பினும், போட்டியில் இந்திய வீராங்கனையின் கை ஓங்கியிருந்தது.

எதிராளியை விட உயரம் குறைவாக இருந்தாலும், பிரீதி தனது வேகம், சுறுசுறுப்பான நகர்வுகள் மற்றும் துல்லியமான குத்துகளால் ஆட்டத்தைக் கட்டுப்படுத்தினார். கிளைடின் தடுப்பாட்டத்தை எளிதாகத் தகர்த்து அனைத்து சுற்றுகளிலும் அமோக வெற்றி பெற்றார்.

இந்த வெற்றியின் மூலம் பிரீதி தனது காமன்வெல்த் விளையாட்டு வரலாற்றில் முதல் பதக்கத்தை உறுதி செய்துள்ளார். அரையிறுதி ஆட்டத்தில் அவர் ஜாம்பியாவின் கேத்தரின் முவாபேயை எதிர்கொள்கிறார்.ஜாதுமணி சிங் 55 கிலோ எடை பிரிவில் ஜாம்பியாவின் மவெங்கோ முவாலேயை நடுவர்களின் ஒருமித்த முடிவின்படி வீழ்த்தி இந்தியாவின் பதக்க வாய்ப்பை உறுதி செய்தார்.

மணிப்பூரைச் சேர்ந்த இந்த இளம் வீரர், தொடக்கம் முதல் இறுதி வரை சாதுரியமான நகர்வுகள் மற்றும் துல்லியமான பதில் தாக்குதல்களுடன் ஆதிக்கம் செலுத்தினார். ஆட்டத்தின் வேகத்தை முழுமையாகத் தனது கட்டுப்பாட்டில் வைத்திருந்த அவர், 5-0 என்ற கணக்கில் எளிதான வெற்றியைப் பெற்று அரையிறுதிக்கு தகுதி பெற்றார்.

அதே நேரத்தில், காலிறுதிப் போட்டிகளில் இந்தியாவுக்கு இரண்டு பின்னடைவுகள் ஏற்பட்டன. பெண்களுக்கான 65 கிலோ எடைப்பிரிவில் பர்வீன் ஹூடா, இங்கிலாந்தின் சாஷா ஹிகியிடம் 2-3 என்ற கணக்கில் போராடித் தோல்வியடைந்தார். ஆண்களுக்கான 90 கிலோ எடைப்பிரிவில் கபில் போகாரியா, ஸ்காட்லாந்தின் ராபர்ட் மெக்னல்டியிடம் தோல்வியைத் தழுவினார். இதன் மூலம் இருவரது காமன்வெல்த் கனவும் முடிவுக்கு வந்தது.