கடைசி நிமிடத்தில் மிரட்டிய நீரஜ் சோப்ரா.. ஆனாலும் டைமண்ட் லீக் கோப்பையை வென்ற ஜெர்மனி வீரர்

சூரிச்: சுவிட்சர்லாந்தின் சூரிச் நகரில் நடைபெற்ற 2025 டைமண்ட் லீக் இறுதிப் போட்டியில், இந்திய ஈட்டி எறிதல் வீரர் நீரஜ் சோப்ரா கடைசி நேரத்தில் போராடி இரண்டாவது இடத்தைப் பிடித்தார். ஜெர்மனி வீரர் ஜூலியன் வெபர், யாரும் எதிர்பாராத வகையில் அபாரமாகச் செயல்பட்டு டைமண்ட் லீக் கோப்பையைத் தட்டிச் சென்றார்.

உலக சாம்பியனான நீரஜ் சோப்ராவுக்கு இந்தப் போட்டி சவால்கள் நிறைந்ததாகவே இருந்தது. மறுபுறம், ஜெர்மனியின் ஜூலியன் வெபர் தொடக்கம் முதலே அனல் பறக்கவைத்தார். தனது முதல் முயற்சியிலேயே 91.37 மீட்டர் தூரம் ஈட்டி எறிந்து அனைவரையும் ஆச்சரியத்தில் ஆழ்த்திய அவர், அடுத்த முயற்சியில் 91.51 மீட்டர் தூரம் எறிந்து இந்த ஆண்டுக்கான உலக அரங்கில் புதிய சாதனையைப் படைத்தார். 91 மீட்டரை இரண்டு முறை தாண்டிய வெபரின் ஆதிக்கம், மற்ற வீரர்களுக்கு பெரும் அழுத்தத்தை உருவாக்கியது.

நீரஜ் சோப்ரா ஃபார்ம் அவுட்?

தொடக்கத்தில் சற்று தடுமாறிய நீரஜ் சோப்ரா, முதல் முயற்சியில் 84.35 மீட்டர் தூரம் எறிந்து மூன்றாவது இடத்தில் இருந்தார். அடுத்தடுத்த சுற்றுகளில் அவரால் தனது சிறப்பான ஆட்டத்தை வெளிப்படுத்த முடியவில்லை; தொடர்ந்து மூன்று முறை ஃபவுல் செய்தார். இதனால், அவர் முதல் இரண்டு இடங்களைப் பிடிப்பது சந்தேகமானது. ஒரு கட்டத்தில், 2021 டோக்கியோ ஒலிம்பிக்கிற்குப் பிறகு முதல் முறையாக முதல் இரண்டு இடங்களை விட்டு வெளியேறும் அபாயம் அவருக்கு ஏற்பட்டது.

ஆனால், தனது கடைசி மற்றும் ஆறாவது வாய்ப்பில், நீரஜ் சோப்ரா மீண்டும் தன் திறமையை நிரூபித்தார். மிகச் சரியாக 85.01 மீட்டர் தூரம் ஈட்டி எறிந்து, டிரினிடாட் மற்றும் டோபாகோவின் கெஷார்ன் வால்காட்டை (84.95 மீ) நூலிழையில் பின்னுக்குத் தள்ளி இரண்டாவது இடத்தைக் கைப்பற்றினார். இதன்மூலம், கடந்த நான்கு ஆண்டுகளாக முதல் இரண்டு இடங்களுக்குள் வரும் தனது சாதனையைத் தக்கவைத்துக்கொண்டார்.

இறுதியில், ஜூலியன் வெபர் தனது அபாரமான செயல்பாட்டால் டைமண்ட் லீக் கோப்பையை வென்றார். நீரஜ் சோப்ரா இரண்டாவது இடத்தையும், கெஷார்ன் வால்காட் மூன்றாவது இடத்தையும் பிடித்தனர். அடுத்த மாதம் நடைபெறவுள்ள உலக சாம்பியன்ஷிப் போட்டிக்கு முன்னதாக, வெபரின் இந்த வெற்றி, நீரஜ் சோப்ராவுக்குப் புதிய சவாலை உருவாக்கியுள்ளது.

டோக்கியோவில் நடக்கவிருக்கும் உலக சாம்பியன்ஷிப் போட்டியில், பாகிஸ்தானின் அர்ஷத் நதீம், ஜெர்மனியின் ஜூலியன் வெபர் என பலமான வீரர்கள் களமிறங்குவதால், அங்கு நீரஜ் சோப்ரா மீண்டும் தன் முழுத் திறமையையும் வெளிப்படுத்த வேண்டிய கட்டாயத்தில் இருக்கிறார்.