சீனாவை 5-1 என துவம்சம் செய்த இந்தியா.. ஆசிய பாரா வில்வித்தையில் ஹர்விந்தர் ஜோடிக்கு 22-வது தங்கம்

நகோயா: ஜப்பான் நாட்டின் நகோயா நகரில் மிகச் நடைபெற்று வரும் 2026 ஆசிய பாரா விளையாட்டுப் போட்டியில், இந்தியா தனது 22-வது தங்கப் பதக்கத்தை வென்று பிரம்மாண்ட சாதனை படைத்துள்ளது. ஆண்களுக்கான பாரா ரீகர்வ் இரட்டையர் பிரிவு இறுதி ஆட்டத்தில், இந்தியாவின் முன்னணி நட்சத்திர வில்வித்தை வீரர்களான ஹர்விந்தர் சிங் மற்றும் சுந்தீப் விஜய் கூட்டணி, பலம் வாய்ந்த சீன ஜோடியை 5-1 என்ற செட் புள்ளிகள் கணக்கில் வீழ்த்தி தங்கப் பதக்கத்தைத் தட்டிச் சென்றது. சர்வதேச அரங்கில் இந்தியாவின் ஆதிக்கத்தை பறைசாற்றும் வகையில் இந்த வெற்றி அமைந்துள்ளது.

உச்சக்கட்ட எதிர்பார்ப்புகளுக்கு மத்தியில் அரங்கேறிய இந்த இறுதிப் போட்டியில், சீனாவின் டுவோ யுன் மற்றும் லிக்சூ ஜாவ் ஜோடியை இந்திய வீரர்கள் தொடக்கம் முதலே நிலைகுலைய வைத்தனர். நெருக்கடியான நேரத்திலும் பதற்றமடையாமல் துல்லியமாகக் குறிபார்த்து அம்புகளை எய்த ஹர்விந்தர் - சுந்தீப் கூட்டணி, சீன வீரர்களுக்கு எந்தவொரு வாய்ப்பையும் கொடுக்கவில்லை. அரையிறுதியில் அபாரமாக வென்ற இவர்கள், இறுதிப் போட்டியிலும் தங்களது அசாத்திய ஒருங்கிணைப்பை வெளிப்படுத்தி 5-1 என்ற புள்ளிக் கணக்கில் அதிகாரப்பூர்வமாக தங்கத்தை வென்றனர்.

ஹரியானாவைச் சேர்ந்த ஹர்விந்தர் சிங் ஏற்கனவே பாராலிம்பிக் போட்டிகளில் சரித்திரம் படைத்தவர். கடந்த 2020 டோக்கியோ பாராலிம்பிக்கில் வெண்கலமும், 2024 பாரிஸ் பாராலிம்பிக் போட்டியில் இந்திய வரலாற்றிலேயே வில்வித்தையில் முதல் தங்கப் பதக்கத்தையும் வென்று நாட்டுக்குப் பெருமை சேர்த்தவர். சிறு வயதில் கால்கள் பாதிக்கப்பட்ட போதிலும், தளராத மன உறுதியுடன் போராடி வரும் இவர், இளைய வீரரான சுந்தீப் விஜய்க்கு களத்தில் சிறந்த வழிகாட்டியாக இருந்து இந்த வரலாற்று வெற்றியை சாத்தியமாக்கியுள்ளார்.

நடப்பு ஆசிய பாரா தொடரில் வில்வித்தையில் இந்தியா தொடர்ந்து முத்திரை பதித்து வருகிறது. காம்பவுண்ட் பிரிவில் இளம் புயல் சீத்தல் தேவி இரட்டைத் தங்கம் வென்று அசத்திய நிலையில், தற்போது ஆண்களுக்கான ரீகர்வ் பிரிவிலும் இந்தியா தங்கத்தை அள்ளியுள்ளது. இந்த வரலாற்று வெற்றியின் மூலம் இந்தியாவின் ஒட்டுமொத்த தங்கப் பதக்க எண்ணிக்கை 22 ஆக எகிறியுள்ளது. சர்வதேச அரங்கில் சீனாவை அவர்களின் சொந்த பலமான விளையாட்டிலேயே வீழ்த்தி இந்திய வீரர்கள் சாதனை படைத்துள்ளது நாடு முழுவதும் பெரும் கொண்டாட்டத்தை ஏற்படுத்தியுள்ளது. பதக்கப் பட்டியலில் இந்தியா தொடர்ந்து முன்னேறி வருகிறது.

சர்வதேச டி20-யில் முதல் முறையாக தவறு செய்த புவனேஸ்வர் குமார்.. கம்பேக் மேட்சில் சாதனையுடன் சொதப்பல்