ஆசிய விளையாட்டு-சோம்தேவ், சனம் ஜோடி மூலம் 6வது தங்கம்

குவாங்ஷு: ஆசிய விளையாட்டு, இரட்டையர் டென்னிஸ் போட்டியில், இந்தியாவின் சோம்தேவ் தேவ்வர்மன்-சனம் சிங் ஜோடி அபாரமாக வென்று தங்கப் பதக்கத்தை தட்டிச்சென்றது. இது இந்தியாவுக்குக் கிடைத்துள்ள 6வது தங்கப் பதக்கமாகும்.

இன்று நடந்த ஆடவர் இரட்டையர் போட்டியில் சோம்தேவ் -சனம் சிங் ஜோடி சீனாவின் காங், லீ ஜோடியை 6-3, 6-7, 10-8 என்ற கணக்கில் டை பிரேக்கர் மூலம் வீழ்த்தி தங்கப் பதக்கத்தை தட்டிச் சென்றது.

அதேபோல கலப்பு இரட்டையர் இறுதிப் போட்டியில் இந்தியாவின் சானியா மிர்ஸா, விஷ்ணுவர்த்தன் ஜோடிக்கு வெள்ளிப் பதக்கம் கிடைத்தது. இறுதிப் போட்டியில், இந்திய ஜோடி 6-4, 1-6, 2-10 என்ற கணக்கில் தோல்வியுற்றது.

முன்னதாக இன்று காலை நடந்த ஆடவர் ஒற்றையர் இறுதிப் போட்டிக்கு சோம்தேவ் தகுதி பெற்றார். இதன் மூலம் அவருக்கு மேலும் ஒரு பதக்கம் உறுதியாகியுள்ளது.