மலேசியாவை கதறடித்த இந்தியா, பாகிஸ்தானுக்காக வெயிட்டிங்!

டாக்கா: ஆசியக் கோப்பை ஹாக்கியின் சூப்பர் 4 சுற்றில் 6-2 என்ற கோல் கணக்கில் மலேசியாவை கதறடித்த இந்தியா, நாளை நடக்கும் ஆட்டத்தில் பாகிஸ்தானுக்கு எதிராக தாராளமாக கோலடிக்கத் தயாராக உள்ளது.

ஆசியக் கோப்பை ஹாக்கிப் போட்டிகள் வங்கதேசத்தில் நடந்து வருகின்றன. ஏ பிரிவில் இடம்பெற்றிருந்த இந்தியா, லீக் ஆட்டங்களில் ஜப்பானை 5-1, வங்கதேசத்தை 7-0 என்ற கோல் கணக்கில் வென்றது.

பாகிஸ்தானுடன் 3-1 என்ற கோல் கணக்கில் வென்றது. மிகப் பெரிய கோல் கணக்கில் வெல்வதற்கு வாய்ப்பிருந்தும் இந்திய அணி தவறிவிட்டது.

தென் கொரியாவுடன் டிரா

இந்த நிலையில், அடுத்தகட்டமான சூப்பர் 4 சுற்றின் முதல் ஆட்டத்தில் தென் கொரியாவுடன் 1-1 என்று இந்தியா டிரா செய்தது.

மலேசியாவை அடித்து துவம்சம்

நேற்று இரவு நடந்த ஆட்டத்தில் மலேசியாவை 6-2 என்ற கோல் கணக்கில் அடித்து துவம்சம் செய்தது. இந்த ஆசியக் கோப்பை போட்டியில் தோல்வியடையாத அணியாக இந்தியா உள்ளது. நேற்று நடந்த மற்றொரு ஆட்டத்தில் தென் கொரியாவுடன் 1-1 என்று பாகிஸ்தான் டிரா செய்தது.

விட்ட குறை தொட்ட குறை

நாளை நடக்கும் ஆட்டத்தில் பாகிஸ்தானுடன் மீண்டும் மோதும் வாய்ப்பு இந்தியாவுக்கு கிடைத்துள்ளது. டிரா செய்தாலே, இறுதிப் போட்டிக்கு இந்தியா முன்னேறிவிடும்.