Laureus Awards 2026: விளையாட்டு உலகின் ஆஸ்காரான லாரஸ் விருதுகள்.. அல்காரஸ்க்கு மாபெரும் கவுரவம்

மாட்ரிட்: உலக விளையாட்டுத் துறையின் மிகப்பெரிய கௌரவமாகக் கருதப்படும் லாரஸ் விளையாட்டு விருதுகள் 2026, ஸ்பெயினின் மாட்ரிட்டில் கோலாகலமாக நடைபெற்றது. உலகின் தலைசிறந்த விளையாட்டு வீரர், வீராங்கனைகளை ஒரே இடத்தில் சங்கமித்த இந்த நிகழ்வில், பல்வேறு பிரிவுகளிலும் சிறந்து விளங்கிய சாதனையாளர்கள் கௌரவிக்கப்பட்டனர். டென்னிஸ் களத்தில் தங்கள் ஆதிக்கத்தைச் செலுத்திய கார்லோஸ் அல்காரஸ் மற்றும் ஆர்யனா சபலென்கா ஆகியோர் முக்கிய தனிநபர் விருதுகளை வென்றனர்.

வரலாற்றுச் சிறப்புமிக்க சீசனுக்குப் பிறகு பாரிஸ் செயின்ட்-ஜெர்மைன் அணி 'ஆண்டின் சிறந்த அணி'யாகப் பெயரிடப்பட்டது. ஃபார்முலா 1 சாம்பியன் லான்டோ நோரிஸ், கோல்ஃப் நட்சத்திரம் ரோரி மெக்ல்ராய் மற்றும் கால்பந்து இளம் மேதை லமின் யமால் உள்ளிட்டோர், பிரபலமான ஜாம்பவான்கள் மற்றும் வளர்ந்து வரும் திறமையாளர்கள் முக்கிய விருதுகளைப் பெற்றனர்.

லாரஸ் உலக விளையாட்டு விருதுகள் 2026: முழு வெற்றியாளர்கள் பட்டியல்

ஸ்பெயின் டென்னிஸ் வீரர் கார்லோஸ் அல்காரஸ் 'லாரஸ் உலகின் சிறந்த விளையாட்டு வீரர்' விருதை வென்றார். 'லாரஸ் உலகின் சிறந்த விளையாட்டு வீராங்கனை' விருது ஆர்யனா சபலென்காவுக்குக் கிடைத்தது. 'லாரஸ் உலகின் சிறந்த அணி' விருதை பாரிஸ் செயின்ட்-ஜெர்மைன் கிளப் தட்டிச் சென்றது.

'லாரஸ் உலகின் சிறந்த திருப்புமுனை வீரர்' விருதை லான்டோ நோரிஸ் பெற, 'லாரஸ் உலகின் சிறந்த கம்பேக் தந்த வீரர்' விருதை ரோரி மெக்ல்ராய் வென்றார். மாற்றுத் திறனாளிகளுக்கான ஆண்டின் சிறந்த விளையாட்டு வீரராக கேப்ரியல் அராஜோவும், ஆக்‌ஷன் விளையாட்டுப் பிரிவில் ஆண்டின் சிறந்த வீராங்கனையாக பனிச்சறுக்கு வீராங்கனை க்ளோ கிம்மும் தேர்வு செய்யப்பட்டனர்.

'ஆண்டின் சிறந்த இளம் விளையாட்டு வீரர்' விருதை கால்பந்து வீரர் லமின் யமால் பெற, டோனி க்ரோஸ் 'விளையாட்டு ஊக்கமளக்கும்' விருதை வென்றார். தன் வரலாற்றுச் சிறப்பு மிக்க ஒலிம்பிக் 'பெர்ஃபெக்ட் 10' சாதனையின் 50-வது ஆண்டை நிறைவு செய்த நாடியா கொமனேசிக்கு 'வாழ்நாள் சாதனையாளர்' விருது கிடைத்தது. 'விளையாட்டின் மூலம் சமூக மாற்றத்திற்கான' விருதை Fútbol Más அமைப்பு பெற்றது.

லாரஸ் உலகின் சிறந்த விளையாட்டு வீரர் விருதை வென்ற இளையவர் என்ற பெருமையைப் பெற்ற கார்லோஸ் அல்காரஸ், இந்த அங்கீகாரம் "நம்பமுடியாத கௌரவம்" என்று குறிப்பிட்டார். மேலும், "உலகின் தலைசிறந்த விளையாட்டு வீரர்களிடமிருந்து இந்த விருது கிடைத்தது தனக்கு மேலும் சிறப்பு" என்றும், லியோனல் மெஸ்ஸி, ரோஜர் பெடரர், ரஃபேல் நடால் போன்ற ஜாம்பவான்களைப் பின்பற்றி வருவது "மிகவும் சிறப்பான தருணம்" என்றும் அவர் தெரிவித்தார்.

உலகின் சிறந்த விளையாட்டு வீராங்கனையாகத் தேர்வு செய்யப்பட்ட ஆர்யனா சபலென்கா, இந்தச் சாதனையை "மிகவும் சிறப்பு வாய்ந்தது" என்று வர்ணித்தார். விளையாட்டுத் துறையின் ஜாம்பவான்களுடன் தனது பெயர் இடம்பெறுவது பிரமிப்பாக உணர்வதாக கூறினார். இந்த விருது வெறும் வெற்றிகளை மட்டுமின்றி, "கடினமான தருணங்கள், அழுத்தம், அணி, ஒவ்வொரு நாளின் உழைப்பு" ஆகியவற்றையும் எதிரொலிக்கிறது என்று தெரிவித்தார்.

'ஆண்டின் சிறந்த கம்பேக் தந்த வீரர்' விருதை வென்று, ஒரு கேரியர் கிராண்ட் ஸ்லாமை முடித்த ரோரி மெக்ல்ராய், இந்த கௌரவம் "தனக்கும், கோல்ஃப் விளையாட்டுக்கும் மிகப்பெரிய அங்கீகாரம்" என்று குறிப்பிட்டார். பின்னடைவுகளையும், சிறிய சறுக்கல்களையும் உள்ளடக்கிய தனது பயணம், இந்தச் சாதனையை இன்னும் அர்த்தமுள்ளதாக்கியது என்றும், அத்தகைய அனுபவங்கள் "பயணத்தின் ஒரு பெரிய பகுதி" என்றும் அவர் கூறினார்.

இந்தியப் பிரதிநிதித்துவம் இருந்ததா?

2026 லாரஸ் உலக விளையாட்டு விருதுகளில் இந்திய வீரர், வீராங்கனைகள் யாரும் வெற்றியாளர்கள் பட்டியலில் இடம்பெறவில்லை. இது இந்தியாவின் வளர்ந்து வரும் விளையாட்டுச் சூழலுக்கும், உலக அளவில் உள்ள விளையாட்டுகளின் தரத்திற்கும் உள்ள இடைவெளியை எடுத்துக்காட்டுகிறது. 'விளையாட்டின் ஆஸ்கார்' என்று அழைக்கப்படும் லாரஸ் விருதுகள், செயல்திறன் மட்டுமல்லாமல், சமூக தாக்கத்தையும், பாரம்பரியத்தையும் அங்கீகரிக்கின்றன.