காமன்வெல்த் சாம்பியன்ஷிப்பில் தங்கம்.. ஓராண்டுக்குப் பிறகு மீண்டு வந்த மீராபாய் சானு

டெல்லி: இந்தியாவின் நட்சத்திர பளுதூக்கும் வீராங்கனையான மீராபாய் சானு, ஓராண்டு கால காயத்திற்குப் பிறகு சர்வதேசப் போட்டிக்குத் திரும்பிய முதல் தொடரிலேயே தங்கப் பதக்கம் வென்று அசத்தியுள்ளார். காமன்வெல்த் பளுதூக்கும் சாம்பியன்ஷிப் போட்டியில் புதிய சாதனைகளை நிகழ்த்தியதோடு, அவர் தங்கம் வென்றார். இது இந்திய விளையாட்டு ரசிகர்களிடையே பெரும் மகிழ்ச்சியை ஏற்படுத்தியுள்ளது.

அகமதாபாத்தில் நடைபெற்ற காமன்வெல்த் சாம்பியன்ஷிப் தொடரின் மகளிர் 48 கிலோ எடைப் பிரிவில், டோக்கியோ ஒலிம்பிக் வெள்ளிப் பதக்க நாயகியான மீராபாய் சானு பங்கேற்றார். ஓராண்டு காயம் காரணமாக போட்டிகளில் பங்கேற்காமல் இருந்ததால், அவரது செயல்பாடு எப்படி இருக்கும் என்ற எதிர்பார்ப்பு நிலவியது.

சாதனைகளை முறியடித்த மீராபாய்:

அனைத்து சந்தேகங்களுக்கும் தனது அபாரமான செயல்பாட்டின் மூலம் பதிலளித்த சானு, ஸ்னாட்ச் பிரிவில் 84 கிலோவும், கிளீன் அண்ட் ஜெர்க் பிரிவில் 109 கிலோவும் என மொத்தம் 193 கிலோ எடையைத் தூக்கி தங்கப் பதக்கத்தைச் சூடினார். இது, காமன்வெல்த் சாம்பியன்ஷிப் வரலாற்றில் அனைத்துப் பிரிவுகளிலும் ஒரு புதிய சாதனையாகும். இதற்கு முந்தைய சாதனையை விட 14 கிலோ எடையை அவர் கூடுதலாகத் தூக்கி இந்த இமாலய சாதனையை நிகழ்த்தியுள்ளார்.

வெற்றிக்குப் பிறகு பேசிய மீராபாய் சானு, "ஒலிம்பிக்கிற்குப் பிறகு இது எனது முதல் சர்வதேசப் போட்டி என்பதால், இங்கு தங்கம் வென்றதில் நான் மிகவும் மகிழ்ச்சியடைகிறேன். இதே எடைப் பிரிவில் முன்பு போல சிறப்பாகச் செயல்பட முடியுமா என்ற சந்தேகம் எனக்கு இருந்தது, ஆனால் இப்போது நான் மகிழ்ச்சியாக இருக்கிறேன்" என்று நெகிழ்ச்சியுடன் குறிப்பிட்டார்.

சவால்களை வென்ற சாதனை:

இந்த வெற்றி மீராபாய் சானுவுக்கு எளிதாகக் கிடைத்துவிடவில்லை. ஸ்னாட்ச் பிரிவில் 84 கிலோவை தூக்கும் தனது முதல் முயற்சியில் அவர் தோல்வியடைந்தார். இருப்பினும், தனது இரண்டாவது முயற்சியில் அதே எடையை வெற்றிகரமாகத் தூக்கி சாதனை படைத்தார். கிளீன் அண்ட் ஜெர்க் பிரிவிலும் 109 கிலோ எடையைத் தூக்கி, 2017-ல் உலக சாம்பியன்ஷிப்பில் நிகழ்த்திய தனது தனிப்பட்ட சிறந்த சாதனையைச் சமன் செய்தார்.

இந்தியாவுக்கு மேலும் ஒரு தங்கம்:

ஆடவர் 60 கிலோ எடைப் பிரிவில், தேசிய விளையாட்டுப் போட்டிகளின் சாம்பியனான ரிஷிகாந்தா சிங், மொத்தம் 271 கிலோ எடையைத் தூக்கி தங்கப் பதக்கம் வென்று இந்தியாவுக்குப் பெருமை சேர்த்தார். இளையோர் பிரிவில் சௌம்யா தால்வியும் தங்கம் வென்றார்.