ரியோவில் இந்தியாவுக்கு முதல் பதக்கம்... மல்யுத்தத்தில் வெண்கலம் வென்றார் சாக்‌ஷி மாலிக்!

காலிறுதியில் தோல்வி...

ஒலிம்பிக் மகளிர் மல்யுத்தத்தின் 58 கிலோ எடை பிரீ ஸ்டைல் பிரிவில் காலிறுதியில் ரஷ்ய வீராங்கனை விளிரியா கொலாகோவா உடன் நடந்த போட்டியில் சாக்‌ஷி தோல்வியடைந்தார். இதனால் அவர் ரெபிசாஜ் சுற்றில் விளையாடினார்.

ரெபிசாஜ் சுற்று...

மங்கோலிய வீராங்கனை ஒர்ஹான் புர்வித்ஜ் உடன் நடந்த இப்போட்டியில் 12-3 என்ற புள்ளிக்கணக்கில் வெற்றி பெற்ற சாக்ஷி மாலிக், வெண்கலப் பதக்கத்திற்கான போட்டிக்கு தகுதி பெற்றார்.

வெற்றி...

அதன் தொடர்ச்சியாக கிர்கிஸ்தான் வீராங்கனை ஐசுலு டைனிபிகோவா உடன் மோதினார் சாக்‌ஷி. பரபரப்பாக நடைபெற்ற இப்போட்டியில் முதலில் 0-5 என பின் தங்கியிருந்த சாக்‌ஷி கடைசி நிமிடத்தில் ஆக்ரோஷமாக செயல்பட்டு அடுத்தடுத்து புள்ளிகள் பெற்றார். முடிவில் 8-5 என்ற புள்ளிக் கணக்கில் வெற்றி பெற்ற சாக்‌ஷி வெண்கலப் பதக்கம் வென்றார்.

முதல் பதக்கம்...

இது ரியோ ஒலிம்பிக்கில் இந்தியா வெல்லும் முதல் பதக்கம் ஆகும். அதோடு, இந்தியா சார்பில் மல்யுத்த போட்டியில் பதக்கம் பெற்ற முதல் வீராங்கனை என்ற பெருமையையும் இந்த வெற்றி மூலம் சாக்‌ஷி பெற்றுள்ளார்.