ஆஸ்திரேலிய ஓபன் 2026: நட்சத்திர டென்னிஸ் வீரர்கள் ஜோகோவிச், சின்னர் முன்னேற்றம்..4 மணி நேரம் போராடிய வாவ்ரிங்கா

மெல்போர்ன்: ஆஸ்திரேலிய ஓபன் டென்னிஸ் போட்டிகளில், ஜானிக் சின்னர், நோவக் ஜோகோவிச், இகா ஸ்வியாடெக், மற்றும் மெடிசன் கீஸ் ஆகியோர் அடுத்த சுற்றுக்கு வெற்றிகரமாக முன்னேறினர். எனினும், 25ஆம் நிலை வீராங்கனையான பவுலா படோசா, ரஷ்யாவின் ஒக்சானா செலக்மெடேவாவிடம் நேரடி செட்களில் அதிர்ச்சித் தோல்வியைச் சந்தித்து போட்டியில் இருந்து வெளியேறினார்.

மெல்போர்னில் நடைபெற்று வரும் இந்தப் போட்டியில், நடப்புச் சாம்பியன் ஜானிக் சின்னர், உள்ளூர் வீரர் ஜேம்ஸ் டக்வொர்த்தை 6-1, 6-4, 6-2 என்ற செட் கணக்கில் எளிதாக வீழ்த்தி, மூன்றாவது சுற்றுக்கு முன்னேறினார். இத்தாலிய வீரர் சின்னர் தனது மூன்றாவது ஆஸ்திரேலிய ஓபன் பட்டத்திற்கான வேட்டையைத் தொடரும் முனைப்பில் ஆதிக்கம் செலுத்தினார்.

நோவக் ஜோகோவிச்சும் தயவு தாட்சண்யமின்றி ஆடினார். 141ஆம் நிலை தகுதிச் சுற்று வீரர் பிரான்செஸ்கோ மாஸ்ட்ரெல்லியை 6-3, 6-2, 6-2 என்ற செட்களில் வீழ்த்தி, தனது 25வது கிராண்ட்ஸ்லாம் பட்டத்தை நோக்கிய பயணத்தைத் தொடர்ந்தார். அடுத்ததாக 3வது சுற்றில் ஜோகோவிச் டச்சு வீரர் போடிக் வான் டி சான்ட்ஷுல்பை எதிர்கொள்கிறார்.

பெண்கள் பிரிவில், நடப்புச் சாம்பியன் மெடிசன் கீஸ் திறமையுடன் பதற்றத்தையும் வெளிப்படுத்தினார். அமெரிக்க வீராங்கனையான ஆஷ்லின் க்ரூயருக்கு எதிரான முதல் செட்டை 6-1 என வென்றவர், இரண்டாவது செட்டில் 2-5 என பின்தங்கிய நிலையிலிருந்து மீண்டு வந்து 7-5 என்ற கணக்கில் வெற்றி பெற்று தனது பட்டத்தை தக்கவைக்கும் வாய்ப்பை உயிர்ப்புடன் வைத்திருக்கிறார்.

இரண்டாம் நிலை வீராங்கனை இகா ஸ்வியாடெக், மாரி பௌஸ்கோவாவை 6-2, 6-3 என்ற செட்களில் எளிதாக வென்றார். தனது முதல் ஆஸி. ஓபன் பட்டத்தை எதிர்நோக்கும் ஸ்வியாடெக், போட்டியில் எந்தச் சிரமமும் இல்லாமல் களமாடினார். அமெரிக்க வீராங்கனைகளான ஜெசிகா பெகுலா (6-0, 6-2) மற்றும் அமண்டா அனிசிமோவா (6-1, 6-4) ஆகியோரும் வெற்றி பெற்றனர்.

இருப்பினும், 25ஆம் நிலை வீராங்கனையான பவுலா படோசா, ரஷ்யாவின் ஒக்சானா செலக்மெடேவாவிடம் நேரடி சுற்றுகளில் தோல்வியடைந்து அதிர்ச்சி அளித்தார். நவோமி ஒசாகா, சோர்னா சிர்ஸ்டியாவை 6-3, 4-6, 5-2 என்ற செட்களில் போராடி வென்றார். ஆண்கள் பிரிவில், இத்தாலியின் லோரென்சோ முசெட்டி தனது சக நாட்டு வீரர் லோரென்சோ சோனேகோவை வீழ்த்தினார்.

பென் ஷெல்டன், டேனி ஸ்வீனியை எளிதாக வென்றார். கரண் கச்சனோவ் மற்றும் வளர்ந்து வரும் செக் வீரர் ஜகுப் மென்சிக் ஆகியோரும் அடுத்த சுற்றுக்குத் தகுதி பெற்றனர்.இதனிடையே, 40 வயதான ஸ்டான் வாவ்ரிங்கா, ஆர்தர் கியாவுக்கு எதிராக தனது அனுபவத்தைப் பறைசாற்றினார். நான்கு மணி நேரம் முப்பது நிமிடங்களுக்கும் மேலாக நீடித்த ஐந்து செட் பரபரப்பான போட்டியில் வெற்றி பெற்று, தனது மூன்றாவது சுற்று இடத்தை உறுதி செய்தார்.