ஆஸ்திரேலிய மண்ணில் டென்னிஸ் ஜாம்பவான் ஜோகோவிச் சதம்.. 2 சாதனை சமன்

மெல்போர்ன்: ஆஸ்திரேலிய ஓபன் டென்னிஸ் தொடரில் நட்சத்திர வீரரான நோவாக் ஜோகோவிச், இரண்டு சாதனைகளை சமன் செய்தார். மெல்போர்னில் நடைபெற்ற ஆடவர் ஒற்றையர் பிரிவின் முதல் சுற்று ஆட்டத்தில் வென்றதன் மூலம், தனது 100வது வெற்றியையும் பதிவு செய்து புதிய மைல்கல்லை எட்டினார்.ஸ்பெயினின் பெட்ரோ மார்டினஸுக்கு எதிராக 6-3, 6-2, 6-2 என்ற நேர் செட் கணக்கில் முதல் சுற்று வெற்றியை ஜோகோவிச் கைப்பற்றினார்.

இதன் மூலம் 38 வயதான ஜோகோவிச், ஆஸ்திரேலிய ஓபனில் தற்போது 100 வெற்றிகள் மற்றும் 10 தோல்விகள் என்ற சிறப்பான சாதனையைப் பெற்றுள்ளார். இந்தத் தொடரில் மட்டும் அவர் இதுவரை 10 முறை சாம்பியன் பட்டத்தை வென்றுள்ளார். விம்பிள்டனில் 102 வெற்றிகளையும், ரோலண்ட் கரோஸில் 101 வெற்றிகளையும் பெற்றுள்ள ஜோகோவிச், அடுத்த இரண்டு வாரங்களில் மேலும் ஆறு வெற்றிகளை ஈட்டி 25வது கிராண்ட்ஸ்லாம் பட்டத்தை வெல்ல இலக்கு நிர்ணயித்துள்ளார்.

இது டென்னிஸ் வரலாற்றில் அதிக கிராண்ட்ஸ்லாம் பட்டங்களை வென்ற வீரர் என்ற பெருமையைப் பெற்றுத் தரும். தற்போது ஆஸ்திரேலிய ஓபனில் தனது 21வது சுற்றுப்பயணத்தைத் தொடங்கியதன் மூலம், ரோஜர் ஃபெடரர் சாதனையை ஜோகோவிச் சமன் செய்துள்ளார். மேலும், தனது 81வது கிராண்ட்ஸ்லாம் தொடரில் பங்கேற்றதன் மூலம், ஃபெடரர் மற்றும் ஃபெலிசியானோ லோபஸ் மற்றொரு சாதனையையும் அவர் சமன் செய்தார். "வரலாற்று சாதனைகளை உருவாக்குவது எனக்கு ஒரு பெரிய உத்வேகமாகும்," என்று அவர் குறிப்பிட்டார்.

மார்டினஸுக்கு எதிரான போட்டியில் ஜோகோவிச் தனது பழைய அதிரடி ஆட்டத்தை வெளிப்படுத்தினார். இந்த ஆட்டத்தில் ஒருமுறை கூட பிரேக் பாயிண்ட் ஆபத்தை சந்திக்காத ஜோகோவிச், தனது முதல் சர்வீஸ் புள்ளிகளில் 93% வெற்றியைப் பதிவு செய்தார். மேலும், ஆட்ட முடிவில் 14 ஏஸ்களை அடித்த அவர், அதில் ஒரு ஏஸை மேட்ச் பாயிண்ட்டில் அடித்து ஆச்சரியப்படுத்தினார். ( நாம் அடிக்கும் சர்வை எதிர் வீரரால் தொட முடியாததை டென்னிசில் ஏஸ் என்று அழைப்பார்கள்)

இது குறித்து பேசிய ஜோகோவிச், "இன்றிரவு நடந்த ஆட்டம் மிகச் சிறப்பானது. எந்தவிதக் குறையும் கூற முடியாது," என்று ஜோகோவிச் கூறினார். தனது இந்த ஆதிக்கம் செலுத்தும் வெற்றி "தனக்கு மட்டுமல்லாமல், அனைத்து வீரர்களுக்கும் சரியான சிக்னல் அனுப்புகிறது," என்றும் அவர் மேலும் தெரிவித்தார்.

ஆஸ்திரேலிய ஓபனுக்கு முன், ஜோகோவிச் எந்த ஒரு பயிற்சிப் போட்டியிலும் பங்கேற்கவில்லை. இது குறித்து விளக்கம் அளித்த அவர், "என் உடலை மீட்டெடுத்து, அடுத்த சவாலுக்கு முழு தகுதியுடன் இருக்க, ஒவ்வொரு மணிநேரத்தையும் நான் பயன்படுத்துகிறேன்," என்று அவர் கூறினார். 2025 ஆம் ஆண்டில் அனைத்து நான்கு கிராண்ட்ஸ்லாம் போட்டிகளிலும் அரையிறுதியை எட்டிய போதிலும், கடந்த இரண்டு ஆண்டுகளாக கார்லோஸ் அல்கராஸ் மற்றும் ஜானிக் சின்னர் ஆகியோர் ஆதிக்கம் செலுத்திவரும் ஆதிக்கத்தை அவரால் உடைக்க முடியவில்லை.