யாருப்பா நீ? ஜாம்பவான் ஜோக்கோவிச்சை வீழ்த்திய 19 வயது சிறுவன் பொன்சேகா.. பிரெஞ்சு ஓபனில் புதிய உதயம்

பாரிஸ்: டென்னிஸ் வரலாற்றில் இதுவரை கண்டிராத ஒரு மிகப்பெரிய அதிர்ச்சியை பிரேசில் நாட்டின் 19 வயது இளைஞர் ஜோவோ பொன்சேகா (Joao Fonseca) நிகழ்த்தியுள்ளார். பிரெஞ்சு ஓபன் தொடரின் மூன்றாவது சுற்றில், உலகின் மிகச்சிறந்த வீரரான நோவக் ஜோக்கோவிச்சை வீழ்த்தி அவர் அதிர வைத்துள்ளார்.

24 கிராண்ட்ஸ்லாம் பட்டங்களை வென்று சாதனை படைத்துள்ள ஜோக்கோவிச், தனது 25-வது பட்டத்தை வென்று புதிய வரலாறு படைக்கும் நோக்கில் பாரிஸில் களம் கண்டார். இந்தப் போட்டியின் முதல் இரண்டு செட்களை 6-4, 6-4 என ஜோக்கோவிச் எளிதாகக் கைப்பற்றினார். அப்போது அவர் எளிதில் வெற்றி பெறுவார் என்றே அனைவரும் கருதினர். ஆனால், அதன் பிறகு பிரேசிலின் இளம் புயல் பொன்சேகாவின் ஆட்டம் தலைகீழாக மாறியது.

அடுத்த மூன்று செட்களையும் 6-3, 7-5, 7-5 எனப் போராடி வென்ற பொன்சேகா, சுமார் 5 மணி நேரப் போராட்டத்திற்குப் பிறகு ஜோக்கோவிச்சை வீழ்த்தினார். கிராண்ட்ஸ்லாம் வரலாற்றில் ஜோக்கோவிச் ஒரு பதின்ம வயது வீரரிடம் (Teenage) தோற்பது இதுவே முதல் முறையாகும்.

யார் இந்த ஜோவோ பொன்சேகா?

பிரேசிலின் ரியோ டி ஜெனிரோ நகரில் 2006 ஆகஸ்ட் மாதம் பிறந்த பொன்சேகா, அந்நாட்டின் டென்னிஸ் ஜாம்பவான் குஸ்டாவோ குயர்டனுக்குப் பிறகு மிகப்பெரிய நம்பிக்கையாகப் பார்க்கப்படுகிறார். கால்பந்து விளையாட்டிற்குப் புகழ்பெற்ற பிரேசிலில், டென்னிஸ் விளையாட்டில் இவர் ஒரு புதிய நட்சத்திரமாக உருவெடுத்துள்ளார்.

இவரது வளர்ச்சி மிகவும் பிரமிக்கத்தக்கது. 2023-ல் அமெரிக்க ஓபன் ஜூனியர் பிரிவில் பட்டம் வென்ற இவர், அதே ஆண்டில் உலகின் 'நம்பர் 1' ஜூனியர் வீரராகத் திகழ்ந்தார். 2025-ல் அர்ஜென்டினா ஓபன் பட்டத்தை வென்றதன் மூலம், ஏடிபி பட்டத்தை வென்ற மிக இளம் வயது பிரேசில் வீரர் என்ற பெருமையைப் பெற்றார். அதே ஆண்டு ஆஸ்திரேலிய ஓபன் தொடரில் முன்னணி வீரரான ஆன்ட்ரி ரூப்லெவை வீழ்த்தி தனது அதிரடி ஆட்டத்தை உலகிற்கு நிரூபித்தார்.

புதிய சகாப்தம்

தற்போது பிரெஞ்சு ஓபன் தொடரில் 28-வது வரிசை வீரராகக் களம் கண்ட பொன்சேகா, ஜோக்கோவிச்சிற்கு எதிராக 68 வின்னர்களை (Winners) விளாசி மிரட்டினார். இப்போட்டியில் ஜோக்கோவிச் 70 வின்னர்களை அடித்தாலும், மிக நெருக்கடியான நேரங்களில் பொன்சேகா காட்டிய துணிச்சலும் ஆக்ரோஷமும் அவருக்கு வெற்றியைத் தேடித்தந்தது.

IPL 2026: வைபவ் சூர்யவன்ஷியை திட்டிய ரியான் பராக்.. டிரெஸ்ஸிங் ரூமில் என்ன நடந்தது? ரசிகர்கள் ஆவேசம்

கார்லோஸ் அல்காரஸ் மற்றும் ஜானிக் சின்னர் போன்ற முன்னணி வீரர்கள் ஏற்கனவே வெளியேறிய நிலையில், ஜோக்கோவிச் எளிதாக வெல்வார் என்று எதிர்பார்க்கப்பட்டது. ஆனால், பொன்சேகாவின் இந்த வெற்றி டென்னிஸ் உலகில் புதிய தலைமுறை வீரர்களின் வருகையை உரக்கச் சொல்லியுள்ளது. ஜாம்பவான்களின் ஆதிக்கம் குறைந்து, இளம் வீரர்களின் சகாப்தம் தொடங்கிவிட்டது என்பதற்கு இந்தப் போட்டியே சாட்சியாக அமைந்துள்ளது. இதன் மூலம் பிரெஞ்சு ஓபன் தொடரில் இந்த முறை ஒரு புதிய வீரர் சாம்பியன் பட்டம் வெல்வது உறுதியாகியுள்ளது.