US Open 2025: இந்திய ஜோடி சரித்திர வெற்றி.. சின்னர், ஜோகோவிச் நான்காம் சுற்றுக்கு முன்னேற்றம்

நியூயார்க்: அமெரிக்க ஓபன் டென்னிஸ் தொடர் நாளுக்கு நாள் விறுவிறுப்பாகி வரும் நிலையில், சனிக்கிழமை நடைபெற்ற ஆட்டங்கள் டென்னிஸ் ரசிகர்களுக்கு பெரும் விருந்தாக அமைந்தன. முன்னணி வீரர்கள் அடுத்த சுற்றுக்கு முன்னேற கடுமையாகப் போராட வேண்டியிருந்தது. இந்தியாவிற்கு கலவையான முடிவுகள் கிடைத்த நிலையில், இன்று (ஆகஸ்ட் 31) நான்காம் சுற்றில் முக்கிய வீரர்கள் களமிறங்குகின்றனர்.

சனிக்கிழமை நடைபெற்ற ஆண்களுக்கான மூன்றாவது சுற்று ஆட்டத்தில், நடப்பு சாம்பியனும், உலகின் நம்பர் 1 வீரருமான ஜானிக் சின்னர், டெனிஸ் ஷபோவலோவுக்கு எதிராக முதல் செட்டை இழந்து அதிர்ச்சியளித்தார். இருப்பினும், சுதாரித்துக்கொண்டு ஆடிய அவர், அடுத்த மூன்று செட்களையும் கைப்பற்றி 5-7, 6-4, 6-3, 6-3 என்ற கணக்கில் வெற்றி பெற்று நான்காம் சுற்றுக்கு முன்னேறினார்.

மற்றொரு ஆட்டத்தில், நட்சத்திர வீரர் நோவக் ஜோகோவிச், பிரிட்டனின் கேம் நோரியை எதிர்கொண்டு 6-4, 6-7, 6-2, 6-3 என்ற செட் கணக்கில் வென்றார். மகளிர் ஒற்றையர் பிரிவில், அமெரிக்காவின் இளம் புயல் கோகோ கோஃப், 6-3, 6-1 என்ற நேர் செட்களில் மக்டலேனா ஃப்ரெச்சை எளிதாக வீழ்த்தி நான்காம் சுற்றுக்குள் நுழைந்தார்.

ஜப்பானின் நவோமி ஒசாகா, டேரியா கசட்கினாவுடன் கடுமையாகப் போராடி 6-0, 4-6, 6-3 என்ற செட் கணக்கில் வென்றார். இந்த வெற்றியின் மூலம், ஒசாகா நான்காம் சுற்றில் கோகோ கோஃபை எதிர்கொள்வது உறுதியாகியுள்ளது.

இந்திய ஜோடியின் சரித்திரம்

இந்தியாவைப் பொறுத்தவரை, ஆடவர் இரட்டையர் பிரிவில் ஆச்சரிய முடிவுகள் கிடைத்தன. அனிருத் சந்திரசேகர் மற்றும் விஜய் சுந்தர் பிரசாந்த் ஜோடி, கடைசி நிமிடத்தில் இரட்டையர் பிரிவில் தகுதி பெற்றிருந்த நிலையில், 8ஆம் நிலை ஜோடியான அமெரிக்காவின் இவான் கிங் மற்றும் கிறிஸ்டியன் ஹாரிசனை 3-6, 6-3, 6-4 என்ற செட் கணக்கில் வீழ்த்தி மிகப்பெரிய வெற்றியைப் பதிவு செய்தது.

அதேசமயம், இந்தியாவின் அனுபவ வீரர் ரோஹன் போபண்ணா, தனது ஜோடியான ரோமெய்ன் அர்னியோடோவுடன் களமிறங்கிய முதல் சுற்றிலேயே 4-6, 3-6 என்ற நேர் செட்களில் அமெரிக்க ஜோடியிடம் தோல்வியடைந்து வெளியேறினார். யூகி பாம்ப்ரி தனது நியூசிலாந்து ஜோடியான மைக்கேல் வீனஸுடன் இணைந்து அடுத்த சுற்றுக்கு முன்னேறியுள்ளார்.

இன்று அனல் பறக்கும் ஆட்டங்கள்!

ஞாயிற்றுக்கிழமையான இன்று (ஆகஸ்ட் 31) நான்காம் சுற்றுப் போட்டிகள் தொடங்குகின்றன. இதில் ரசிகர்கள் ஆவலுடன் எதிர்பார்க்கும் ஆட்டமாக, முன்னாள் சாம்பியன்களான கோகோ கோஃப் மற்றும் நவோமி ஒசாகா இடையேயான மோதல் அமைந்துள்ளது. ஆண்கள் பிரிவில், கார்லோஸ் அல்காரஸ் நான்காம் சுற்றுப் போட்டியில் ஆட உள்ளார். நோவக் ஜோகோவிச் திங்கள்கிழமை அன்று நான்காம் சுற்றில் விளையாட இருக்கிறார். இதனால், அமெரிக்க ஓபன் தொடரின் விறுவிறுப்பு உச்சத்தை எட்டியுள்ளது.