விம்பிள்டன் 2026.. நடப்பு சாம்பியன் ஸ்வியாடெக் அதிர்ச்சித் தோல்வி.. "இப்படி நடப்பது சகஜம்" என வேதனை

நியூயார்க்: விம்பிள்டன் டென்னிஸ் தொடரின் பெண்கள் ஒற்றையர் பிரிவில் நேற்று (ஜூலை 4) நடைபெற்ற 3-வது சுற்று ஆட்டத்தில், நடப்பு சாம்பியனான இகா ஸ்வியாடெக் அதிர்ச்சித் தோல்வி அடைந்து வெளியேறியுள்ளார். பிலிப்பைன்ஸ் நாட்டின் 21 வயது இளம் வீராங்கனை அலெக்ஸாண்ட்ரா ஈலாவிடம் நேர் செட்களில் அவர் வீழ்ந்தார்.

சென்டர் கோர்ட்டில் நடைபெற்ற இப்போட்டியில், 3-வது வரிசை வீராங்கனையான ஸ்வியாடெக், 7-6, 6-2 என்ற செட் கணக்கில் ஈலாவிடம் படுதோல்வி அடைந்தார். இந்த வரலாற்று வெற்றியின் மூலம் கிராண்ட்ஸ்லாம் வரலாற்றில் 4-வது சுற்றுக்கு முன்னேறிய முதல் பிலிப்பைன்ஸ் வீராங்கனை என்ற புதிய சாதனையை அலெக்ஸாண்ட்ரா ஈலா படைத்துள்ளார்.

கடந்த ஆண்டு விம்பிள்டன் இறுதிப் போட்டியில் 6-0, 6-0 என்ற கணக்கில் எளிதாக வென்று சாம்பியன் பட்டம் வென்றிருந்த ஸ்வியாடெக், இப்போட்டியில் ஆரம்பம் முதலே தனது இயல்பான ஆட்டத்தை வெளிப்படுத்த முடியாமல் தடுமாறினார்.

தோல்விக்குப் பிறகு செய்தியாளர்களிடம் பேசிய 6 முறை கிராண்ட்ஸ்லாம் சாம்பியனான ஸ்வியாடெக், தனது தவறுகள் குறித்து வெளிப்படையாகப் பேசினார். "சில நேரங்களில் ஆட்டத்தில் இதுபோன்று மோசமான விஷயங்கள் நடப்பது சகஜம் தான். என்னால் எனது சில தவறான ஷாட்டுகளுக்கு இப்போது விளக்கம் அளிக்க முடியாது."

"முதல் செட்டின் டைபிரேக்கரின் போது, ஆட்டம் விறுவிறுப்பாகச் சென்றபோது நான் சற்று மெதுவாக விளையாடினேன். ஆனால், ஈலா மிகவும் தைரியமாக வேகமான ஆட்டத்தை வெளிப்படுத்தினார். விம்பிள்டன் புல்வெளி ஆடுகளத்தில் புள்ளிகளை வெல்ல தைரியமாக விளையாடுவது மிக அவசியமாகும். முக்கியமான தருணங்களில் அவர் என்னை விட மிகச் சிறப்பாக விளையாடினார்" என்று கூறினார்.

வைபவ் சூர்யவன்ஷி உருக்கமான பதிவு..

இடதுகை ஆட்டக்காரரான அலெக்ஸாண்ட்ரா ஈலா, தனது அதிரடியான பேஸ்லைன் ஆட்டத்தின் மூலம் நடப்பு சாம்பியனை வீழ்த்தி இந்தத் தொடரின் மிகப்பெரிய அதிர்ச்சியை ஏற்படுத்தியுள்ளார். அவர் தனது அடுத்த 4-வது சுற்று ஆட்டத்தில் 2024-ஆம் ஆண்டின் விம்பிள்டன் இறுதிப் போட்டியாளரான இத்தாலியின் ஜாஸ்மின் பாவ்லினியை எதிர்கொள்ளவுள்ளார்.