சிட்சிபாஸை வீழ்த்தி ஜோகோவிச் அபார வெற்றி.. ஆண்ட்ரீவாவை வீழ்த்தி கிரெய்சிகோவா அதிர்ச்சி வெற்றி

நியூயார்க்: விம்பிள்டன் டென்னிஸ் தொடரின் மூன்றாவது நாளில் (ஜூலை 1) நடைபெற்ற இரண்டாவது சுற்று ஆட்டங்களில் முன்னணி நட்சத்திரங்கள் பலப்பரீட்சை நடத்தினர். இதில் முன்னாள் சாம்பியனான நோவக் ஜோகோவிச் மற்றும் நடப்பு சாம்பியன் ஜானிக் சின்னர் ஆகியோர் தங்களது பிரிவுகளில் வெற்றி பெற்று மூன்றாவது சுற்றுக்கு முன்னேறினர்.

ஆண்கள் ஒற்றையர் பிரிவின் இரண்டாவது சுற்றில், 7 முறை விம்பிள்டன் சாம்பியனான செர்பியாவின் நோவக் ஜோகோவிச், கிரீஸ் நாட்டின் ஸ்டெபனோஸ் சிட்சிபாஸை எதிர்கொண்டார். ஆரம்பம் முதலே ஆதிக்கம் செலுத்திய 39 வயதான ஜோகோவிச் 6-3, 6-4, 6-2 என்ற நேர் செட்களில் சிட்சிபாஸை வீழ்த்தி 20-வது முறையாக மூன்றாவது சுற்றுக்கு தகுதி பெற்றார். 98 நிமிடங்கள் மட்டுமே நீடித்த இப்போட்டியில் ஜோகோவிச் தனது சர்வீஸை ஒரு முறை கூட இழக்கவில்லை என்பது குறிப்பிடத்தக்கது. அடுத்த சுற்றில் அவர் பிரான்சின் ஆர்தர் ரிண்டர்நெச்சை எதிர்கொள்கிறார்.

மற்றொரு போட்டியில், உலகின் முதன்மை வீரரான இத்தாலியின் ஜானிக் சின்னர், போர்ச்சுகலின் நுனோ போர்ஜஸை 7-6, 7-6, 6-4 என்ற செட் கணக்கில் போராடி வீழ்த்தி மூன்றாவது சுற்றுக்கு முன்னேறினார். இந்த வெற்றியின் மூலம் கிராண்ட்ஸ்லாம் போட்டிகளில் 95 வெற்றிகளைப் பதிவு செய்த சின்னர், அதிக வெற்றிகளைப் பெற்ற இத்தாலிய வீரர் என்ற வரலாற்றுச் சாதனையைப் படைத்துள்ளார்.

பெண்கள் ஒற்றையர் பிரிவில் மிகப்பெரிய அதிர்ச்சித் தோல்வி அரங்கேறியது. அண்மையில் பிரெஞ்சு ஓபன் பட்டம் வென்ற 5-வது வரிசை வீராங்கனையான ரஷ்யாவின் 19 வயது இளம் நட்சத்திரம் மிரா ஆண்ட்ரீவாவை, செக் குடியரசின் பார்போரா கிரெய்சிகோவா 4-6, 7-5, 6-4 என்ற செட் கணக்கில் வீழ்த்தி அதிர்ச்சி அளித்தார். சுமார் 2 மணி 47 நிமிடங்கள் நீடித்த இந்த விறுவிறுப்பான போட்டியில், கிரெய்சிகோவா தனது 7-வது மேட்ச் பாயிண்டில் வெற்றியை உறுதி செய்தார். தோல்வியடைந்த விரக்தியில் ஆண்ட்ரீவா தனது ரேக்கெட்டை தரையில் வீசி எறிந்தார்.

மேலும், மற்றொரு ஆட்டத்தில் முன்னணி வீராங்கனையான அரினா சபலென்கா நேர் செட்களில் வென்றார். அவர் மூன்றாவது சுற்றில் ஜெலினா ஆஸ்டாபென்கோவை எதிர்கொள்ளவுள்ளார்.

இந்திய அணியில் ஆடும் வாய்ப்பு தள்ளிப்போவதால் வைபவ் சூர்யவன்ஷிக்கு புது சிக்கல்.. கவாஸ்கர் கவலை

டபிள்யூடிஏ இறுதிப்போட்டி இடமாற்றம்

இதற்கிடையில், இந்த ஆண்டு நவம்பர் 8 முதல் 15 வரை சவூதி அரேபியாவின் ரியாத் நகரில் நடைபெறவிருந்த புகழ்பெற்ற டபிள்யூடிஏ மகளிர் டென்னிஸ் இறுதிப்போட்டி, கலிபோர்னியாவின் இந்தியன் வெல்ஸ் நகருக்கு மாற்றப்பட்டுள்ளது. சவூதி டென்னிஸ் கூட்டமைப்புடன் போடப்பட்ட 3 ஆண்டு ஒப்பந்தம் 2 ஆண்டுகளிலேயே பரஸ்பர உடன்பாட்டுடன் முடிக்கப்பட்டுள்ளது.