விம்பிள்டன் டென்னிஸ் 2026: ஜோகோவிச் செய்த சேட்டை.. Ball girl-யிடம் செய்த பிராங்க்.. சிரிப்பலை!

லண்டன்: 2026 விம்பிள்டன் சாம்பியன்ஷிப் தொடரின் இரண்டாவது சுற்றில் ஸ்டெபானோஸ் சிட்சிபாஸை எளிதாக வீழ்த்தி நோவக் ஜோகோவிச், வெற்றி பெற்றார். இந்த ஆட்டம் செர்பிய வீரரான ஜோகோவிச்சிற்கு மிகவும் எளிதாக அமைந்தது, ஆட்டத்தின் போது ball girl உடன் ஜோகோவிச் ஒரு நகைச்சுவை விளையாட்டில் ஈடுபட்டது ரசிகர்களை வெகுவாக கவர்ந்தது.

லண்டன் சென்டர் கோர்ட்டில் நடந்த போட்டியில் சிட்சிபாஸிற்கு எதிராக 6-3, 6-4, 6-2 என்ற நேர் செட்களில் ஜோகோவிச் அபார வெற்றி பெற்றார். இந்த ஆட்டத்தில் இடைவேளையின் போது தனது உடையில் தையல் செய்யப்பட்ட ஒரு பகுதியை வெட்டுவதற்கு அந்த சிறுமியின் உதவியை ஜோகோவிச் நாடியபோது மட்டுமே சிறிய சுவாரஸ்யம் ஏற்பட்டது.

அந்த சிறுமி தனது வேலையைச் செய்துகொண்டிருந்தபோது, அவர் தனது தோலைக் கத்தியால் வெட்டிவிட்டது போல் ஜோகோவிச் திடீரென உடலை சிலிர்த்து அலறினார், இதனால் அந்த சிறுமி பயந்துபோனார். இருப்பினும், அது ஒரு விளையாட்டுக்காக தான் செய்தார் என்பதை அவர் உடனடியாக அனைவருக்கும் தெளிவுபடுத்தியதால் மைதானத்தில் இருந்த ரசிகர்கள் பலத்த கைதட்டல் எழுப்பி ஆரவாரம் செய்தனர்.

24 முறை கிராண்ட் ஸ்லாம் பட்டம் வென்ற ஜோகோவிச், விம்பிள்டனின் மூன்றாவது சுற்றில் வெள்ளிக்கிழமை ஆர்தர் ரிண்டர்நெச்சை எதிர்கொள்கிறார். போட்டிக்குப் பிந்தைய செய்தியாளர் சந்திப்பில், நோவக் ஜோகோவிச் ஸ்டெபானோஸ் சிட்சிபாஸைப் பற்றிப் பேசினார். கிரேக்க வீரரான சிட்சிபாஸ் முதல் 5 இடங்களுக்குள் இருந்த காலத்துடன் ஒப்பிடுகையில், தற்போது அவரது ஆட்டத்திறன் குறைந்துவிட்டதாக ஜோகோவிச் குறிப்பிட்டார்.

"பொதுவாக அவர் தவறவிடாத சில ஷாட்டுகளை, முக்கியமான தருணங்களில் தவறவிடுவதை நீங்கள் உணர முடியும். ஆனால் அதுதான் டென்னிஸ். நீங்கள் மிக உயர்ந்த மட்டத்தில் விளையாடும்போது, உங்களிடம் தன்னம்பிக்கை இல்லை என்றால், ஷாட்களைப் பற்றி நீங்கள் அதிகமாக சிந்திக்கத் தொடங்குவீர்கள், பின்னர் சரியான நேரத்தில் சரியான ஷாட்களை விளையாடுவதில் சௌகரியமாக இருக்காது," என்று ஜோகோவிச் கூறினார்.

உலகத் தரவரிசையில் எட்டாம் இடத்தில் உள்ள ஜோகோவிச், "அவர் இன்னும் தனது தன்னம்பிக்கையைத் தேடி வருகிறார் மற்றும் பல ஆண்டுகளாக அவர் விளையாடிய அதே பழைய ஆட்டத்திறனை மீண்டும் பெற முயற்சிக்கிறார் என்று நான் நினைக்கிறேன். இன்று எனது ஆட்டத்தை நான் இன்னும் மேம்படுத்தினேன், ஆனால் அவர் தனது முழு திறமையையும் வெளிப்படுத்தவில்லை. எனவே, நேர் செட்களில் வெற்றி பெறுவதற்கு அதுவே போதுமானதாக இருந்தது" என்றார்.

IND vs ENG: சஞ்சு சாம்சனை நோக்கி ஏன் எப்போதும் துப்பாக்கியை நீட்டுகிறீர்கள்.. சபா கரீம் கேள்வி

செர்பிய வீரரான ஜோகோவிச் இந்த ஆண்டு விம்பிள்டனில் தனது 25வது கிராண்ட் ஸ்லாம் பட்டத்தை வெல்லும் முனைப்பில் உள்ளார். கடந்த சில ஆண்டுகளாக இந்த பட்டம் அவருக்கு எட்டாக்கனியாகவே இருந்து வருகிறது. அவர் 2023 மற்றும் 2024 ஆம் ஆண்டுகளில் இறுதிப் போட்டி வரை முன்னேறிய போதிலும், இரு முறையும் கார்லோஸ் அல்கராஸிடம் தோல்வியடைந்தது குறிப்பிடத்தக்கது.