“நான் யாரையும் காப்பி அடிக்கல..6 மாதமாக இதை செய்கிறேன்”.. அபிஷேக் சர்மா அதிரடி விளக்கம்

டெல்லி: ஆப்கானிஸ்தானுக்கு எதிரான 3-வது டி20 போட்டியில் இந்திய தொடக்க ஆட்டக்காரர் அபிஷேக் சர்மா அதிரடி புயலாக மாறி புதிய வரலாறு படைத்தார். டெல்லி அருண் ஜெட்லி மைதானத்தில் நடந்த போட்டியில் வெறும் 30 பந்துகளில் சதம் விளாசி அசத்தினார். களத்தில் 10 சிக்சர்கள், 9 பவுண்டரிகளைப் பறக்கவிட்டு வானவேடிக்கை காட்டிய அவர், சதம் அடித்ததும் மைதானத்தில் அமர்ந்து தியான முத்திரையுடன் கொண்டாடினார். இது மான்செஸ்டர் சிட்டி கால்பந்து வீரர் எர்லிங் ஹாலண்டின் பிரசித்தி பெற்ற கொண்டாட்டத்தை நினைவூட்டியது. இதனால் அபிஷேக் சர்மா, ஹாலண்டை காப்பி அடிக்கிறார் என ரசிகர்கள் பலரும் பேசத் தொடங்கினர்.

ஆனால் இந்த பேச்சுகளுக்கு அபிஷேக் சர்மா உடனடியாக முற்றுப்புள்ளி வைத்துள்ளார். மூன்றாவது டி20 போட்டி முடிந்த பின் பேசிய அவர், "நான் யாரையும் காப்பி அடிக்கவில்லை. கடந்த 6 மாதங்கள் முதல் ஒரு வருடமாக நான் தியானத்தில் அதிக கவனம் செலுத்தி வருகிறேன். ஆண்டு முழுவதும் கிரிக்கெட் ஆடும் போது பல ஏற்ற இறக்கங்களைச் சந்திக்க நேரிடும். அந்த இக்கட்டான சூழலில் மனதை நிதானமாகவும், நிலையாகவும் வைத்திருக்க தியானமே எனக்குப் பெரிதும் உதவியது. தியானம் எனக்கு எவ்வாறு உதவியது என்பதை சக வீரர்களும் இளைஞர்களும் தெரிந்துகொள்ள வேண்டும் என்ற விழிப்புணர்வுக்காகவே இப்படி கொண்டாடினேன்" என்று தெளிவுபடுத்தினார்.

முன்னதாக ரோஹித் சர்மா 35 பந்துகளில் சதம் அடித்ததே இந்திய வீரரின் அதிவேக சாதனையாக இருந்தது. அதை முறியடித்த அபிஷேக் சர்மா, சர்வதேச டி20 கிரிக்கெட்டில் முழு உறுப்பு நாட்டைச் சேர்ந்த வீரர்களில் அதிவேக சதம் அடித்த வீரர் என்ற புதிய உலக சாதனையையும் தன் வசப்படுத்தினார்.

கிரிக்கெட், ஹாக்கியால் இந்தியாவுக்கு 4 தங்கம் கிடைக்க வாய்ப்பு.. ஆசிய விளையாட்டில் எதிர்பார்ப்பு

அபிஷேக்கின் இந்த 3-வது சர்வதேச டி20 சதத்தால் இந்திய அணி 8.3 ஓவர்களிலேயே விக்கெட் இழப்பின்றி 132 ரன்களைக் குவித்தது. இறுதியில் இந்திய அணி 127 ரன்கள் வித்தியாசத்தில் இமாலய வெற்றி பெற்று, தொடரை 3-0 எனக் கைப்பற்றி ஆப்கானிஸ்தானை ஒயிட்வாஷ் செய்தது.