யுவராஜ் சிங் அனுப்பிய அந்த ஒரு 'மெசேஜ்'.. 30 பந்தில் செஞ்சுரி ரகசியத்தை உடைத்த அபிஷேக் சர்மா

டெல்லி: ஆப்கானிஸ்தானுக்கு எதிரான 3-வது டி20 போட்டியில் வெறும் 30 பந்துகளில் சதம் விளாசி, 34 பந்துகளில் 108 ரன்கள் குவித்து உலகையே திரும்பிப் பார்க்க வைத்தார் இந்திய தொடக்க வீரர் அபிஷேக் சர்மா. இதன்மூலம் அதிவேக சதம் அடித்த ரோஹித் சர்மாவின் (35 பந்துகள்) சாதனையை முறியடித்தார். இந்திய அணியும் 127 ரன்கள் வித்தியாசத்தில் அபார வெற்றி பெற்று தொடரை 3-0 எனக் கைப்பற்றியது.

இந்த அதிவேக ஆட்டத்திற்குப் பின்னால் தனது குரு யுவராஜ் சிங் அனுப்பிய முக்கிய அறிவுரை இருப்பதாக அபிஷேக் சர்மா தெரிவித்துள்ளார். போட்டி முடிந்த பிறகு பேசிய அபிஷேக், "2-வது போட்டி முடிந்ததும் யுவராஜ் சிங் எனக்கு ஒரு குறுஞ்செய்தி அனுப்பினார். அதில், எல்லா பந்துகளையும் வலுக்கட்டாயமாக அடித்து ஆட முயற்சிக்கக் கூடாது; பந்து சரியாக பேட்டில் படாதபோது 1 அல்லது 2 சிங்கிள் ரன்கள் எடுத்து நிதானிக்க வேண்டும் என்று அறிவுறுத்தினார். நான் அவசரப்படாமல் நீண்ட நேரம் களத்தில் நின்று ஆட வேண்டும் என்பதே அவரது விருப்பம்" என்று கூறினார்.

இந்தத் தொடருக்கு முன்பு வரை அபிஷேக் சர்மா ஆடிய 7 இன்னிங்ஸ்களில் அரைசதம் அடிக்காமல் தவித்தார். அதில் 4 முறை ஒற்றை இலக்க ரன்களிலேயே வெளியேறினார். மேலும் சஞ்சு சாம்சன், வைபவ் சூர்யவன்ஷி ஆகியோரின் போட்டியால் அவர் மீது கடும் அழுத்தம் இருந்தது.

ஆனால் யுவராஜ் சிங்கின் ஆலோசனையைக் கச்சிதமாகப் பயன்படுத்திய அபிஷேக் சர்மா, டெல்லி மைதானத்தில் ரஷித் கான், முஜீப் உர் ரஹ்மான் ஆகியோரின் பந்துவீச்சை நாலாபுறமும் சிதறடித்தார். 11 சிக்சர்கள், 9 பவுண்டரிகளை விளாசி அசத்தினார். 30 பந்துகளில் சதம் அடித்தார்.

“இந்தியாகிட்ட இருக்க திறமைக்கு டி20-யில் 300 ரன் விளாசுவதே..”.. சவால் விட்ட பயிற்சியாளர் கம்பீர்

ஆப்கானிஸ்தான் டி20 தொடரில் 82, 39, 108 என 3 போட்டிகளில் மொத்தம் 229 ரன்கள் குவித்து தொடர் நாயகன் விருதையும் தட்டிச் சென்றார் அபிஷேக் சர்மா. இந்த ஃபார்முடன் அவர் அடுத்ததாக 2026 ஆசிய விளையாட்டுப் போட்டியில் களம் காண உள்ளார்.