சின்னசாமி மைதானத்தில் வெல்வது எளிதல்ல.. உண்மையான விக்கெட் டேக்கர் அவர் தான்.. கம்மின்ஸ் ஓபன் டாக்!

பெங்களூரு: பாகிஸ்தான் அணிக்கு எதிரான போட்டியில் ஆஸ்திரேலிய அணியின் ஸ்பின்னர் ஆடம் ஜாம்பா தான் உண்மையான விக்கெட் டேக்கர் என்று கேப்டன் பேட் கம்மின்ஸ் தெரிவித்துள்ளார்.

பாகிஸ்தான் அணிக்கு எதிரான போட்டியில் ஆஸ்திரேலிய அணி 62 ரன்கள் வித்தியாசத்தில் வெற்றிபெற்றுள்ளது. இந்த போட்டியில் முதலில் பேட்டிங் ஆடிய ஆஸ்திரேலிய அணி 50 ஓவர்களில் 9 விக்கெட்டுகள் இழப்பிற்கு 367 ரன்கள் சேர்த்தது. சிறப்பாக விளையாடிய மிட்செல் மார்ஷ் 163 ரன்களும், மிட்செல் மார்ஷ் 121 ரன்களும் விளாசினர். அதேபோல் பாகிஸ்தான் அணி தரப்பில் ஷாகின் அப்ரிடி 5 விக்கெட்டுகளை வீழ்த்தி அசத்தினார்.

இதனைத் தொடர்ந்து களமிறங்கிய பாகிஸ்தான் அணி 45.3 ஓவர்களில் 305 ரன்கள் எடுத்து ஆல் அவுட்டாகியது. பாகிஸ்தான் அணி தரப்பில் இமாம் உல் ஹக் 70 ரன்களும், ஷஃபிக் 64 ரன்களும் விளாசினர். ஆஸ்திரேலிய அணி தரப்பில் ஆடம் ஜாம்பா 4 விக்கெட்டுகளையும், கம்மின்ஸ் மற்றும் ஸ்டாய்னிஸ் தலா 2 விக்கெட்டுகளையும் வீழ்த்தினர்.

இதன் மூலமாக உலகக்கோப்பை தொடரில் ஆஸ்திரேலிய அணி 2வது வெற்றியை பெற்றுள்ளது. அதேபோல் புள்ளிப்பட்டியலிலும் ஆஸ்திரேலிய அணி 4வது இடத்திற்கு முன்னேறியுள்ளது. இதன் காரணமாக பாகிஸ்தான் அணி 5வது இடத்திற்கு தள்ளப்பட்டுள்ளது. அதேபோல் ஆஸ்திரேலிய அணியின் வெற்றி ரசிகர்களிடையே வரவேற்பை பெற்றுள்ளது.

இந்த வெற்றி குறித்து ஆஸ்திரேலிய அணி கேப்டன் பேட் கம்மின்ஸ் பேசுகையில், பாகிஸ்தான் அணிக்கு எதிரான போட்டிகளில் மிகச்சிறந்த வெற்றி இது. சின்னசாமி மைதானத்தில் விளையாடுவது எப்போதும் கடினமாக இருக்கும். வார்னர் - மார்ஷ் இருவரும் ஆஸ்திரேலிய அணிக்கான வெற்றிப் பாதையை அமைத்தனர் என்றே சொல்ல வேண்டும். நாங்கள் எப்படியான கிரிக்கெட்டை விளையாட வேண்டும் என்பதை போல் இருவரும் விளையாடினார்கள்.

இதுபோன்ற ஆடுகளங்களில் புதிதாக களமிறங்கும் வீரர்களுக்கு பேட்டிங் செய்வது எளிதாக இருக்காது. ஒரு விக்கெட்டை வீழ்த்தினாலே அடுத்தடுத்து விக்கெட்டுகளை வீழ்த்த முடியும். ஸ்டாய்னிஸ் மூலமாக முதல் விக்கெட்டை வீழ்த்தியது மிகழ்ச்சியாக இருந்தது. அதன்பின் ஜாம்பா தனது வேலையை காட்டிவிட்டார். அவரின் தரம் என்ன என்பதை நிரூபித்துவிட்டார். அவர்தான் உண்மையான விக்கெட் டேக்கர். அடுத்த போட்டிக்கு முன்பாக 3 முதல் 4 நாட்கள் ஓய்வு கிடைத்துள்ளது. இரு போட்டிகளில் ஆடிய ஆட்டத்தை தொடர வேண்டும் என்று கூறியுள்ளார்.