குல்தீப் என்ன பால் போடுறாருன்னே தெரியலை.. ரன் எடுக்க முடியாமல் திணறிய பாகிஸ்தான்.. விளாசிய அக்ரம்

துபாய்: இந்திய அணிக்கு எதிரான ஆசிய கோப்பை சூப்பர் ஃபோர் போட்டியில் பாகிஸ்தான் பேட்ஸ்மேன்கள் கடைப்பிடித்த ஆட்ட யுக்தி, அந்த அணியின் முன்னாள் ஜாம்பவான் வாசிம் அக்ரம்-ஐ கடும் கோபத்திற்கு உள்ளாக்கியுள்ளது. இந்தப் போட்டியின் மிக முக்கியமான 18 மற்றும் 19-வது ஓவர்களில் பாகிஸ்தான் வீரர்கள் 'டாட் பால்'களை ஆடியது குறித்து வாசிம் அக்ரம் கடும் விமர்சனத்தை முன்வைத்துள்ளார்.

பாகிஸ்தான் வீரர்களின் இந்த மோசமான ஆட்டத்திறனை மேம்படுத்த, பாகிஸ்தான் கிரிக்கெட் வாரியம் (பிசிபி) வீரர்களின் மத்திய ஒப்பந்தத்தில் ஒரு புதிய விதியைக் கொண்டு வர வேண்டும் என்று அவர் வலியுறுத்தியுள்ளார். நேற்றைய போட்டியில், பாகிஸ்தான் அணியின் 'டாப்-ஆர்டர்' பேட்ஸ்மேன்கள் அதிரடியான தொடக்கத்தை அளித்தாலும், 'மிடில்' மற்றும் 'டெத்' ஓவர்களில் அணி முற்றிலும் சரிந்தது.

குறிப்பாக, இந்திய சுழற்பந்துவீச்சாளர்களான குல்தீப் யாதவ் மற்றும் வருண் சக்கரவர்த்தி ஆகியோரின் பந்துவீச்சை எதிர்கொள்ள முடியாமல் பாகிஸ்தான் வீரர்கள் திணறினர். குல்தீப் 4 ஓவர்களில் 31 ரன்கள் விட்டுக்கொடுத்து 1 விக்கெட்டையும், வருண் 4 ஓவர்களில் வெறும் 25 ரன்களை மட்டுமே விட்டுக்கொடுத்தும் பாகிஸ்தானுக்குப் பெரும் நெருக்கடியை அளித்தனர்.

சோனி ஸ்போர்ட்ஸ் தொலைக்காட்சி விவாதத்தில் இதுகுறித்து பேசிய வாசிம் அக்ரம், "பாகிஸ்தான் கிரிக்கெட் வாரியம், வீரர்களின் மத்திய ஒப்பந்தத்தில் ஒரு புதிய கட்டுப்பாட்டை சேர்க்க வேண்டும். அதன்படி, வீரர்கள் உள்நாட்டு முதல்தர கிரிக்கெட் போட்டிகளில் (First-Class Cricket) கட்டாயம் விளையாட வேண்டும் என்பதை விதியாக்க வேண்டும்" என்று காட்டமாகத் தெரிவித்தார்.

மேலும் அவர் கூறுகையில், "பாகிஸ்தான் வீரர்கள் போட்டியின் 18 மற்றும் 19-வது ஓவர்களில் 'டாட் பால்'களை ஆடிக் கொண்டிருந்தார்கள். பந்தை அடிக்கத் தவறவில்லை, மாறாக தடுத்து (defend) ஆடிக் கொண்டிருந்தார்கள். அவர்களால் குல்தீப்-இன் பந்துவீச்சைக் கையிலிருந்து வரும்போதே கணிக்க முடியவில்லை, என்ன செய்வதென்று தெரியாமல் விழித்தனர். பாகிஸ்தான் வீரர்கள் உள்நாட்டில் சிவப்புப் பந்து கிரிக்கெட்டில் (Red-Ball Cricket) விளையாடுவது மிகவும் அவசியம்" என்று அக்ரம் தனது ஆதங்கத்தை வெளிப்படுத்தினார்.

ஒரு நல்ல தொடக்கத்திற்குப் பிறகும், பாகிஸ்தான் அணியால் 20 ஓவர்களில் 171 ரன்களை மட்டுமே எடுக்க முடிந்தது. இந்த இலக்கை இந்திய அணி 19-வது ஓவரிலேயே எளிதாக எட்டி 6 விக்கெட் வித்தியாசத்தில் வெற்றி பெற்றது. இந்த ஆசிய கோப்பை தொடரில் இந்திய அணிக்கு எதிராக பாகிஸ்தான் சந்திக்கும் இரண்டாவது தோல்வி இது என்பது குறிப்பிடத்தக்கது.

லீக் சுற்றிலும் இந்திய அணி 7 விக்கெட் வித்தியாசத்தில் பாகிஸ்தானை வீழ்த்தியிருந்தது. வீரர்களின் திறமையின்மை மற்றும் தவறான ஆட்ட அணுகுமுறையே இந்த தொடர் தோல்விகளுக்குக் காரணம் என்று கிரிக்கெட் வல்லுநர்கள் கருத்து தெரிவித்து வருகின்றனர்.