Asia Cup: திரில் வெற்றி பெற்ற வங்கதேசம்.. ஆப்கானிஸ்தானை வீழ்த்தி சூப்பர் 4 கனவை தக்கவைத்தது

அபுதாபி: 2025 ஆசிய கோப்பை தொடரின் மிக முக்கியமான 'வாழ்வா சாவா' ஆட்டத்தில், வங்கதேச அணி கடைசி ஓவர் வரை போராடி, ஆப்கானிஸ்தான்னை 8 ரன்கள் வித்தியாசத்தில் வீழ்த்தி ஒரு திரில் வெற்றியைப் பதிவு செய்துள்ளது. இந்த வெற்றியின் மூலம், வங்கதேசம் தனது சூப்பர் 4 சுற்றுக்கான நம்பிக்கையை உயிர்ப்புடன் வைத்துள்ளது. தன்சித் ஹசன்னின் அதிரடி அரைசதம் மற்றும் பந்துவீச்சாளர்களின் கூட்டு முயற்சி இந்த வெற்றிக்கு முக்கியக் காரணமாக அமைந்தது.

அபுதாபியில் நடந்த இந்தப் போட்டியில், டாஸ் வென்று முதலில் பேட்டிங்கைத் தேர்வு செய்த வங்கதேச அணிக்கு, தன்சித் ஹசன் தமிம் மிகச் சிறப்பான தொடக்கத்தைக் கொடுத்தார். ஒருபுறம் விக்கெட்டுகள் விழுந்தாலும், மறுமுனையில் நங்கூரம் போல நின்று ஆடிய தன்சித், ஆப்கானிஸ்தான் பந்துவீச்சை சிதறடித்தார். வெறும் 31 பந்துகளைச் சந்தித்த அவர், 4 பவுண்டரிகள் மற்றும் 3 சிக்ஸர்களுடன் 52 ரன்கள் விளாசி, அணிக்கு வலுவான அடித்தளத்தை அமைத்துக் கொடுத்தார்.

அவருக்கு சைஃப் ஹசன் (30) மற்றும் தவ்ஹித் ஹிரிடோய் (26) ஆகியோர் ஓரளவு ஒத்துழைப்பு அளித்தனர். ஆப்கானிஸ்தான் தரப்பில், கேப்டன் ரஷீத் கான் மற்றும் நூர் அஹ்மத் ஆகியோர் தலா இரண்டு விக்கெட்டுகளை வீழ்த்தி, வங்கதேசத்தின் ரன் வேகத்தைக் கட்டுப்படுத்தினர். இறுதியாக, வங்கதேச அணி நிர்ணயிக்கப்பட்ட 20 ஓவர்களில் 5 விக்கெட் இழப்பிற்கு 154 ரன்கள் எடுத்தது.

இறுதிவரை போராடிய ஆப்கானிஸ்தான்:

155 ரன்கள் என்ற சவாலான இலக்கைத் துரத்திய ஆப்கானிஸ்தான் அணிக்கு, போட்டியின் முதல் பந்திலேயே நசும் அஹ்மத் அதிர்ச்சி கொடுத்தார். செடிக்குல்லா அடல் டக் அவுட் ஆகி வெளியேறினார். அதன்பிறகு, ரஹ்மானுல்லா குர்பாஸ் (35) மற்றும் குல்பாடின் நைப் (16) ஆகியோர் அணியை சரிவிலிருந்து மீட்க முயன்றனர்.

மிடில் ஓவர்களில், அஸ்மத்துல்லா ஒமர்சாய் (16 பந்துகளில் 30) மற்றும் கேப்டன் ரஷீத் கான் (11 பந்துகளில் 20) ஆகியோர் அதிரடியாக விளையாடி, ஆப்கானிஸ்தானை வெற்றிப் பாதைக்கு மிக அருகில் அழைத்துச் சென்றனர். ஆனால், வங்கதேச பந்துவீச்சாளர்கள் சரியான நேரத்தில் விக்கெட்டுகளை வீழ்த்தி, ஆட்டத்தைத் தங்கள் பக்கம் திருப்பினர்.

பந்துவீச்சாளர்களின் மாயாஜாலம்:

வங்கதேச அணி சார்பில், மூத்த வேகப்பந்து வீச்சாளர் முஸ்தாபிசுர் ரஹ்மான், டெத் ஓவர்களில் சிறப்பாகப் பந்துவீசி 3 விக்கெட்டுகளை வீழ்த்தி, ஆட்டத்தின் திருப்புமுனையாக அமைந்தார். சுழற்பந்து வீச்சாளர்களான நசும் அஹ்மத் மற்றும் ரிஷாத் ஹொசைன் ஆகியோர் தலா 2 விக்கெட்டுகளை வீழ்த்தி, ஆப்கானிஸ்தானின் ரன் ஓட்டத்தைக் கட்டுப்படுத்தினர். தஸ்கின் அகமத்தும் 2 விக்கெட்டுகளை வீழ்த்தி, இந்த வெற்றிக்கு முக்கியப் பங்காற்றினார்.

இறுதியாக, ஆப்கானிஸ்தான் அணி 20 ஓவர்களில் அனைத்து விக்கெட்டுகளையும் இழந்து 146 ரன்கள் மட்டுமே எடுத்தது. இதன் மூலம், வங்கதேசம் 8 ரன்கள் வித்தியாசத்தில் ஒரு மிக முக்கியமான வெற்றியைப் பதிவு செய்தது. இந்த வெற்றி, 'குரூப் பி' பிரிவின் சூப்பர் 4 தகுதிப் போட்டியை மிகவும் சுவாரஸ்யமாக்கியுள்ளது.