உலகக்கோப்பை நாயகன் பும்ராவை விமர்சித்த குக்.. 15 ரன்களுக்கு 8 விக்கெட்டுகளை வீழ்த்த முடியுமா?

அகமதாபாத்: சமீபத்தில் அகமதாபாத்தில் முடிவடைந்த 2026 டி20 உலகக்கோப்பை தொடரில் இந்திய அணியின் அபார வெற்றிக்கு முக்கியக் காரணமாகத் திகழ்ந்தவர் நட்சத்திர வேகப்பந்து வீச்சாளர் ஜஸ்பிரித் பும்ரா. இந்தத் தொடர் முழுவதும் எதிரணிகளைத் திணறடித்து 14 விக்கெட்டுகளை வீழ்த்திய அவர், அனைத்து வடிவ கிரிக்கெட்டிலும் உலகின் தலைசிறந்த பந்துவீச்சாளராகக் கொண்டாடப்படுகிறார். இந்நிலையில், டெஸ்ட் கிரிக்கெட்டில் பும்ராவின் தாக்கம் குறித்து இங்கிலாந்து அணியின் முன்னாள் கேப்டன் அலஸ்டைர் குக் எழுப்பியுள்ள கேள்வி தற்போது கிரிக்கெட் வட்டாரத்தில் மிகப்பெரிய பேசுபொருளாக மாறியுள்ளது.

ஒரு பாட்காஸ்ட் நிகழ்ச்சியில் கலந்துகொண்டு பேசிய அலஸ்டைர் குக், பும்ரா சந்தேகத்திற்கு இடமின்றி தற்போது உலகின் தலைசிறந்த பந்துவீச்சாளர் என்பதை கூறினார். ஆனால், 2015ஆம் ஆண்டு ஆஷஸ் தொடரில் இங்கிலாந்து வீரர் ஸ்டூவர்ட் பிராட் வெறும் 15 ரன்களை மட்டுமே விட்டுக்கொடுத்து எட்டு விக்கெட்டுகளை வீழ்த்தி ஆஸ்திரேலியாவை துவம்சம் செய்ததைப் போல, பும்ராவால் டெஸ்ட் போட்டிகளில் ஒட்டுமொத்தமாக ஆட்டத்தை மாற்றக்கூடிய பந்துவீச்சை வீச முடியுமா என்று அவர் தனது சந்தேகத்தை எழுப்பியுள்ளார். அவர் அந்த வகையைச் சேர்ந்த பந்துவீச்சாளர் தானா என்ற கேள்வியையும் முன்வைத்துள்ளார்.

ஆனால், அதே விவாதத்தில் பங்கேற்ற மற்றொரு முன்னாள் இங்கிலாந்து கேப்டனான மைக்கேல் வாகன் பும்ராவின் திறமையை வெகுவாகப் புகழ்ந்து தள்ளினார். தான் 1985 ஆம் ஆண்டு முதல் கிரிக்கெட்டைத் தொடர்ந்து பார்த்து வருவதாகவும், அந்த வகையில் தான் பார்த்ததிலேயே பும்ராதான் மிகச்சிறந்த பந்துவீச்சாளர் என்றும் அவர் குறிப்பிட்டார். அதுமட்டுமின்றி, உலகப்புகழ் பெற்ற கால்பந்து ஜாம்பவான்களான லியோனல் மெஸ்ஸி மற்றும் கிறிஸ்டியானோ ரொனால்டோ போன்ற வீரர்களுடன் பும்ராவை ஒப்பிட்டு வாகன் பாராட்டினார்.

நியூசிலாந்து அணிக்கு எதிரான 2026 டி20 இறுதிப்போட்டியில் நான்கு ஓவர்கள் வீசிய பும்ரா நான்கு விக்கெட்டுகளை வீழ்த்தி ஆட்டநாயகன் விருதை வென்றார். மேலும், சக சுழற்பந்து வீச்சாளரான வருண் சக்ரவர்த்தியுடன் இணைந்து இந்த உலகக்கோப்பைத் தொடரில் அதிக விக்கெட்டுகளை வீழ்த்திய வீரர் என்ற பெருமையையும் பும்ரா தட்டிச் சென்றார். இந்திய அணி 96 ரன்கள் வித்தியாசத்தில் நியூசிலாந்தை வீழ்த்தி, சொந்த மண்ணில் டி20 உலகக்கோப்பையை வெற்றிகரமாகத் தக்கவைத்த முதல் அணி என்ற வரலாற்றுச் சாதனையையும் படைத்துள்ளது குறிப்பிடத்தக்கது.