அதிரடி மன்னன் கிறிஸ் கெயில் ஒருநாள் போட்டிகளில் ஓய்வு! கடைசியா ஆடுறதை பார்க்கணும் போல இருக்கா?

நீண்ட இடைவெளி

கிறிஸ் கெயில் கடைசியாக ஜூலை 2018இல் வங்கதேச அணிக்கு எதிராக ஒருநாள் தொடரில் ஆடினார். அதன் பின் வெஸ்ட் இண்டீஸ் அணிக்காக ஆடுவதை தவிர்த்து வந்தார். சில டி20 போட்டிகளில் மட்டும் ஆடினார். இடையே ஆப்கானிஸ்தான் பிரீமியர் லீக் மற்றும் டி10 லீக் ஆகியவற்றில் மட்டுமே பங்கேற்றார்.

2015 உலகக்கோப்பைக்கு பின்..

இன்னும் சொல்லப் போனால் 2015 உலகக்கோப்பைக்கு பின்னர் வெறும் 15 ஒருநாள் போட்டிகளில் மட்டுமே நாட்டுக்காக ஆடியுள்ளார். இதற்கு முக்கிய காரணம் வெஸ்ட் இண்டீஸ் கிரிக்கெட் அமைப்பின் நிர்வாகத்துடன் சம்பளம் தொடர்பாக இருந்த மோதல் போக்கு தான் என கூறப்படுகிறது.

ஓய்வு முடிவு

அடுத்து நடைபெற உள்ள இங்கிலாந்து ஒருநாள் தொடரில் கிறிஸ் கெயில் பங்கேற்பார் என்ற செய்தி வந்த போது பலரும் ஆச்சரியம் அடைந்தனர். நீண்ட நாட்கள் கழித்து வெஸ்ட் இண்டீஸ் அணிக்காக ஒருநாள் போட்டிகளில் ஆடுவது ஏன் என புரியும் வகையில் தற்போது தன் ஓய்வு முடிவை அறிவித்துள்ளார் கிறிஸ் கெயில்.

39 வயதாகிறது

உலகக்கோப்பை 2019 வரும் மே மாதம் துவங்கி நடைபெற உள்ளது. இதுவே தன் கடைசி ஒருநாள் தொடர் என அறிவித்துள்ளார் அதிரடி மன்னன். கிறிஸ் கெயிலுக்கு தற்போது 39 வயதாகிறது. இவரது இளமைக் காலத்துடன் ஒப்பிட்டால் கெயிலின் முந்தைய துடிப்பு இப்போது இல்லை என்றே கூறலாம். எனினும், அவரது அதிரடி இன்னும் மாறவில்லை.

லாராவுக்கு பின்..

பிரையன் லாராவுக்கு அடுத்து அதிக ஒருநாள் போட்டிகள், அதிக ஒருநாள் போட்டி ரன்கள் அடித்துள்ள வெஸ்ட் இண்டீஸ் வீரர் கிறிஸ் கெயில் மட்டுமே. 284 ஒருநாள் போட்டிகளில் ஆடி 9727 ரன்கள் குவித்துள்ளார் கிறிஸ் கெயில். பகுதி நேர பந்துவீச்சில் 165 விக்கெட்களும் சாய்த்துள்ளார் என்பது குறிப்பிடத்தக்கது.

தோனி ஓய்வா?

2019 உலகக்கோப்பை பல அனுபவ வீரர்களின் கடைசி உலகக்கோப்பை தொடராக அமைய உள்ளது. சில முக்கிய வீரர்கள் இந்த தொடருடன் ஓய்வு பெறுவார்கள் என கருதப்படுகிறது. அந்த வரிசையில் இந்தியாவின் தோனியும் இருக்கிறார் என்பது குறிப்பிடத்தக்கது.