சபாஷ்.. சரியான போட்டி.. விராட் கோலியின் முதல் இடத்துக்கு குறி வைத்த ரோஹித் சர்மா!

உலகக்கோப்பை ரன் குவிப்பு

உலகக்கோப்பை தொடரில் விராட் கோலி 442 ரன்கள் குவித்துள்ளார் அவரது சராசரி 63.14 ஆகும். கோலி ஒரு சதம் கூட அடிக்கவில்லை. ரோஹித் சர்மா 647 ரன்கள் குவித்துள்ளார். இதில் ஐந்து சதங்கள் அடங்கும்.

ஐசிசி தரவரிசை

ஐசிசி ஒருநாள் போட்டிகள் பேட்ஸ்மேன்கள் தரவரிசை உலகக்கோப்பை லீக் சுற்றின் முடிவில் வெளியிடப்பட்டது. இதில் விராட் கோலி தன் முதல் இடத்தை தக்க வைத்துக் கொண்டார். அவர் 891 புள்ளிகள் பெற்று இருந்தார். உலகக்கோப்பை தொடரின் செயல்பாடுகளால், கோலி 1 புள்ளி கூடுதலாக பெற்றார்.

ரோஹித் இரண்டாம் இடம்

ரோஹித் சர்மா உலகக்கோப்பை தொடரில் குவித்த ரன்கள் காரணமாக ஆறு புள்ளிகள் கூடுதலாக பெற்றார். அதன் மூலம் 885 புள்ளிகள் பெற்று இரண்டாம் இடத்தில் தொடர்ந்து நீடிக்கிறார். கோலிக்கும், ரோஹித்துக்குமான இடைவெளி வெறும் ஆறு புள்ளிகளாக சுருங்கி உள்ளது.

ரோஹித் முந்துவாரா?

ரோஹித் சர்மா உலகக்கோப்பை தொடருக்குப் பின்னும் இதே பார்மில் நீடித்து ரன் குவிக்கும் பட்சத்தில் விராட் கோலியை முந்தி ஒருநாள் போட்டிகள் தரவரிசையில் முதல் இடத்தை பிடிக்க வாய்ப்புள்ளது.

இனி தனி ஆவர்த்தனம் இல்லை

ரோஹித் சர்மா முன்பு இருந்தே கோலிக்கு போட்டியாக இருந்தாலும், தற்போது மிகவும் நெருக்கமாக வந்துள்ளார். கோலி இதுவரை தரவரிசையில் முதல் இடத்தில் தொடர்ந்து நீடித்து தனி ஆவர்த்தனம் செய்து வந்தார். இந்த நிலையில், அவருக்கு போட்டியாக மற்றொரு இந்திய வீரர் வந்துள்ளார்.