வரலாறு படைத்த தீப்தி ஷர்மா.. மகளிர் கிரிக்கெட்டில் இந்திய அணி புதிய மைல்கல் சாதனை

லண்டன்: இந்திய மகளிர் கிரிக்கெட் அணியின் நட்சத்திர ஆல்-ரவுண்டரான தீப்தி ஷர்மா, இங்கிலாந்துக்கு எதிரான நான்காவது டி20 போட்டியில் வரலாறு படைத்துள்ளார். ஜூலை 9, புதன்கிழமை அன்று மான்செஸ்டரில் உள்ள எமிரேட்ஸ் ஓல்ட் டிராஃபோர்டில் நடைபெற்ற இந்தப் போட்டியில், தீப்தி மகளிர் டி20 சர்வதேச கிரிக்கெட்டில் சுழற்பந்துவீச்சாளர்களில் அதிக விக்கெட்டுகளை வீழ்த்தியவர் என்ற சாதனையைப் படைத்தார்.

இந்தப் போட்டிக்கு முன், பாகிஸ்தான் வீராங்கனை நிதா தாருடன் 144 விக்கெட்டுகளுடன் சமநிலையில் இருந்தார் தீப்தி. இங்கிலாந்து பேட் செய்யத் தீர்மானித்த பிறகு, முதல் இன்னிங்ஸின் ஆறாவது ஓவரில் இங்கிலாந்து ஓப்பனர் சோபியா டன்க்லியை அவுட் செய்து, தனது 145வது விக்கெட்டை வீழ்த்தி இந்தச் சாதனையை எட்டினார்.

மகளிர் டி20 சர்வதேச போட்டிகளில் சுழற்பந்துவீச்சாளர்களில் அதிக விக்கெட்டுகள்:

• தீப்தி ஷர்மா: 128 போட்டிகளில் 145 விக்கெட்டுகள்
• நிதா தார்: 160 போட்டிகளில் 144 விக்கெட்டுகள்
• சோஃபி எக்லெஸ்டோன்: 100 போட்டிகளில் 139 விக்கெட்டுகள்

மூன்றாவது டி20 போட்டியில் தீப்தி தனது 300வது சர்வதேச விக்கெட்டை எட்டியிருந்தார். இதன் மூலம், ஜூலான் கோஸ்வாமிக்குப் பிறகு 300 சர்வதேச விக்கெட்டுகளைக் கடந்த இரண்டாவது இந்திய வீராங்கனை என்ற பெருமையைப் பெற்றார்.

300+ சர்வதேச விக்கெட்டுகளை வீழ்த்திய வீராங்கனைகள்:

• ஜூலான் கோஸ்வாமி: 355 விக்கெட்கள்
• கேத்தரின் ஸ்கைவர்-ப்ரண்ட்: 335 விக்கெட்கள்
• எலிஸ் பெர்ரி: 331 விக்கெட்கள்
• ஷப்னிம் இஸ்மாயில்: 317 விக்கெட்கள்
• அனிசா முகமது: 305 விக்கெட்கள்
• தீப்தி ஷர்மா: 301 விக்கெட்கள்

தமிழக வீரருக்கு இந்திய பிளேயிங் லெவனில் இடம் கேள்விக்குறி.. முழு நேர ஸ்பின்னரை சேர்க்க திட்டம்

நான்காவது டி20 போட்டியில் இங்கிலாந்தை ஆறு விக்கெட் வித்தியாசத்தில் வீழ்த்தியதன் மூலம், இந்திய மகளிர் அணி 3-1 என்ற கணக்கில் தொடரைக் கைப்பற்றி வரலாறு படைத்தது. இங்கிலாந்துக்கு எதிராக உள்நாட்டிலோ அல்லது வெளியிலோ இந்தியா டி20 தொடரை வெல்வது இதுவே முதல் முறை. மேலும், இந்தப் போட்டியில் ஹர்மன்பிரீத் கவுர், இந்தியாவிற்காக அதிக சர்வதேச போட்டிகளில் (333) விளையாடிய மிதாலி ராஜின் சாதனையை சமன் செய்தார்.

தீப்தி ஷர்மா மற்றும் சோஃபி எக்லெஸ்டோன் இருவரும் இந்தியா - இங்கிலாந்து மகளிர் டி20 போட்டிகளில் அதிக விக்கெட்டுகளை வீழ்த்திய கேத்தரின் ஸ்கைவர்-ப்ரண்டின் சாதனையை (23 விக்கெட்டுகள்) சமன் செய்தனர்.