"பயம் என்ற வார்த்தையே என்கிட்ட கிடையாது.. தோட்டா வந்தாலும்..".. NZ தொடருக்கு பின் கம்பீர் ஆவேசம்

ஹாமில்டன்: ஒருநாள், டி20, டெஸ்ட் என அனைத்து விதமான இந்திய அணிகளுக்கும் தலைமைப் பயிற்சியாளராகச் செயல்படுவது மனதளவில் மிகுந்த சோர்வை அளித்தாலும், எந்தவித அழுத்தத்தையும் தாங்கிக்கொள்ளும் வலிமை தன்னிடம் இருப்பதாக கௌதம் கம்பீர் பேசி இருக்கிறார்.

நியூசிலாந்துக்கு எதிரான 5-வது டி20 போட்டிக்குப் பிறகு செய்தியாளர்களிடம் பேசிய கம்பீர், "எனது அகராதியிலோ அல்லது எனது சிந்தனையிலோ பயம் என்ற வார்த்தைக்கு இடமே கிடையாது. நாங்கள் அனைவரும் தொழில்முறை கிரிக்கெட் வீரர்கள். காரணங்களையும் சாக்குப்போக்குகளையும் சொல்வதில் எனக்கு உடன்பாடில்லை. பணிச்சுமை மற்றும் தொடர் பயணங்களால் ஏற்படும் சவால்கள் கடுமையானவை. குறிப்பாக இந்திய அணியின் பயிற்சியாளராக இருக்கும்போது அழுத்தம் மிக அதிகமாக இருக்கும். நாம் ஆடும் ஒவ்வொரு போட்டியிலும் ஜெயிக்க வேண்டும் என்றுதான் மக்கள் எதிர்பார்ப்பார்கள். ஆனால் நாம் கள எதார்த்தத்தையும் புரிந்து கொள்ள வேண்டும்" என்றார்.

அனைத்து வடிவ அணிகளையும் ஒரே நேரத்தில் கையாள்வதால் மனதளவில் மிகவும் சோர்ந்து போயிருக்கிறீர்களா என்ற கேள்விக்கு பதிலளித்த அவர், "உண்மையைச் சொல்ல வேண்டுமென்றால் ஆம், சில நேரங்களில் மனதளவில் சோர்வை உணர்ந்திருக்கிறேன். ஆனால் அதை சமாளிக்கும் மன உறுதி என்னிடம் உள்ளது. எந்த அளவுக்கு முடியுமோ அந்த அளவுக்கு இந்த அழுத்தத்தைத் தாங்குவேன். விமர்சனங்கள் மற்றும் துப்பாக்கித் தோட்டாக்கள் போன்ற அழுத்தங்களை தாங்கிக் கொள்ளவே நான் தயாராக இருக்கிறேன். நானும் ஒரு மனிதன் தான் என்பதால் சோர்வு ஏற்படுவது இயல்பு. ஆனால் இதுவரை அதை வெற்றிகரமாகக் கையாண்டு வருகிறேன்" என்று கூறினார்.

வரலாறு படைத்த நமீபியா கிரிக்கெட் அணி.. 20 ஆண்டுகளுக்குப் பின் முதல் ஒருநாள் தொடர் வெற்றி

நியூசிலாந்து மண்ணில் 3-2 என்ற கணக்கில் டி20 தொடரை வென்ற கேப்டன் ஸ்ரேயாஸ் ஐயர் தலைமையிலான இளம் அணியை அவர் பாராட்டி பேசினார். "15 மணி நேர விமானப் பயணம் மற்றும் ஒரே ஒரு நாள் பயிற்சியை மட்டுமே வைத்துக் கொண்டு, நியூசிலாந்து போன்ற பலம் வாய்ந்த அணியை அதன் சொந்த மண்ணில் வீழ்த்தி தொடரை வென்றது மிகப்பெரிய சாதனை. அனுபவமில்லாத பந்துவீச்சுப் படையை வைத்துக் கொண்டு கேப்டன் ஸ்ரேயாஸ் ஐயர் அபாரமாக அணியை வழிநடத்தியுள்ளார்" என்று கம்பீர் தெரிவித்தார்.